શું ચીનમાં બેંકો ખરાબ થવા લાગી છે? શું ચીન બેંકિંગ કટોકટી સામે લડી રહ્યું છે? બેંકોની બહાર ટેંક કેમ તૈનાત છે? વાસ્તવમાં ત્યાં એક વીડિયો સામે આવ્યો છે, જે આ હકીકત કહી રહ્યો છે. બેંકિંગ સંકટનો સામનો કરી રહેલા ચીનમાં બેંકોએ ગ્રાહકોના ખાતા ફ્રીઝ કરી દીધા છે. જેના વિરોધમાં લોકો રસ્તા પર ઉતરી આવ્યા છે. સ્થિતિ એટલી ખરાબ છે કે સરકારે બેંકોની બહાર ટેંક તૈનાત કરવી પડી છે. મીડિયા રિપોર્ટ્સ અનુસાર, ગ્રાહકોના પૈસા ઉપાડવા પર પ્રતિબંધના કારણે ઘણી જગ્યાએ પ્રદર્શનો હિંસક બની ગયા છે. કહેવામાં આવી રહ્યું છે કે આ સંકટ એપ્રિલથી ચાલી રહ્યું છે. ચીનના હેનાન પ્રાંતમાં છેલ્લા કેટલાક દિવસોથી પોલીસ અને બેંકના ગ્રાહકો વચ્ચે ઘર્ષણ ચાલી રહ્યું છે.
લોકો રસ્તા પર ઉતરી આવ્યા બાદ ચીનની સરકારે બેંકોની બહાર ટેન્ક તૈનાત કરી દીધી છે. આ સંજોગોમાં, લોકોને 4 જૂન, 1989ની ઘટના યાદ આવવા લાગી છે, જ્યારે ચીનની સરકારે તિયાનમેન સ્ક્વેર પર વિરોધ કરી રહેલા તેના નિર્દોષ નાગરિકોની હત્યા કરી હતી. ત્યારપછી એક ચીની નાગરિક આવીને આર્મી ટેન્કની સામે ઊભો રહ્યો, જેની તસવીર ટેન્ક મેન તરીકે પ્રખ્યાત થઈ. હવે ફરી એકવાર ચીનની સરકારે તેના નાગરિકોની સામે ટેંક તૈનાત કરી છે.
ટેન્ક ઓ શા માટે તૈનાત કરવામાં આવે છે?
અહેવાલો અનુસાર, ચીન બેંકિંગ સંકટમાંથી પસાર થઈ રહ્યું છે. આટલું મોટું અર્થતંત્ર હોવા છતાં ચીનમાં બેંકો પાસે તેમના ગ્રાહકોને પરત કરવા માટે પૈસા નથી. સામાન્ય લોકોના બેંકમાંથી પૈસા ઉપાડવા પર પ્રતિબંધ છે. લોકો આ નિર્ણયથી નારાજ છે અને દરેક જગ્યાએ વિરોધ કરી રહ્યા છે. આવી સ્થિતિમાં ચીને તેના સામાન્ય નાગરિકો સામે રસ્તા પર ટેન્ક ઉતારી છે. આ ટેન્ક ચીનની બેંકોની બહાર લગાવવામાં આવી છે જેથી સામાન્ય લોકો બેંકો સુધી પહોંચી ન શકે.
બેંકે હપ્તામાં પૈસા પરત કરવાનું વચન આપ્યું હતું, પરંતુ…
આ આખી ઘટના ચીનના હેનાન પ્રાંતની જણાવવામાં આવી રહી છે, જ્યાં એપ્રિલથી લોકોને તેમના ખાતામાંથી પૈસા ઉપાડવાની મંજૂરી નથી આપવામાં આવી રહી. લોકોનો આરોપ છે કે તેમને તેમની બચત ઉપાડવાની મંજૂરી આપવામાં આવી નથી અને તેમના ખાતા ફ્રીઝ કરી દેવામાં આવ્યા છે. જેના કારણે હજારો લોકોએ બેંકની બહાર પ્રદર્શન કર્યું હતું.
બેંક ઓફ ચાઈનાના હેનાન પ્રાંતની શાખાએ કહ્યું છે કે બેંક તેના ગ્રાહકોને તેમના પૈસા હપ્તામાં પરત કરશે. પૈસાના પ્રથમ હપ્તા માટે 15 જુલાઈની તારીખ નક્કી કરવામાં આવી હતી. તારીખ આવી અને વીતી ગઈ. કોઈને તેમના પૈસા મળ્યા નથી. આ પછી, હેનાન પ્રાંતમાં પ્રદર્શનો હિંસક થવા લાગ્યા. આવી સ્થિતિમાં પીએલએ દ્વારા બેંકોની બહાર ટેન્ક તૈનાત કરવામાં આવી હતી, જેથી લોકો બેંક સુધી ન પહોંચી શકે. ચીનની પોલીસ પણ પ્રદર્શનને દબાવવાનો પ્રયાસ કરી રહી છે.
વિડિઓ જુઓ:
The moment tanks were brought in to protect a bank in China after crisis hit the country.
This is coming on the heels of an announcement by the Henan branch of the Bank of China that depositors' funds are now 'investment products' and cannot be withdrawn pic.twitter.com/2l9q7LOuVr
— Inside Sources (@InsideSources01) July 21, 2022
શું થયું કે બેંકો પૈસા પરત કરી શકતી નથી?
હવે ખરો સવાલ એ છે કે ચીનની બેંકોની હાલત એવી કેમ છે કે તેઓ લોકોના પૈસા પરત કરી શકતી નથી. એપ્રિલમાં સાઉથ ચાઈના મોર્નિંગ પોસ્ટે એક રિપોર્ટમાં ચીનમાં બેંક કૌભાંડોનો ખુલાસો કર્યો હતો. રિપોર્ટ અનુસાર ચીનની બેંકોમાંથી લગભગ 6 બિલિયન ડોલર એટલે કે 47 હજાર કરોડ રૂપિયા ગાયબ છે. બેંકોએ એપ્રિલથી પૈસા આપવાનું બંધ કરી દીધું છે. જોકે, બેંકોની દલીલ અલગ છે. બેંકોનું કહેવું છે કે તેઓ સિસ્ટમ અપગ્રેડેશનને કારણે પૈસા આપી શકતા નથી.
બીજું કારણ ચીનમાં સ્થગિત રિયલ એસ્ટેટ બિઝનેસ વિશે પણ જણાવવામાં આવી રહ્યું છે. બેંકોએ મોટા પ્રોપર્ટી ડીલરોને પૈસા આપ્યા છે, પરંતુ તેઓ પૈસા પરત કરી રહ્યા નથી. એવું કહેવામાં આવી રહ્યું છે કે શી જિનપિંગ સરકારની નજીક હોવાના કારણે બેંકો તેમની સામે કાર્યવાહી પણ કરી શકતી નથી. જેનો માર સામાન્ય ગ્રાહકોને વેઠવો પડે છે.
