Jamnagar News: જામનગરની જી.જી. હોસ્પિટલ (G.G. Hospital) ફરી એકવાર ચર્ચામાં છે, આ વખતે છેતરપિંડી (Fraud) અને નાણાંકીય ગેરરીતિના નવા કેસને લઈને. તાજેતરમાં, હોસ્પિટલમાં કાર્યરત કોન્ટ્રાક્ટર એજન્સી એમ.જે. સોલંકીના એક સેનિટરી ઈન્સ્પેક્ટર મકસુદ પઠાણ અને હોસ્પિટલના ચોથા વર્ગના કર્મચારી રાજેન્દ્રસિંહ જાડેજા વિરુદ્ધ એક કર્મચારી કિશન જગદીશભાઈ ગઢવીના સાત મહિનાના પગારની ઉચાપત કરવાનો આરોપ લાગ્યો છે. આ મામલે પોલીસ ફરિયાદ નોંધાઈ છે, જે ફરી એકવાર હોસ્પિટલની કામગીરી અને વ્યવસ્થાપન પર સવાલો ઉભા કરે છે.
આશ્ચર્યની વાત એ છે કે, આ પહેલો કિસ્સો નથી. ગત મે મહિનામાં પણ જી.જી. હોસ્પિટલ સરકારી નાણાંની લાખો રૂપિયાની ઉચાપતના કેસને લઈને હેડલાઈન્સમાં હતી. આ કેસમાં એમ.જે. સોલંકી એજન્સીના તત્કાલીન ક્લાર્ક ભાર્ગવ અને મહિલા કર્મચારી દિવ્યા મુંગરા સામેલ હતા. બંનેએ ‘ગોઠવણ’ કરીને સરકારી નાણાંની મોટી રકમની હેરાફેરી કરી હોવાનું બહાર આવ્યું હતું. પોલીસે ભાર્ગવની ધરપકડ કરી, અને અદાલતે તેને જેલહવાલે કર્યો હતો. તે જ પ્રમાણે, 23મી જુલાઈએ દિવ્યા મુંગરાની પણ ધરપકડ થઈ, અને તે હાલ જેલમાં છે. નોંધનીય છે કે, આ કેસમાં ઉચાપત થયેલી લાખો રૂપિયાની રકમ હજુ સુધી રિકવર થઈ નથી.
આ બંને કેસમાં એક વાત સ્પષ્ટ છે કે, જી.જી. હોસ્પિટલની આંતરિક વ્યવસ્થાપન અને દેખરેખની ગંભીર ખામીઓ છે. ગત મે મહિનાનો ઉચાપત કેસ પણ હોસ્પિટલે પોતે શોધ્યો ન હતો, બલ્કે તિજોરી કચેરીની જાણકારી બાદ ફરિયાદ નોંધાઈ હતી. આવી જ રીતે, તાજેતરના છેતરપિંડીના કેસમાં પણ હોસ્પિટલની નબળી દેખરેખ ચર્ચાનો વિષય બની છે.
એમ.જે. સોલંકી એજન્સીના કર્મચારીઓ વારંવાર આવા નાણાંકીય ગુનાઓમાં સંડોવાયેલા જોવા મળે છે. આ એજન્સીના કર્મચારીઓ હોસ્પિટલના કેટલાક અધિકારીઓની મીઠી નજર હેઠળ અથવા તેમની મદદથી આવા કૃત્યો કરતા હોવાનું લાગે છે. સવાલ એ ઉભો થાય છે કે, હોસ્પિટલ સત્તાવાળાઓ આવી ગેરરીતિઓને કેમ ચલાવી રહ્યા છે? શું આ બધું આંખ આડે કાન કરવાનું પરિણામ છે?
જી.જી. હોસ્પિટલમાં વર્ષોથી ચાલતી આ ગેરરીતિઓ અંગે નિષ્પક્ષ તપાસની માંગ ઉઠી રહી છે. એજન્સીના કર્મચારીઓની ભરતી અને તેમની પૃષ્ઠભૂમિની ચકાસણીનો મુદ્દો પણ તપાસનો વિષય બનવો જોઈએ. હોસ્પિટલની આંતરિક વ્યવસ્થામાં સુધારો અને કડક નાણાંકીય દેખરેખ દ્વારા જ આવા કેસોને અટકાવી શકાય છે.જામનગરની જી.જી. હોસ્પિટલ, જે લોકોના સ્વાસ્થ્યની સેવા માટે જાણીતી છે, તે હવે નાણાંકીય ગેરરીતિઓના કેસોને લઈને ચર્ચામાં છે. આવા કેસો નાગરિકોનો હોસ્પિટલ અને સરકારી વ્યવસ્થા પરનો ભરોસો ઘટાડે છે. સમય આવી ગયો છે કે, હોસ્પિટલ સત્તાવાળાઓ આ મુદ્દે ગંભીર પગલાં લે અને આવા ગુનાઓને રોકવા માટે નક્કર કાર્યવાહી કરે.
આ પણ વાંચો:શહેરની જી.જી. હોસ્પિટલમાં ફરી એકવાર રખડતાં શ્વાનોનો વીડિયો વાયરલ
આ પણ વાંચો:જી.જી. હોસ્પિટલના ડોકટરોની મોટી બેદરકારી, ચાલુ ઓપરેશને દર્દીના ફોટા પાડી કર્યા વાયરલ
આ પણ વાંચો:જામનગર જી.જી. હોસ્પિટલમાં દર્દીના સગાઓએ કર્યો ડોક્ટર ઉપર હુમલો : કારણ હતું આવું
