અમેરિકી રાષ્ટ્રપતિ જો બિડેન રશિયા-યુક્રેન સંઘર્ષ પર ભારતીય સમય અનુસાર આજે રાત્રે 11.30 વાગ્યે રાષ્ટ્રને સંબોધિત કરશે.ઉલ્લેખનીય છે કે સંબોધન દરમિયાન બિડેન રશિયા પર પ્રતિબંધોની જાહેરાત કરી શકે છે. યુક્રેન સંકટને લઈને બ્રિટને રશિયા પર પ્રતિબંધો લાદ્યા હતા. બ્રિટને રશિયાની 5 મોટી બેંકો પર પ્રતિબંધ મૂક્યો. તે જ સમયે, જર્મનીએ રશિયન પાઇપલાઇન પ્રોજેક્ટ રદ કર્યો. બીજી તરફ જાપાને પણ રશિયા પર પ્રતિબંધો લાદવાની વાત કરી છે. વાસ્તવમાં અમેરિકાએ વિશ્વને રશિયા વિરુદ્ધ એકત્ર કરવાનું શરૂ કરી દીધું છે.
બીજી તરફ રશિયાની સંસદે રાષ્ટ્રપતિ વ્લાદિમીર પુતિનને સૈન્ય કાર્યવાહી કરવાની મંજૂરી આપી દીધી છે. રશિયન મીડિયા અનુસાર એલપીઆર અને ડીપીઆરમાં મિલિટરી ઓપરેશન કરી શકાય છે. નાટોએ કહ્યું છે કે રશિયા યુક્રેન પર સંપૂર્ણ તાકાતથી હુમલો કરવાની યોજના બનાવી રહ્યું છે. આ માટે અમારા 100થી વધુ ફાઈટર જેટ એલર્ટ પર છે.
