Ahmedabad News: વિક્રમ સંવતના નૂતન વર્ષની શરૂઆત સાથે જ ગુજરાતનાં (New Year Gujarat) સુપ્રસિદ્ધ યાત્રાધામોમાં ભક્તિનો માહોલ છવાઈ ગયો હતો. બેસતા વર્ષના પ્રથમ દિવસે ઇષ્ટદેવનાં દર્શન કરીને નવા વર્ષની શુભ શરૂઆત કરવા રાજ્યભરમાંથી લાખો શ્રદ્ધાળુઓ અંબાજી, સોમનાથ, શામળાજી અને ડાકોર સહિતનાં મંદિરોમાં ઉમટી પડ્યા હતા. ‘જય અંબે’, ‘હર હર મહાદેવ’ અને ‘જય રણછોડ’ના નાદથી મંદિર પરિસરો ગુંજી ઊઠ્યાં હતાં. ભક્તોની ભીડને ધ્યાનમાં રાખીને વિવિધ મંદિરોમાં દર્શન અને સુરક્ષાની વ્યવસ્થા ગોઠવવામાં આવી હતી.
New Year Gujarat: અંબાજીમાં વિદ્યાર્થીઓએ ઉજ્જવળ કારકિર્દી માટે સંકલ્પ લીધા
ઉત્તર ગુજરાતના શક્તિપીઠ અંબાજી (Ambaji Temple) ખાતે વહેલી સવારની મંગળા આરતી સાથે જ ભક્તોની અવરજવર શરૂ થઈ ગઈ હતી. મા અંબાનાં દર્શન કરવા આવેલા ભક્તોએ નવા વર્ષમાં સુખ, શાંતિ અને સમૃદ્ધિની પ્રાર્થના કરી હતી. ખાસ કરીને ધોરણ 10 અને 12ના બોર્ડના વિદ્યાર્થીઓએ માતાજીના ચરણોમાં શીશ ઝુકાવી સારું પરિણામ મેળવવા, ઉજ્જવળ કારકિર્દી ઘડવા અને માતા-પિતાનું નામ રોશન કરવાનો સંકલ્પ લીધો હતો. મહિલાઓએ સ્ત્રી સન્માન, સશક્તિકરણ અને પરિવારની સુખાકારી માટે પ્રાર્થના કરી હતી. એક ભાવિક પરિવારે દર વર્ષે દિવાળી અને બેસતા વર્ષની ઉજવણી મા અંબાના સાનિધ્યમાં જ કરવાનો સંકલ્પ વ્યક્ત કર્યો હતો.
સોમનાથમાં ‘હર હર મહાદેવ’ના નાદ સાથે દર્શન
સૌરાષ્ટ્રના દરિયાકિનારે આવેલા પ્રથમ જ્યોતિર્લિંગ સોમનાથ મહાદેવ (Somnath Temple) મંદિરમાં પણ નવા વર્ષના દિવસે મોટી સંખ્યામાં શ્રદ્ધાળુઓ પહોંચ્યા હતા. ભક્તોએ ‘હર હર મહાદેવ’ના જયઘોષ સાથે પૂજા-અર્ચના કરી નવા વર્ષની શરૂઆત કરી હતી. સોમનાથ ટ્રસ્ટ દ્વારા ભક્તોની ભીડને ધ્યાનમાં રાખીને કતાર અને દર્શન વ્યવસ્થાનું આયોજન કરવામાં આવ્યું હતું, જેથી શ્રદ્ધાળુઓને સુગમ રીતે દર્શનનો લાભ મળી શકે.
શામળાજીમાં કાળિયા ઠાકરને વિશેષ શૃંગાર
અરવલ્લી જિલ્લાના પ્રસિદ્ધ યાત્રાધામ શામળાજીમાં (Shamlaji Temple) ભગવાન ગદાધર કાળિયા ઠાકરનાં દર્શન માટે વહેલી સવારથી જ ભક્તોનો પ્રવાહ જોવા મળ્યો હતો. બેસતા વર્ષની ઉજવણી નિમિત્તે ભગવાનને વિશેષ શૃંગાર ધરાવવામાં આવ્યો હતો અને વિવિધ મનોરથોનું આયોજન કરાયું હતું. ભક્તોએ ભગવાનનાં દર્શન કરી આવનારું વર્ષ સૌ માટે સુખદ અને સમૃદ્ધિમય રહે તેવી પ્રાર્થના કરી હતી.
ડાકોરમાં ભક્તોની ભીડને પગલે દર્શનનો સમય વધારાયો
ખેડા જિલ્લાના યાત્રાધામ ડાકોરમાં પણ નવા વર્ષની સવારથી જ ‘જય રણછોડ, માખણ ચોર’ના નાદ ગુંજી ઊઠ્યા હતા. રાજાધિરાજ શ્રી રણછોડરાયજીને વિશેષ શૃંગાર ધરાવવામાં આવ્યો હતો. દર્શન માટે ભક્તોની સતત વધતી ભીડને ધ્યાનમાં રાખીને ડાકોર ટેમ્પલ કમિટી દ્વારા દર્શનના સમયમાં વધારો કરવામાં આવ્યો હતો, જેથી વધુમાં વધુ શ્રદ્ધાળુઓ શાંતિપૂર્ણ રીતે ભગવાનનાં દર્શન કરી શકે. આમ, રાજ્યનાં ચારેય મુખ્ય યાત્રાધામોમાં ભક્તિ અને શ્રદ્ધા સાથે નવા વર્ષની શરૂઆત થઈ હતી.
આ પણ વાંચો: દિવાળીની રજામાં સરથાણા નેચરલ પાર્ક હાઉસફુલ: એક જ દિવસમાં 16 હજારથી વધુ પ્રવાસીઓ
આ પણ વાંચો: દિવાળીના વેકેશનમાં ગિરનાર બન્યું પ્રવાસીઓનું હોટસ્પોટ: રોપ-વે અને પગથિયાં પર ભારે ભીડ
આ પણ વાંચો: દિવાળીની રજામાં RTOએ બોલાવ્યા અરજદારોને: કચેરી બંધ, રિશિડ્યુલનો મેસેજ મોડો મળ્યો
