થાઈલેન્ડ,
થાઇલેન્ડના ચિયાંગ રાઈ વીસ્તારમાં આવેલી થામ લુંઆંગ નાંગ નોન ગુફામાં ગુમ થઇ ગયેલી થાઈલેન્ડની કિશોર ફૂટબોલ ટીમની શોધખોળ ચાલુ છે. થાઈલેન્ડના અધિકારીઓએ બુધવારે પણ કિશોર ફૂટબોલ ટીમ અને એમના કોચને શોધવા માટેના સર્ચ ઓપરેશન ચાલુ રાખ્યું છે. જોકે, ભારે વરસાદના કારણે સર્ચ ઓપરેશનમાં ભારે હાલાકીનો સામનો કરવો પડી રહ્યો છે.
જણાવી દઈએ કે ઉત્તરી થાઈલેન્ડની ગુફામાં 12 કિશોર ફૂટબોલ ખેલાડી અને એમના કોચ શનિવારથી ફસાયેલા છે. રીપોર્ટસ મુજબ શનિવારે ચિયાંગ રાઈમાં થામ લુંઆંગ ગુફાના પ્રવેશદ્વાર પાસે ખેલાડીઓની સાયકલ, બૂટ અને અન્ય વસ્તુઓ મળી આવી હતી.
બચાવ કાર્ય ટીમના પ્રવક્તા રુએતેવાન પેતિસને કહ્યું કે એમને વિશ્વાસ છે કે ગુમ થયેલા લોકો હજુ સુધી જીવતા છે. જોકે, 72 કલાકના ખોજ કાર્ય બાદ પણ એમની સ્થિતિ વિષે જાણી શકાયું નથી. થાઈલેન્ડ સેનાની ઉચ્ચ સ્તરીય ટીમ આધુનિક ઉપકરણો સાથે ખેલાડીઓ અને કોચની ખોજ કરી રહી છે.
આ ટીમમાં 12 ખેલાડીઓની ઉમર 11થી 16 વર્ષ વચ્ચે છે. તેઓ બધા યુવા ફૂટબોલ ટીમના સદસ્ય છે. અને એમના 25 વર્ષીય કોચ સાથે આ ગુફામાં ગયા હતા.
પેતિસનનું માનવાનું છે કે આ ગુફાની અંદર જવાનો રસ્તો વરસાદના કારણે બંધ થઇ ગયો છે. અને પાણી ભરાઈ ગયું હોવાથી તેઓ ગુફાની બહાર નથી આવી શકતા. થાઈલેન્ડ નેશનલ પાર્ક પ્રશાસનના અધિકારી કામોલચાઈ કોટ્ચાએ જણાવ્યું કે અમે લગભગ 24 કલાકથી કામ કરી રહ્યા છીએ. પરંતુ ગુફામાં અંધારું અને કેટલીક જગ્યાઓ પર ઓક્સીજનની ઓછી માત્રાના કારણે કામ કરવામાં મુશ્કેલી થઇ રહી છે.
ફૂટબોલ ખેલાડીઓ અને એમના કોચ શનિવાર બપોરથી જ ગુમ છે. પાર્કના એક અધિકારીએ ખેલાડીઓની સાયકલોને ગુફાના પ્રવેશ દ્વાર પર જોઈ હતી.