શિવસેનાના સાંસદ સંજય રાઉતે કાશ્મીરમાં સતત હિંસા અને કાશ્મીરી પંડિત રાહુલ ભટ્ટની હત્યા મામલે કેન્દ્ર સરકારને ઘેરી છે. રાઉતે કહ્યું કે કાશ્મીરી પંડિતોના ઘરે પરત ફરવાની વાત થઈ હતી. 7 વર્ષમાં કેટલા કાશ્મીરી પંડિતો વતન પાછા ફર્યા તેની ખબર નથી. પરંતુ જે લોકો ત્યાં રહેતા હતા તેમને પણ રહેવા દેવામાં આવતા નથી, તેમની પણ હત્યા કરવામાં આવી રહી છે. મને લાગે છે કે ગૃહમંત્રી અમિત શાહે આ અંગે ગંભીરતાથી વિચારવું પડશે.
શિવસેના નેતાએ વધુમાં કહ્યું કે, જો જમ્મુ-કાશ્મીરમાંથી કલમ 370 હટાવ્યા પછી પણ કાશ્મીરી પંડિતો સુરક્ષિત નથી તો તેની જવાબદારી કોની છે. જમ્મુ-કાશ્મીરમાં સર્જાઈ રહેલા આ વાતાવરણને ખતમ કરવા માટે કેન્દ્રએ કડક નિર્ણય લેવો જોઈએ. રાઉતે આવી ઘટના માટે પાકિસ્તાનને ઘેરવાની કેન્દ્રની વ્યૂહરચના પર પણ સવાલ ઉઠાવ્યા હતા. રાઉતે કહ્યું કે પાકિસ્તાન પર આંગળી ન ઉઠાવો, પરંતુ જુઓ કે તમે કાશ્મીરી પંડિતો માટે શું કરી શકો છો.
આતંકવાદીઓએ કાશ્મીરી પંડિત રાહુલ ભટ્ટની હત્યા કરી હતી
ગુરુવારે સાંજે કાશ્મીરી પંડિત રાહુલ ભટ્ટની જમ્મુ-કાશ્મીરના બડગામમાં તહેસીલ ઓફિસમાં આતંકવાદીઓએ ગોળી મારીને હત્યા કરી દીધી હતી. રાહુલ ભટ્ટ ચંદુરા તહસીલ કચેરીનો કર્મચારી હતો. આજે શુક્રવારે બાંટલાબમાં રાહુલ ભટ્ટના અંતિમ સંસ્કાર કરવામાં આવ્યા હતા. આ સિવાય પુલવામામાં શુક્રવારે સવારે આતંકીઓએ ઘરમાં ઘુસીને એક પોલીસકર્મીને ગોળી મારી દીધી હતી. આમાં તે ગંભીર રીતે ઘાયલ થયો હતો, ત્યારબાદ તેને સારવાર માટે સ્થાનિક હોસ્પિટલમાં દાખલ કરવામાં આવ્યો હતો. જ્યાં તેની સારવાર ચાલી રહી છે. હિંસાના આ મામલાઓને લઈને શિવસેનાના સાંસદ સંજય રાઉતે કેન્દ્ર સરકારને ઘેરી છે.
આ પણ વાંચો:ધર્મ, ગરીબી કે નિરક્ષરતા? ભારતમાં મુસ્લિમ વસ્તી વધવાનું સાચું કારણ શું?
