ભારતમાં 1 જુલાઈથી સિંગલ યુઝ પ્લાસ્ટિક પરનાં પ્રતિબંધનો વિશ્વએ આવકાર કર્યો છે. વડાપ્રધાન નરેન્દ્ર મોદીનાં આ સાહસિક પગલા માટે ઘણા દેશો વખાણ કરી રહ્યા છે. સિંગલ-યુઝ પ્લાસ્ટિક વસ્તુઓના ઉત્પાદન, વેચાણ અને ઉપયોગ પર ભારતમાં પ્રતિબંધને આવકારતા, ભારતમાં ડેનિશ રાજદૂત ફ્રેડી સ્વેને કહ્યું, “મને લાગે છે કે આ એક ખૂબ જ મોટો વિચાર છે. ભારત દ્વારા સિંગલ યુઝ પ્લાસ્ટિક પરનો પ્રતિબંધ આ પૃથ્વી માટે એક મોટી ભેટ છે. ભારત આ દિશામાં મોટું યોગદાન આપી રહ્યું છે. એટલા માટે હું ભારતને અભિનંદન આપું છું.
નોર્વેના પ્રભારી રાજદૂત માર્ટિન બોથેમે કેન્દ્ર સરકારના નિર્ણયને આવકાર્યો હતો. તેમણે આ મહત્વપૂર્ણ પગલું ભરવા માટે વડાપ્રધાન નરેન્દ્ર મોદીને અભિનંદન પાઠવ્યા હતા. તેમણે કહ્યું, ‘હું આ મહત્વપૂર્ણ પગલાં માટે ભારત અને વડાપ્રધાન મોદીને અભિનંદન આપવા માંગુ છું. આનાથી પ્લાસ્ટિકની માત્રામાં ઘટાડો થશે. જે પૃથ્વી અને મહાસાગરોને નુકસાન પહોંચાડી રહ્યું છે. સમુદ્રમાંથી પ્લાસ્ટિકને એકત્ર કરીને રિસાયકલ કરવાની જરૂર છે. તે હવામાં ફેલાય છે અને આપણા શ્વાસમાં ઓગળી જાય છે.
નોર્વેના રાજદૂતે કહ્યું કે આ વૈશ્વિક સમસ્યા છે. ભારતે તેના પ્રયાસમાં સફળતા મેળવવી જોઈએ. તેમણે કહ્યું કે આજે અમે દિલ્હીમાં એમ્બેસી પરિસરમાં સિંગલ યુઝ પ્લાસ્ટિક વસ્તુઓને ખતમ કરવાનો નિર્ણય લીધો છે. પ્લાસ્ટિકની બોટલો સહિત કેટલીક વસ્તુઓ એવી છે જે ભારતની પ્રતિબંધોની યાદીમાં નથી.
ઉલ્લેખનીય છે કે પ્લાસ્ટિક વેસ્ટ મેનેજમેન્ટ રૂલ્સ હેઠળ આજથી ભારતમાં સિંગલ યુઝ પ્લાસ્ટિકની 19 વસ્તુઓ પર પ્રતિબંધ લગાવવામાં આવ્યો છે. તેમાં થર્મોકોલ પ્લેટ્સ, કપ, ગ્લાસ, કટલરી જેવી કે કાંટા, ચમચી, છરી, સ્ટ્રો, ટ્રે, મીઠાઈના બોક્સ પર રેપિંગ ફિલ્મ, આમંત્રણ કાર્ડ, સિગારેટના પેકેટ માટેની ફિલ્મ, પ્લાસ્ટિકના ઝંડા, બલૂન સ્ટીક્સ અને આઈસ્ક્રીમની ચમચીઓનો સમાવેશ થાય છે. ક્રીમ, કેન્ડી સ્ટીક્સ અને 100 માઇક્રોનથી ઓછા બેનરોનો સમાવેશ થાય છે.
એક અંદાજ મુજબ ભારતમાં દરરોજ 1.5 લાખ ટન કચરો પેદા થાય છે. તેમાંથી 9589 ટન પ્લાસ્ટિક કચરો છે. માત્ર 30 ટકા પ્લાસ્ટિક જ એવું છે કે તેને પુનઃઉપયોગ માટે રિસાયકલ કરી શકાય છે. 70% રીસાયકલ પ્રોસેસ થઇ શકે એવું છે. વિશ્વનાં 80 દેશોમાં સિંગલ યુઝ પ્લાસ્ટિક પર પ્રતિબંધ છે. યુનાઈટેડ નેશન્સ અનુસાર, આ દેશોએ સંપૂર્ણ અથવા આંશિક રીતે પ્રતિબંધ મૂક્યો છે. આ પ્રતિબંધ આફ્રિકાનાં 30 દેશોમાં પણ સંપૂર્ણ રીતે લાગુ છે.
આ પણ વાંચો : ગર્વ કે શરમ?: રૂ.55 કરોડથી વધુ મૂલ્યના ઇ-ચલણ થયા ઈશ્યુ : ‘વિશ્વાસ પ્રોજેક્ટ’નાં દાવાઓ મોટા
