Pant after 2 Months: ભારતીય ટીમ હાલમાં ઓસ્ટ્રેલિયા સામે ટેસ્ટ સિરીઝ રમાઈ રહી છે અને આ દરમિયાન ઓસ્ટ્રેલિયા સામે ટેસ્ટમાં સર્વશ્રેષ્ઠ રેકોર્ડ ધરાવનાર સ્ટાર વિકેટકીપર ઋષભ પંત ટીમનો ભાગ નથી. આ દરમિયાન ઋષભ પંતે તેની કાર અકસ્માતના બે મહિના બાદ તે સમયની આખી કહાણી જણાવી અને સાથે જ ટીમ ઈન્ડિયામાં પરત ફરવાની તેની આશાઓ વિશે પણ વાત કરી. જણાવી દઈએ કે 30 ડિસેમ્બર 2022 ના રોજ વહેલી સવારે ઋષભ પંતની દિલ્હી-દેહરાદૂન હાઇવે પર કાર અકસ્માત થયો હતો. જેમાં તે ગંભીર રીતે ઘાયલ થયો હતો, ઋષભ પંત હવે રિકવરી મોડમાં છે અને તેની સ્થિતિમાં પણ સતત સુધારો થઈ રહ્યો છે.
ઋષભ પંતે કહ્યું કે તે હવે સારું અનુભવી રહ્યો છે અને તેની રિકવરી સારી ચાલી રહી છે. આશા છે કે મેડિકલ ટીમના સહયોગથી તે જલ્દી જ સંપૂર્ણ રીતે ફિટ થઈ જશે. આટલા ભયાનક કાર અકસ્માતનો સામનો કર્યા પછી બચવું કોઈના માટે આસાન નથી, આવી સ્થિતિમાં ઋષભ પંતે કહ્યું કે આ અકસ્માત પછી મને જીવન જીવવાનો પરિપ્રેક્ષ્ય મળ્યો છે. આજે હું મારા જીવનની દરેક ક્ષણને માણી રહ્યો છું, આપણે મોટા સપના પૂરા કરવામાં વ્યસ્ત છીએ પરંતુ જીવનની નાની ખુશીઓ ઉજવવાનું ભૂલી ગયા છીએ. અકસ્માત બાદ બ્રશ કરીને તડકામાં બેસીને આનંદ થાય છે. આ અકસ્માત બાદ મારા જીવનમાં ઘણો બદલાવ આવ્યો છે, મેં નાની-નાની બાબતોને સમજવાનું શરૂ કર્યું છે અને દરેક ક્ષણને માણવાનું શરૂ કર્યું છે. સ્ટાર વિકેટકીપરે કહ્યું કે મારા માટે એ કહેવું મુશ્કેલ છે કે હું ક્રિકેટને કેટલી મિસ કરી રહ્યો છું કારણ કે મારું જીવન તેની આસપાસ ફરે છે. હું તે ક્ષણની રાહ જોઈ શકતો નથી જ્યારે હું ફરીથી ક્રિકેટ રમીશ.
ઋષભ પંતે અકસ્માત પછીના જીવન અને દિનચર્યા વિશે પણ વાત કરી. તેણે કહ્યું કે મારું શિડ્યુલ ફિક્સ છે અને હું તેને ફોલો કરવાનો પ્રયાસ કરું છું. હું સવારે ઉઠું છું અને મારા ફિઝિયોથેરાપિસ્ટ સાથે વાત કરું છું અને થોડો આરામ કર્યા બાદ કેટલીક કસરતો પણ કરું છું. મારે દરરોજ તડકામાં બેસવું પડે છે, જ્યાં સુધી હું સંપૂર્ણ રીતે ચાલવા સક્ષમ ન હોઉં ત્યાં સુધી મારે આ નિત્યક્રમનું પાલન કરવું પડશે. ઋષભ પંતે ઓસ્ટ્રેલિયા ટેસ્ટ સિરીઝ, IPL 2023 વિશે વાત કરતા કહ્યું કે હું નસીબદાર છું કે મને આવા અદ્ભુત ચાહકો મળ્યા, હું દરેકની શુભેચ્છાઓ માટે આભાર માનું છું. હું ચાહકોને કહેવા માંગુ છું કે તમે ભારતીય ટીમ અને દિલ્હી કેપિટલ્સને સમર્થન આપો, હું પણ જલ્દી પરત ફરવાનો પ્રયાસ કરીશ.
જણાવી દઈએ કે ટીમ ઈન્ડિયાના સ્ટાર વિકેટ કીપર બેટ્સમેન ઋષભ પંત 30 ડિસેમ્બર 2022ના રોજ એક કાર અકસ્માતમાં ખરાબ રીતે ઘાયલ થયો હતો. તે પોતાની મર્સિડીઝ કારમાં દિલ્હીથી રૂરકી જઈ રહ્યો હતો. 25 વર્ષીય ઋષભ પંતની કાર ડિવાઈડર સાથે અથડાઈ હતી, ત્યારબાદ તેમાં આગ લાગી ગઈ હતી. ઋષભ પંત પોતે વિન્ડ સ્ક્રીન તોડીને બહાર આવ્યો હતો, તે જ સમયે સ્થાનિક લોકોએ તેને ઓળખી લીધો અને એમ્બ્યુલન્સ બોલાવીને તેને હોસ્પિટલ મોકલ્યો. ઋષભ પંતની સારવાર પહેલા રૂરકી, દેહરાદૂન અને ત્યારબાદ મુંબઈમાં ચાલી રહી હતી. BCCIએ સારવારનો સંપૂર્ણ ખર્ચ ઉઠાવ્યો હતો, તેમજ BCCIના મેડિકલ યુનિટે ઋષભ પંતની સંપૂર્ણ દેખરેખ રાખી હતી.
આ પણ વાંચો: AAP/ મનીષ સિસોદિયા અને સત્યેન્દ્ર જૈને આપ્યુ રાજીનામું, કેજરીવાલે રાજીનામાં સ્વીકાર્યા
આ પણ વાંચો: Satyendar Jain/ મનીષ સિસોદિયા સાથે સત્યેન્દ્ર જૈને પણ કેમ આપ્યું રાજીનામું? વાંચો આ અહેવાલ
