Maharashtra News: મહારાષ્ટ્રના થાણે જિલ્લાની એક કોર્ટમાં સુરક્ષા કર્મચારીઓની ટીમ સાથે દુર્વ્યવહાર અને હુમલો કરવાના આરોપમાં પોલીસે એક અંડરટ્રાયલ કેદી અને તેના પરિવારના ત્રણ સભ્યો વિરુદ્ધ કેસ નોંધ્યો છે. શાંતિ નગર પોલીસ સ્ટેશનના એક અધિકારીએ રવિવારે જણાવ્યું હતું કે, શુક્રવારે આ ઘટના બની હતી જ્યારે આરોપીઓ સહિત અન્ડરટ્રાયલ કેદીઓના એક જૂથને આધારવાડી જેલમાંથી ભિવંડીની કોર્ટમાં સુનાવણી માટે લાવવામાં આવ્યા હતા.
કોર્ટ કાર્યવાહી પછી જ્યારે અંડરટ્રાયલ કેદીઓને જેલમાં પાછા લઈ જવામાં આવી રહ્યા હતા, ત્યારે આરોપીએ શૌચાલય જવાની પરવાનગી માંગી. અધિકારીએ કહ્યું કે પોલીસે તેને શૌચાલયમાં જવાની મંજૂરી આપી હતી પરંતુ દરવાજો ખુલ્લો રાખવા અને અંદરથી તાળું ન મારવાની સૂચના આપી હતી, જેના કારણે આરોપી ગુસ્સે થયો અને તેણે પોલીસકર્મીઓ સાથે દુર્વ્યવહાર કર્યો.
પોલીસ સાથે અથડામણ
પોલીસે જણાવ્યું હતું કે જ્યારે આરોપીને પોલીસ વાન તરફ લઈ જવામાં આવી રહ્યો હતો, ત્યારે તેણે કથિત રીતે પોલીસકર્મીઓ સાથે ફરીથી દુર્વ્યવહાર કર્યો અને ત્યાં હાજર તેના પરિવારના સભ્યોને તેમના પર હુમલો કરવા કહ્યું. અધિકારીએ જણાવ્યું કે આરોપીની પત્ની, બહેન અને અન્ય એક પુરુષ સંબંધીએ પોલીસકર્મીઓ પર હુમલો કર્યો હતો. પોલીસમાં નોંધાયેલી ફરિયાદ મુજબ, આરોપીએ પોલીસ વાનમાં ચઢતી વખતે એક મહિલા કોન્સ્ટેબલ સાથે અભદ્ર ભાષાનો ઉપયોગ કર્યો હતો અને અયોગ્ય વર્તન કર્યું હતું.
આરોપી અને તેના પરિવારના ત્રણ સભ્યો વિરુદ્ધ ભારતીય દંડ સંહિતાની વિવિધ કલમો હેઠળ કેસ નોંધવામાં આવ્યો છે. પોલીસે જણાવ્યું હતું કે મુખ્ય આરોપી હજુ પણ જેલમાં છે પરંતુ તેના પરિવારના સભ્યોની હજુ સુધી આ ઘટનાના સંદર્ભમાં ધરપકડ કરવામાં આવી નથી. એફઆઈઆરમાં એ ઉલ્લેખ નથી કે આરોપીની અગાઉ કયા આરોપો હેઠળ ધરપકડ કરવામાં આવી હતી.
આ પણ વાંચો: ગીર સોમનાથમાં ઉના પંથકનો રીઢો બુટલેગર ઝડપાયો
આ પણ વાંચો: જૂનાગઢમાં કુખ્યાત બુટલેગરને પકડવા જતા પોલીસ ઇન્સ્પેક્ટર પર કરાયો હુમલો
આ પણ વાંચો: બુટલેગરોના ઘર પર પોલીસ તંત્ર અને વીજ ટુકડીના સામુહિક દરોડા
