Navsari News: ગુજરાત (Gujarat) ના ગૃહ રાજ્યમંત્રી હર્ષ સંઘવી (Harsh Sanghvi) એ ડાકણ પ્રથા જેવી સામાજિક કુરીતિ સામે લડત આપતી ડાંગ જિલ્લા પોલીસ (Dang District Police) ની પહેલ ‘પ્રોજેક્ટ દેવી’ની જોરદાર પ્રશંસા કરી છે. આ પહેલ હેઠળ ડાંગ પોલીસની ‘શી ટીમ’એ ડાકણ પ્રથાનો ભોગ બનતી મહિલાઓને ન્યાય અપાવવા અને સમાજમાં જાગૃતિ ફેલાવવા માટે ઉલ્લેખનીય કામગીરી કરી છે. આ અંગે નિવેદન આપતાં સંઘવીએ ડાંગ પોલીસને વિશેષ અભિનંદન પાઠવ્યા અને આ અભિયાનને સમાજ માટે પ્રેરણાદાયી ગણાવ્યું.
ડાંગ જિલ્લા, જે આદિવાસી વસ્તી માટે જાણીતો છે, ત્યાં ડાકણ પ્રથા જેવી અંધશ્રદ્ધાએ ઘણી મહિલાઓનું જીવન બરબાદ કર્યું છે. ‘પ્રોજેક્ટ દેવી’ હેઠળ ડાંગ પોલીસની ‘શી ટીમ’એ આવી 50થી વધુ મહિલાઓને ડાકણ પ્રથાના શોષણમાંથી મુક્ત કરી, તેમનું પુનર્વસન કર્યું છે. આ ટીમે ગામડાઓમાં જઈને લોકોમાં જાગૃતિ ફેલાવવાનું કામ કર્યું અને અંધશ્રદ્ધાને ડામવા માટે શિક્ષણ અને સમજણનો સહારો લીધો. આ પહેલની સફળતાને લઈને હર્ષ સંઘવીએ ખાસ નોંધ લીધી અને ટીમના પ્રયાસોને બિરદાવ્યા.
હર્ષ સંઘવીએ જાહેરાત કરી કે તેઓ ટૂંક સમયમાં ડાંગ જિલ્લાની મુલાકાત લઈ, ડાકણ પ્રથાનો ભોગ બનેલી બહેનો સાથે મુલાકાત કરશે. આ મુલાકાત દરમિયાન તેઓ પીડિત મહિલાઓની વ્યથા સાંભળશે અને તેમની સમસ્યાઓના નિરાકરણ માટે વધુ પગલાં લેવા અંગે ચર્ચા કરશે. આ ઉપરાંત, તેમણે રક્ષાબંધનના પવિત્ર અવસરે નવસારીમાં એક કાર્યક્રમ દરમિયાન બહેનોને અપીલ કરી કે તેઓ ગામમાં ચાલતી કોઈપણ પ્રકારની કુરીતિઓ અને દૂષણોની જાણ પોલીસને કરે, જેથી સમયસર પગલાં લઈ શકાય.
ગૃહ રાજ્યમંત્રીએ ડાકણ પ્રથા જેવી અંધશ્રદ્ધાઓને નાબૂદ કરવા માટે શિક્ષણ અને જાગૃતિની આવશ્યકતા પર ભાર મૂક્યો. તેમણે જણાવ્યું કે, “અજ્ઞાન અને અંધશ્રદ્ધાને દૂર કરવા માટે સમાજના દરેક વર્ગ સુધી શિક્ષણ અને સમજદારી પહોંચે તે જરૂરી છે. ‘પ્રોજેક્ટ દેવી’ આ દિશામાં એક મહત્વનું પગલું છે, જેનાથી ન માત્ર પીડિત મહિલાઓને ન્યાય મળે છે, પરંતુ સમાજમાં પણ સકારાત્મક ફેરફારો આવી રહ્યા છે.”
આ પણ વાંચો: રાજ્યની ત્રણ મેડિકલ કોલેજને અનિયમિતતા નડી, બેઠકો કપાઈ
આ પણ વાંચો: ગોંડલના પૂર્વ તલાટીનું મોરબી જેવું જમીન કૌભાંડ
આ પણ વાંચો: રાજ્યમાં બ્લેકના વ્હાઇટ કરી આપનારા પર ઇન્કમ ટેક્સે કસ્યો સકંજો
