કર્ણાટકમાં હિજાબ વિવાદ બાદ હવે રાજ્યની શાળાઓમાં ભગવદ ગીતા ભણાવવાને લઈને ચર્ચા છેડાઈ ગઈ છે. શનિવારે કર્ણાટકના મુખ્યમંત્રી બસવરાજ બોમાઈએ કહ્યું હતું કે શાળા શિક્ષણના અભ્યાસક્રમમાં ભગવદ ગીતાને સામેલ કરવાનો નિર્ણય ચર્ચા બાદ લેવામાં આવશે. તેમણે કહ્યું કે શાસ્ત્ર નૈતિક મૂલ્યોનું શિક્ષણ આપે છે.
બોમાઈએ કહ્યું કે ગુજરાતમાં શાળાના અભ્યાસક્રમમાં ભગવદ ગીતાનો સમાવેશ કરવામાં આવ્યો છે. અમારા મંત્રીએ કહ્યું છે કે તેઓ આ અંગે ચર્ચા કરશે. ચાલો જોઈએ શિક્ષણ વિભાગ શું વિગતો આપે છે. પત્રકારો સાથેની વાતચીત દરમિયાન મુખ્યમંત્રીએ કહ્યું કે બાળકોને શિક્ષણ અને નૈતિક મૂલ્યો આપવાનો તેમનો હેતુ છે. જ્યારે તેમને પૂછવામાં આવ્યું કે શું ભગવદ્ ગીતા બાળકોમાં નૈતિક મૂલ્યો કેળવશે, ત્યારે મુખ્યમંત્રીએ પૂછ્યું, “બીજું શું? … તમે મને કહો, જો ભગવદ ગીતા નહીં, તો તે અન્ય કયા નૈતિક મૂલ્યો આપશે?”
ભાજપ શાસિત ગુજરાતે ગુરુવારે જાહેરાત કરી હતી કે શૈક્ષણિક વર્ષ 2022-23 થી રાજ્યભરમાં ધોરણ 6 થી 12 માટે ભગવદ ગીતા શાળાના અભ્યાસક્રમનો ભાગ હશે. ગુજરાત સરકારના નિર્ણય બાદ કર્ણાટકના પ્રાથમિક અને માધ્યમિક શિક્ષણ મંત્રી બીસી નાગેશે શુક્રવારે કહ્યું હતું કે રાજ્ય સરકાર નૈતિક વિજ્ઞાન શિક્ષણના ભાગરૂપે આ અંગે નિર્ણય લેતા પહેલા શિક્ષણવિદો સાથે ચર્ચા કરશે.
મેંગલુરુમાં વિધાનસભામાં વિપક્ષના નેતા સિદ્ધારમૈયાએ કહ્યું કે કોંગ્રેસ ભગવદ ગીતા અથવા અન્ય કોઈ ધાર્મિક ગ્રંથો દ્વારા બાળકોને નૈતિક શિક્ષણ આપવાનો વિરોધ કરતી નથી. “અમે બંધારણ અને બિનસાંપ્રદાયિકતામાં માનીએ છીએ. તેમને (ભાજપ સરકાર) ભગવદ ગીતા અથવા કુરાન અથવા બાઇબલ શીખવવા દો, અમને કોઈ વાંધો નથી જો તેઓ આજની જરૂરિયાતો અનુસાર બાળકોને ગુણવત્તાયુક્ત શિક્ષણ આપે.”
સિદ્ધારમૈયાએ કહ્યું કે ભગવદ્ ગીતા, રામાયણ અને મહાભારત દરેક હિંદુ ઘરોમાં શીખવવામાં આવે છે અને આ પુસ્તકો પર આધારિત નાટકો પણ યોજવામાં આવે છે. નૈતિક શિક્ષણની જરૂર છે, પરંતુ બંધારણ વિરુદ્ધ કંઈ ન કરવું જોઈએ. સિદ્ધારમૈયાએ વધુમાં કહ્યું કે, “આપણે બહુ-સાંસ્કૃતિક સમાજ અને વૈવિધ્યસભર દેશ છીએ અને આપણે બધાએ સહિષ્ણુતા સાથે જીવવું જોઈએ.”
કર્ણાટક કોંગ્રેસના નેતા રહેમાન ખાને કહ્યું કે કર્ણાટકના શિક્ષણ મંત્રીએ ગુજરાતની તર્જ પર કહ્યું છે કે તેઓ ભગવદ ગીતાને અભ્યાસક્રમમાં સામેલ કરવા જઈ રહ્યા છે. જો તેઓ કોઈપણ ધાર્મિક ગ્રંથ શીખવવાની ભલામણ કરે તો તેમાં કંઈ ખોટું નથી, પરંતુ ભારત ઘણા ધર્મો ધરાવતો દેશ છે. દરેક ધાર્મિક પુસ્તક ધર્મ શીખવે છે, તમે એમ ન કહી શકો કે માત્ર ગીતા જ ધર્મ અને ભારતીય સંસ્કૃતિ શીખવે છે. તમામ ધાર્મિક પુસ્તકો વિદ્યાર્થીઓને ભણાવવા જોઈએ. તેમણે કહ્યું કે આમાં ભાજપનો સ્વાર્થ છે. નવી શિક્ષણ નીતિ દ્વારા અભ્યાસક્રમમાં હિન્દુત્વની નીતિ લાવવાનો પ્રયાસ કરવામાં આવી રહ્યો છે અને બીજું કંઈ નથી.
