Telangana News: તેલંગણાના નલગોન્ડા જિલ્લાના કોન્ડામલ્લેપલ્લીમાં એક ખાનગી શાળાના મહિલા પ્રિન્સિપાલ રૂપા રેડ્ડીની હત્યાના (Nalgonda Principal Murder) કેસમાં પોલીસે ચોંકાવનારો ખુલાસો કર્યો છે. પોલીસના જણાવ્યા મુજબ, આ કેસમાં તે જ શાળાના ધોરણ 10ના બે સગીર વિદ્યાર્થીઓની અટકાયત કરવામાં આવી છે. તપાસ દરમિયાન પ્રિન્સિપાલના છેલ્લા ફોનકોલમાં બોલાયેલો ‘બાબુ’ શબ્દ મહત્વપૂર્ણ ક્લૂ બન્યો હોવાનું સામે આવ્યું છે.
Nalgonda Principal Murder: શું હતો ‘બાબુ’ શબ્દનો ક્લૂ?
ઘટનાના સમયે રૂપા રેડ્ડી પોતાના ઘરમાં હતા અને તેમના એક સંબંધીએ ફોન પર તેમની સાથે વાતચીત કરી હતી. પોલીસના જણાવ્યા મુજબ, વાતચીત દરમિયાન રૂપા રેડ્ડીએ ‘બાબુ’ શબ્દ ઉચ્ચાર્યો હતો, ત્યારબાદ સંપર્ક તૂટી ગયો હતો. તેલંગાણામાં નાના બાળકો અથવા વિદ્યાર્થીઓને પણ ‘બાબુ’ કહીને સંબોધવામાં આવતા હોવાથી પોલીસે તપાસનો ફોકસ શાળાના વિદ્યાર્થીઓ અને આસપાસના લોકો તરફ કેન્દ્રિત કર્યો હતો. આ ક્લૂના આધારે તપાસ આગળ વધી હતી.
આખરે મામલો શું હતો?
તેલંગણાના નલગોન્ડા જિલ્લાના કોન્ડામલ્લેપલ્લીમાં આવેલી એક ખાનગી શાળાના પ્રિન્સિપાલ રૂપા રેડ્ડીની 11 ઓગસ્ટે તેમના જ ઘરમાં હત્યા થઈ (Rupa Reddy Murder) હતી. પોલીસ તપાસ મુજબ, શાળાના ધોરણ 10ના બે સગીર વિદ્યાર્થીઓએ કથિત રીતે ચોરીના ઇરાદે આ ઘટનાનું આયોજન કર્યું હતું. પોલીસનો દાવો છે કે ઘટનાના દિવસે શાળામાં ફી જમા થતી હોવાથી પ્રિન્સિપાલના ઘરમાં મોટી રકમ હોવાની બંનેને આશા હતી.
પોલીસ તપાસમાં સામે આવ્યો કથિત પ્લાન
પોલીસના જણાવ્યા મુજબ, ઘટનાના દિવસે એક સગીર પ્રિન્સિપાલના ઘરમાં પ્રવેશ્યો હતો જ્યારે તેનો સાથી બહાર નજર રાખી રહ્યો હતો. આ દરમિયાન પ્રિન્સિપાલે તેને જોઈ લેતા પોલીસના આરોપ મુજબ તેમના પર જીવલેણ હુમલો (Telangana Murder Case) કરવામાં આવ્યો હતો. ત્યારબાદ બંને કથિત રીતે ઘરમાંથી અંદાજે રૂ. 2.5 લાખની રોકડ રકમ લઈને ફરાર થયા હતા.
શાળામાં અગાઉની ઘટનાને લઈને અદાવત હોવાનો પોલીસનો દાવો
તપાસમાં સામે આવ્યું હોવાનું પોલીસે જણાવ્યું કે એક વિદ્યાર્થી અગાઉ શાળામાં મોબાઇલ અને રોકડ રકમ સાથે પકડાયો હતો. આ મામલે પ્રિન્સિપાલે તેને ઠપકો આપ્યો હતો અને તેના વાલીઓને જાણ કર્યા બાદ હોસ્ટેલમાંથી કાઢીને ડે-સ્કોલર બનાવ્યો હતો. પોલીસના મતે, આ બાબતની નારાજગી અને પૈસાની લાલચને કારણે બંનેએ ચોરીનો પ્લાન બનાવ્યો હતો.
બે વિદ્યાર્થીઓના શંકાસ્પદ ખર્ચથી પોલીસને શંકા
પોલીસ તપાસ દરમિયાન ધ્યાનમાં આવ્યું કે શાળાના બે વિદ્યાર્થીઓ અચાનક ખર્ચાળ પ્રવૃત્તિઓ કરવા લાગ્યા હતા. મિત્રો સાથે પાર્ટી અને અન્ય ખર્ચને લઈને પોલીસને શંકા ગઈ હતી. પોલીસે બંનેની પૂછપરછ અને તપાસ શરૂ કરી હતી. ત્યારબાદ મળેલા પુરાવાના આધારે બંને સગીરોને અટકાયતમાં લેવામાં આવ્યા હોવાનું પોલીસે જણાવ્યું છે.
રોકડ રકમ અને અન્ય પુરાવાની તપાસ
પોલીસના જણાવ્યા મુજબ, એક આરોપી વિદ્યાર્થી પાસેથી મોટી રકમની રોકડ અને એક મોબાઇલ ફોન મળી આવ્યો હતો. શરૂઆતમાં વિદ્યાર્થીએ આ રકમ પરિવાર તરફથી મળી હોવાનું જણાવ્યું હતું. જોકે, તપાસ દરમિયાન રોકડ અને અન્ય પુરાવાની ફોરેન્સિક તપાસ કરવામાં આવી હતી. પોલીસ આ પુરાવાઓના આધારે કેસની કડીઓ જોડીને સમગ્ર ઘટનાક્રમની તપાસ કરી રહી છે.
બંને સગીરો સામે કાયદેસરની કાર્યવાહી
પોલીસે બંને સગીરોને બાલ ન્યાય પ્રક્રિયા હેઠળ (Minor Students Detained) રજૂ કરીને આગળની કાયદેસરની કાર્યવાહી શરૂ કરી છે. તપાસમાં ફોરેન્સિક પુરાવા, CCTV સહિત અન્ય ટેક્નિકલ અને સાક્ષી પુરાવાઓની પણ ચકાસણી કરવામાં આવી રહી છે. આ કેસમાં ‘બાબુ’ શબ્દથી મળેલો પ્રારંભિક ક્લૂ અને ત્યારબાદ વિદ્યાર્થીઓની શંકાસ્પદ પ્રવૃત્તિઓએ પોલીસને તપાસની દિશા નક્કી કરવામાં મદદ કરી હોવાનું પોલીસ તપાસમાં સામે આવ્યું છે.
આ પણ વાંચો: કેશોદમાં ઘરકંકાસનો કરુણ અંત, પત્નીની હત્યા બાદ પતિએ પણ કર્યો આપઘાત
આ પણ વાંચો: ભોપાલમાં કરોડોની લાલચમાં 16 વર્ષના કિશોરની હત્યા, ફેક સોશિયલ મીડિયા રીલથી રચાયું કાવતરું
આ પણ વાંચો: પપ્પાએ પહેલા મમ્મીની હત્યા કરી, પછી બહેનને પણ ન છોડીઃ 8 વર્ષના દીકરાએ ખોલ્યું રહસ્ય
