આસામ (Assam) રાજ્ય હાલના વર્ષોમાં સૌથી ભયાનક અને વિનાશક પૂરની પરિસ્થિતિનો સામનો કરી રહ્યું છે, જેના કારણે લાખો લોકોનું જીવન અસ્તવ્યસ્ત થઈ ગયું છે. આવા કઠિન સમયમાં બોલિવૂડ સુપરસ્ટાર સલમાન ખાને માનવતાનું ઉત્કૃષ્ટ ઉદાહરણ પૂરું પાડતા પૂર પીડિતો માટે મોટો સહારાનો હાથ લંબાવ્યો છે. ભલે સલમાન ખાન હાલ મુંબઈમાં ડિરેક્ટર વંશી પેડિપલ્લીની અનામી ફિલ્મનું શૂટિંગ કરી રહ્યા હોય, પરંતુ તેઓ ત્યાંથી જ આસામની પૂરની સ્થિતિ પર સતત નજર રાખી રહ્યા છે. પોતાના ચેરિટેબલ ટ્રસ્ટ ‘બીઇંગ હ્યુમન’ (Being Human) અને આસામના સત્તાવાર ફેન ક્લબ સાથે મળીને તેમણે પૂરગ્રસ્ત વિસ્તારોમાં મોટા પાયે રાહત સામગ્રી પહોંચાડવાનું અભિયાન શરૂ કર્યું છે.
શિવસાગર અને ગુવાહાટી ક્ષેત્ર પર પ્રાથમિક લક્ષ્ય
સલમાન ખાનના નિર્દેશન હેઠળ આ રાહત કામગીરીને અલગ-અલગ તબક્કામાં વહેંચવામાં આવી છે. પ્રથમ તબક્કા હેઠળ સૌથી વધુ અસરગ્રસ્ત શિવસાગર વિસ્તાર પર ખાસ ધ્યાન કેન્દ્રિત કરવામાં આવ્યું છે. ગુવાહાટીથી રાહત સામગ્રી એકઠી કરીને પૂરગ્રસ્ત વિસ્તારો સુધી પહોંચાડવામાં આવી રહી છે. સલમાન ખાન ફેન ક્લબ આસામના સ્થાનિક સ્વયંસેવકો ગ્રાઉન્ડ લેવલ પર જઈને જાતે જ આસામના જરૂરિયાતમંદ લોકો સુધી સીધી મદદ પહોંચાડી રહ્યા છે.
પીડિતો માટે ખાસ ‘રેડી-ટુ-ઈટ’ ફૂડ કિટ્સ અને જરૂરી સામગ્રીનું વિતરણ
પૂરના કારણે અનેક ઘરોમાં રસોઈ બનાવવાની વ્યવસ્થા ન હોવાથી, પ્રથમ તબક્કામાં ખાસ કરીને તરત ખાઈ શકાય તેવા ‘રેડી-ટુ-ઇટ’ ફૂડ પેકેટ્સ પહોંચાડવામાં આવી રહ્યા છે. આ કિટમાં પૌઆ, મમરા, બિસ્કિટ, ગોળ, બ્રેડ, ચીઝ અને જામ જેવી ખાવાની વસ્તુઓનો સમાવેશ થાય છે. સલમાન ખાનનો મુખ્ય હેતુ એ છે કે દરેક અસરગ્રસ્ત પરિવાર પાસે ઓછામાં ઓછું ૩ દિવસ ચાલે તેટલું ભોજન હોય. ખાદ્ય સામગ્રી ઉપરાંત રોગચાળો અટકાવવા માટે પીવાનું શુદ્ધ પાણી, વોટર પ્યુરિફિકેશન ટેબ્લેટ્સ, મચ્છરદાની/કોઈલ્સ અને મહિલાઓ માટે સેનિટરી પેડ્સનું પણ વિતરણ કરવામાં આવી રહ્યું છે.
બીજા તબક્કામાં મેડિકલ સહાય અને શાળાઓ-હોસ્પિટલોનું પુનઃનિર્માણ
આ રાહત અભિયાન માત્ર ભોજન પૂરતું સીમિત નથી પરંતુ લાંબા ગાળાના પુનર્વસન માટે પણ આયોજન કરાયું છે. આવતા સપ્તાહથી શરૂ થનારા બીજા તબક્કામાં પૂર પીડિતોને આખી રાશન કિટ અને તબીબી દવાઓ આપવામાં આવશે. તે સિવાય, પૂરના પાણી ઓસર્યા પછી ‘બીઇંગ હ્યુમન’ સંસ્થા દ્વારા ક્ષતિગ્રસ્ત થયેલી શાળાઓ અને હોસ્પિટલોના સમારકામ તથા પુનઃનિર્માણ માટે આર્થિક અને માળખાકીય મદદ પૂરી પાડવામાં આવશે. સલમાન ખાનની આ પહેલથી પ્રેરિત થઈને ભૂમિ પેડનેકર સહિત બોલિવૂડના અન્ય કલાકારો પણ અલગ-અલગ ફાઉન્ડેશન દ્વારા આસામની મદદે આગળ આવ્યા છે.
આ પણ વાંચો:સની દેઓલની ‘બટવારા 1947’નું ટ્રેલર રિલીઝ, ભાગલાની પીડા અને માનવતાની શક્તિશાળી કહાનીની ઝલક
આ પણ વાંચો:5 મિનિટના રોલ માટે ₹75 કરોડ! ‘ધ ઓડિસી’માં ટોમ હોલેન્ડ-ઝેન્ડાયાની જંગી કમાણી
આ પણ વાંચો:વિદ્યાર્થી આંદોલનની ઐતિહાસિક સફળતા: ‘Gen-Z ની તાકાત’ કહીને બોલિવૂડ હસ્તીઓએ યુવાનોને બિરદાવ્યા
