Middle East Tensions: ઈરાન અને અમેરિકા વચ્ચે ચાલી રહેલા તણાવ વચ્ચે હવે હોર્મુઝ સ્ટ્રેટને લઈને નવી ચિંતા ઊભી થઈ છે. ઈરાનની સંસદીય સમિતિ એક એવા પ્રસ્તાવિત કાયદા પર વિચાર કરી રહી છે, જેમાં અમેરિકા, ઈઝરાયલ અને અન્ય વિરોધી દેશોના જહાજોને હોર્મુઝ સ્ટ્રેટમાંથી પસાર થવા પર પ્રતિબંધ મૂકવાની જોગવાઈ હોવાનું સામે આવ્યું છે.
એક અહેવાલ મુજબ, એક ઈરાની સાંસદે આ પ્રસ્તાવ અંગે માહિતી આપી છે. ડ્રાફ્ટ બિલમાં નિયમોનું ઉલ્લંઘન કરનારા જહાજો સામે કડક કાર્યવાહી કરવાની જોગવાઈ છે. તેમાં જહાજમાં રહેલા માલના કુલ મૂલ્યના 20 ટકા સુધીનો દંડ ફટકારવાની જોગવાઈ પણ સામેલ હોવાનું જણાવાયું છે.
સાંસદે કહ્યું કે હાલમાં નિષ્ણાતો આ કાયદાની સમીક્ષા કરી રહ્યા છે અને સંસદ અંતિમ મંજૂરી આપતા પહેલા તેમની ભલામણો લેવામાં આવશે.
બીજી તરફ, અમેરિકાના રાષ્ટ્રપતિ ડોનાલ્ડ ટ્રમ્પ સતત દાવો કરી રહ્યા છે કે ઈરાન સાથે ચાલી રહેલો સંઘર્ષ ટૂંક સમયમાં સમાપ્ત થઈ શકે છે. જોકે, લાંબા સમયથી ચાલી રહેલા યુદ્ધને કારણે સ્થિતિ હજુ પણ અનિશ્ચિત છે. ટ્રમ્પે તાજેતરમાં સ્વીકાર્યું હતું કે લાંબા સમયની કાર્યવાહી બાદ અમેરિકન સૈન્યને કેટલાક હથિયારો અને દારૂગોળાના પુરવઠામાં પડકારોનો સામનો કરવો પડી રહ્યો છે.
હોર્મુઝ સ્ટ્રેટ વૈશ્વિક વેપાર માટે અત્યંત મહત્વપૂર્ણ માર્ગ માનવામાં આવે છે, કારણ કે વિશ્વના મોટા પ્રમાણમાં તેલનો વેપાર આ માર્ગ પરથી થાય છે. આ વિસ્તારને લઈને ઈરાન અને ઓમાન વચ્ચે પણ ચર્ચાઓ ચાલી રહી છે, જેમાં સ્ટ્રેટના નિયંત્રણ અને વ્યવસ્થાપનને લઈને વચગાળાની વ્યવસ્થાની શક્યતાઓ સામે આવી છે.
ટ્રમ્પનું કહેવું છે કે હોર્મુઝ સ્ટ્રેટ તમામ દેશો માટે ખુલ્લો રહેવો જોઈએ અને ત્યાંથી પસાર થતા જહાજો પર કોઈ પ્રતિબંધ કે વધારાની ફી લાગુ ન થવી જોઈએ. જોકે, ઈરાનના નવા પ્રસ્તાવિત પગલાંથી અમેરિકા અને મધ્ય પૂર્વમાં ફરી તણાવ વધવાની શક્યતા છે.
દરમિયાન, ટ્રમ્પે દાવો કર્યો છે કે ઈરાન અને અન્ય મધ્ય પૂર્વીય દેશોની વિનંતી બાદ અમેરિકાએ પોતાની કેટલીક લશ્કરી કાર્યવાહી અટકાવી છે, જેથી વ્યાપક સમજૂતી માટે માર્ગ તૈયાર થઈ શકે. જોકે, હોર્મુઝ સ્ટ્રેટને લઈને બંને પક્ષોના વલણમાં મોટો તફાવત યથાવત છે.
