Nepal Flood Dead Body Earrings Stealing Viral Video: નેપાળમાં(Nepal) વિનાશક પૂર અને ભૂસ્ખલન બાદ હજુ પણ ભયાનક સ્થિતિ યથાવત છે. આ કુદરતી આફત વચ્ચે માનવતાને શર્મસાર કરતી એક ઘટના સામે આવી છે. સોશિયલ મીડિયા પર વાયરલ થયેલા એક વીડિયોમાં કેટલાક લોકો પૂરમાં મૃત્યુ પામેલી મહિલાના મૃતદેહમાંથી સોનાની બુટ્ટી કાઢતા જોવા મળી રહ્યા છે. વીડિયો સામે આવ્યા બાદ સમગ્ર ઘટનાની ભારે ટીકા થઈ રહી છે.
મૃતદેહ સાથે અમાનવીય વર્તન
વાયરલ થયેલો વીડિયો લગભગ 41 સેકન્ડનો હોવાનું જણાવવામાં આવી રહ્યું છે. તેમાં બે લોકો એક મહિલાના મૃતદેહને લાકડાના પાટિયાની મદદથી ખસેડતા જોવા મળે છે. ત્યારબાદ તેઓ મહિલાના બંને કાનમાંથી સોનાની બુટ્ટી કાઢી લે છે. આ સમગ્ર ઘટનાને કેટલાક લોકો નજીક ઊભા રહીને જોઈ રહ્યા હતા, જ્યારે કેટલાક લોકોએ મોબાઇલ ફોનમાં વીડિયો પણ રેકોર્ડ કર્યો હતો.
વીડિયો વાયરલ થતાં પોલીસની કાર્યવાહી
વીડિયો સોશિયલ મીડિયા પર ઝડપથી ફેલાતા નેપાળ પોલીસ એક્શનમાં આવી હતી. પોલીસે તપાસ હાથ ધરીને મૃતદેહમાંથી દાગીના કાઢવાના આરોપમાં સંડોવાયેલા લોકોને ઝડપી લીધા છે. પોલીસે સોશિયલ મીડિયા દ્વારા પણ આ કાર્યવાહીની માહિતી આપી છે. ઘટનાને લઈને લોકો આરોપીઓ સામે કડક કાર્યવાહી કરવાની માંગ કરી રહ્યા છે. આ ઘટના એવા સમયે બની છે જ્યારે નેપાળ(Nepal) ભયાનક પૂર અને ભૂસ્ખલનની આફતનો સામનો કરી રહ્યું છે. અનેક વિસ્તારોમાં પાણી ફરી વળતાં મોટી સંખ્યામાં લોકોના જીવ ગયા છે અને ઘણા લોકો હજુ પણ લાપતા છે. રસ્તાઓ અને પુલોને નુકસાન થતાં બચાવ કામગીરી પણ મુશ્કેલ બની રહી છે.
मृतकको कानको मुन्द्रा चोरी गर्ने व्यक्तिहरु नियन्त्रणमा लिएको सम्बन्धमा । pic.twitter.com/pnPlnQPn9j
— Nepal Police (@NepalPoliceHQ) August 27, 2026
ભારતીય નાગરિકોને લઈને પણ ચિંતા
આ આપત્તિમાં કેટલાક ભારતીય નાગરિકો પણ ફસાયા હોવાની માહિતી સામે આવી છે. ભારત સરકાર નેપાળના(Nepal) અધિકારીઓ સાથે સતત સંપર્કમાં રહીને લાપતા ભારતીયોને શોધવા અને સુરક્ષિત રીતે બહાર લાવવાના પ્રયાસો કરી રહી છે. અસરગ્રસ્ત વિસ્તારોમાં રાહત અને બચાવ કામગીરી સતત ચાલી રહી છે. કુદરતી આફત દરમિયાન લોકો એકબીજાની મદદ કરે તેવી અપેક્ષા હોય છે. પરંતુ મૃતદેહ પરથી દાગીના ચોરવાની ઘટના અત્યંત દુઃખદ અને નિંદનીય છે. પૂરથી સર્જાયેલી મુશ્કેલીઓ વચ્ચે આવી ઘટનાઓ માનવતાની ગંભીર કસોટી બની જાય છે. હવે પોલીસ તપાસમાં આરોપીઓ સામે કાયદા મુજબ કડક કાર્યવાહી થાય છે કે નહીં તેના પર સૌની નજર રહેશે.
આ પણ વાંચો:નેપાળમાં ભીષણ પૂરનો પ્રકોપ: 160ના મોત, 133 ભારતીય શ્રદ્ધાળુઓ પણ સંપર્કવિહોણા
આ પણ વાંચો:નેપાળમાં તિબેટથી આવેલા ભયંકર પૂરથી ભારે તબાહી, 1000 લોકોના વહી જવાની આશંકા
આ પણ વાંચો:નેપાળમાં હિમાલયનું મહાસંકટ; ગ્લેશિયર તૂટવાથી સર્જાયું ભીષણ પૂર, 160થી વધુ લોકોના મોત
