એક્ટિવા પર રેશ્માબેન પોતાના પુત્ર સાથે જઈ રહ્યા હતાં. તે દરમિયાન કાચો અને ઉબડખાબડ વાળા રસ્તા પર અચાનક બેલેન્સ ગુમાવ્યું હતું. જેથી માતા અને પુત્ર આ રસ્તા પર ભૂર્ગભ ગટર માટે બનાવવામાં આવેલી કુંડીમાં પડ્યા હતાં. પુત્રને કોઈ ઈજા થઈ ન હતી. પરંતુ માતા ઘાયલ થઈ હતી. ત્યાંથી પસાર થનારા અન્ય વ્યક્તિનું આ અકસ્માત પર ધ્યાન જતાં તુરત જ 108 બોલાવી હતી.
આશરે 15 ફૂટ ઊંડા ગટરના ખાડામાંથી સ્થાનિકો તેમજ 108ની ટુકડીએ મહિલા અને બાળકને સહી સલામત રીતે બહાર કાઢી લીધા હતા. બાળકને કોઈ ઈજા થઈ ન હતી, અને તેનો બચાવ થયો હતો. જયારે માતા રેશ્માબેન ઇજાગ્રસ્ત થતાં તેમને સારવાર માટે જામનગરની સરકારી જી.જી. હોસ્પિટલમાં દાખલ કરવામાં આવ્યા હતા. હાલ તેમની સ્થિતિ સુધારા પર છે. આ અકસ્માતની જાણ થતાં સીટી એ. ડિવિઝનનો પોલીસ સ્ટાફ ઘટના સ્થળે પહોંચ્યો હતો.
