રાજકોટ શહેરથી પાણી મુદ્દે મોટા સમાચાર સામે આવી રહ્યા છે. રાજકોટ શહેરને પાણી પુરૂ પાડતા રાજકોટની જીવાદોરી સમાન મુખ્ય ડેમોમાં 5થી 6 મહિના પાણી ચાલે એટલો જ પાણીનો જથ્થો વધ્યો હોવાનું સામે આવ્યું છે. 6 માસ બાદ રાજકોટના ડેમ ડેડ વોટરની સ્થિતિએ પહોંચી જશે. આ વર્ષે સારો વરસાદ પડ્યો છે પરંતુ ઉનાળામાં ડેમો ખાલી થવાની ભીતિ સેવાઈ રહી છે. રાજકોટના ડેમોમાંથી રોજ 18 MCFT પાણી વિતરણ કરવામાં આવી રહ્યું છે. હવે ડેમમાં આજીડેમ-1માં 900 MCFT પાણીનો જથ્થો વધ્યો હોવાનું જાણવા મળ્યું છે. ભરઉનાળામાં રાજકોટ શહેરમાં પાણીની કટોકટી સર્જાય તેવી સ્થિતિ હાલ જોવા મળી રહી છે.
રાજકોટની જીવાદોરી સમાન આજીડેમ 1 ડેમમાં હાલ 900 MCFT પાણીનો જથ્થો છે. હાલ આ ડેમમાંથી રોજ 5 MCFT પાણીનો જથ્થો ઉપાડવામાં આવી રહ્યો છે.
જ્યારે ન્યારી 1 ડેમમાં 1100 MCFT પાણીનો જથ્થો છે. આ ડેમમાંથી રોડ 5 MCFT પાણીનો જથ્થો ઉપાડવામાં આવી રહ્યો છે.
ભાદર ડેમમાં 6644 MCFT પાણીનો જથ્થો છે. . ભાદર ડેમમાંથી રોજ 3 MCFT પાણીનો જથ્થો ઉપાડવામાં આવી રહ્યો છે. ઉલ્લેખનીય છે કે રાજકોટનો આજીડેમ ખાલી થાય તો સૌની યોજના મારફત ડેમ ભરવામાં આવી શકે છે.
