કેન્દ્ર સરકાર ના કર્મચારીઓને લીવ ટ્રાવેલ કન્સેશન (એલટીસી) હેઠળ વિદેશ યાત્રા પર જવાની સુવિધા મળી શકે છે. એક અધિકારીના જણાવ્યા મુજબ શ્રમ મંત્રાલયે આ સંબંધિત એક પ્રસ્તાવ તૈયાર કર્યો છે. આ પ્રસ્તાવ પર સંબંધિત વિભાગો જેવા કે ગૃહ, પર્યટન, નાગરિક ઉડ્ડયન વગેરે પાસેથી સૂચનો મંગાવાયા છે.
વિદેશ મંત્રાલયના આ પ્રસ્તાવમાં 5 એશિયાઈ દેશો કઝાકિસ્તાન, તુર્કમેનિસ્તાન, ઉઝબેકિસ્તાન, કીર્ગીસ્તાન, અને તઝાકિસ્તાનનો ઉલ્લેખ છે. આ દેશોમાં ભારતીયોને પર્યટન માટે પ્રોત્સાહિત કરવાનો મુખ્ય ઉદ્દેશ્ય મધ્ય એશિયાના દેશોમાં ભારતની પહોંચ વધારવાનો છે. આ પહેલા આ વર્ષે માર્ચમાં કેન્દ્ર સરકારે જાણકારી આપી હતી કે કર્મચારીઓ માટે એલટીસી હેઠળ સાર્ક દેશોમાં ફરવાને સંબંધિત એક પ્રસ્તાવને ફગાવી દેવામાં આવ્યો છે. સરકારે નિવેદનમાં આ પ્રસ્તાવને અવ્યવહારિક ગણાવ્યો હતો.
આપને જણાવી દઈએ કે એલટીસી હેઠળ કેન્દ્ર સરકાર કર્મચારીઓની રજા અને યાત્રાની ટિકિટનો ખર્ચો ભરપાઈ કરે છે. આ સુવિધાનો લાભ મોટા પ્રમાણમાં સરકારી કર્મચારીઓને મળે છે. ઉપલબ્ધ આંકડાઓ મુજબ હાલમાં કેન્દ્ર સરકારમાં 48.41 લાખ કર્મચારીઓ છે.
