પાકિસ્તાનના અશાંત પ્રાંત બલૂચિસ્તાનના ક્વેટામાં રવિવારે સવારે એક અત્યંત ભયાનક અને હૃદયદ્રાવક આત્મઘાતી હુમલાની ઘટના સામે આવી છે. ક્વેટાના ચમન ફાટક પાસે રેલ્વે ટ્રેક નજીક એક પેસેન્જર ટ્રેનને નિશાન બનાવીને કરવામાં આવેલા આ ફિદાયીન બ્લાસ્ટમાં ઓછામાં ઓછા ૨૩ લોકોના ઘટનાસ્થળે જ કમકમાટીભર્યા મોત નીપજ્યા છે, જ્યારે ૫૩ થી વધુ લોકો ગંભીર રીતે ઘાયલ થયા હોવાના અહેવાલ છે.

સૈન્ય કર્મચારીઓને લઈ જતી ટ્રેન પર ફિદાયીન હુમલો

પ્રાપ્ત વિગતો અનુસાર, પ્રતિબંધિત સંગઠન બલૂચ લિબરેશન આર્મી (BLA) ની ‘મજીદ બ્રિગેડ’ ના એક આત્મઘાતી હુમલાખોરે આ ભયાનક કૃત્યને અંજામ આપ્યો છે. રવિવારે સવારે જ્યારે ક્વેટા કેન્ટથી પાકિસ્તાની સૈન્ય કર્મચારીઓ (મિલીટરી પર્સનલ) ને લઈ જઈ રહેલી ‘જાફર એક્સપ્રેસ’ ટ્રેન ચમન ફાટક પાસેથી પસાર થઈ રહી હતી, ત્યારે જ ટ્રેક નજીક આ જોરદાર વિસ્ફોટ કરવામાં આવ્યો હતો. ધડાકો એટલો શક્તિશાળી હતો કે તેનો અવાજ દૂર-દૂર સુધી સંભળાયો હતો.

ટ્રેનની બોગી બળીને ખાખ, આસપાસના ઘરોને મોટું નુકસાન

આ પ્રચંડ વિસ્ફોટના કારણે જાફર એક્સપ્રેસ ટ્રેનની એક આખી બોગી (ડબ્બો) સંપૂર્ણપણે બળીને ખાખ થઈ ગઈ છે. આ ઉપરાંત રેલ્વે ટ્રેકની આસપાસ આવેલા અનેક મકાનો અને ત્યાં પાર્ક કરેલા વાહનોને પણ ભારે નુકસાન પહોંચ્યું છે. ઘટનાની જાણ થતાં જ સ્થાનીય લોકો અને ઉચ્ચ પોલીસ અધિકારીઓ કાફલા સાથે ઘટનાસ્થળે દોડી આવ્યા હતા અને તાત્કાલિક રાહત તેમજ બચાવ કામગીરી શરૂ કરી દીધી હતી. પાકિસ્તાની સુરક્ષા દળોએ હાલ સમગ્ર વિસ્તારને કોર્ડન કરી લીધો છે.

વધારે નુકસાન પહોંચાડવાનું સુનિયોજિત કાવતરું

તમામ ઈજાગ્રસ્તોને તાત્કાલિક નજીકની મિલિટરી અને સિવિલ હોસ્પિટલમાં ખસેડવામાં આવ્યા છે, જ્યાં હજુ પણ કેટલાક દર્દીઓની હાલત અત્યંત ગંભીર હોવાનું હોસ્પિટલના સૂત્રો જણાવી રહ્યા છે, જેથી મૃત્યુઆંક હજુ વધવાની આશંકા છે. બલૂચ લિબરેશન આર્મીના પ્રવક્તા જીયાંદ બલૂચે મીડિયા સમક્ષ સત્તાવાર નિવેદન જાહેર કરીને આ હુમલાની જવાબદારી સ્વીકારી છે.

પ્રાથમિક તપાસ મુજબ, આ એક સંપૂર્ણ સુનિયોજિત હુમલો હતો. ટ્રેન બરાબર જ્યારે ફાટક પાસેથી પસાર થઈ રહી હતી, ત્યારે જ બ્લાસ્ટ કરવામાં આવ્યો હતો જેથી કરીને વધુમાં વધુ જાનમાલનું નુકસાન કરી શકાય. હાલમાં પાકિસ્તાની ઈમરજન્સી ટીમો ઘટનાસ્થળે કાટમાળ હટાવવાની કામગીરી કરી રહી છે અને પોલીસ બોમ્બ બ્લાસ્ટના સચોટ કારણો તેમજ આત્મઘાતી હુમલાખોર વિશેના પુરાવા એકત્ર કરવામાં જોતરાઈ છે.