પાકિસ્તાન ક્રિકેટ ટીમે ગુરુવારે બીજી વનડેમાં ઓસ્ટ્રેલિયાને 6 વિકેટે હરાવ્યું હતું. આ સાથે વન-ડે ઈન્ટરનેશનલમાં લક્ષ્યનો પીછો કરીને પણ પોતાની સૌથી મોટી જીત નોંધાવી હતી. મેચમાં પાકિસ્તાની કેપ્ટન બાબર આઝમ અને ઈમામ ઉલ હકે શાનદાર સદી ફટકારી હતી જેના કારણે ઓસ્ટ્રેલિયાનો પરાજય થયો હતો. બંનેએ સદીની ભાગીદારી કરી હતી.
ઓસ્ટ્રેલિયાના 349 રનના લક્ષ્યાંકનો પીછો કરતા પાકિસ્તાને આઝમ (114) અને ઈમામ (106)ની ઈનિંગથી 49 ઓવરમાં ચાર વિકેટે 349 રન બનાવ્યા હતા. ઈમામે બીજી વિકેટ માટે આઝમ સાથે 111 રન અને ફખર ઝમાન (67) સાથે પ્રથમ વિકેટ માટે 118 રનની ભાગીદારી કરી હતી.
આઝમે 83 બોલમાં 11 ચોગ્ગા અને એક છગ્ગા ફટકાર્યા હતા, જ્યારે ઈમામે 97 બોલનો સામનો કરીને છ ચોગ્ગા અને ત્રણ છગ્ગા ફટકાર્યા હતા. આ જીત સાથે પાકિસ્તાને ત્રણ મેચની શ્રેણી 1-1થી બરાબર કરી લીધી છે.
બેન મેકડર્મોટની પ્રથમ સદી અને ઓપનર ટ્રેવિસ હેડ સાથેની તેની મોટી સદીની ભાગીદારીથી ઓસ્ટ્રેલિયાએ આઠ વિકેટે 348 રન બનાવ્યા હતા. તેની ચોથી વનડે રમતા, મેકડર્મોટે 108 બોલમાં 10 ચોગ્ગા અને ચાર છગ્ગાની મદદથી 104 રન બનાવ્યા, ઉપરાંત હેડ (70 બોલમાં 89 રન, છ ચોગ્ગા અને પાંચ છગ્ગા) સાથે બીજી વિકેટ માટે 162 રનની ભાગીદારી કરી.
જેના કારણે ઓસ્ટ્રેલિયાએ પાકિસ્તાનની ધરતી પર પોતાનો સૌથી મોટો સ્કોર બનાવ્યો. આ બે સિવાય માર્નસ લાબુશેને 59 જ્યારે માર્કસ સ્ટોઈનિસે 49 રન બનાવ્યા હતા. અગાઉ, ઓસ્ટ્રેલિયાએ નવેમ્બર 1998માં કરાચીમાં તેમના છેલ્લા પ્રવાસમાં પાકિસ્તાન સામે સૌથી વધુ આઠ વિકેટે 324 રન બનાવ્યા હતા.પાકિસ્તાન તરફથી ફાસ્ટ બોલર શાહીન શાહ આફ્રિદી સૌથી સફળ બોલર રહ્યો, જેણે 63 રનમાં ચાર વિકેટ લીધી. મોહમ્મદ વસીમે પણ 56 રનમાં બે વિકેટ લીધી હતી.
