ભારતનો સાંસ્કૃતિક અને ઐતિહાસિક વારસો વૈશ્વિક સ્તરે વધુ એક નવી ઊંચાઈએ પહોંચ્યો છે. ઉત્તર પ્રદેશના પવિત્ર શહેર વારાણસી (Varanasi)નજીક આવેલું પ્રાચીન બૌદ્ધ ધામ ‘સારનાથ’ (Sarnath) હવે અધિકૃત રીતે સંયુક્ત રાષ્ટ્રની સંસ્થા યુનેસ્કો (UNESCO) ની વર્લ્ડ હેરિટેજ સાઇટ્સની યાદીમાં સ્થાન પામ્યું છે. આ મહત્વપૂર્ણ સિદ્ધિ મેળવવાની સાથે જ ભારતમાં આવેલી યુનેસ્કો હેરિટેજ સાઇટ્સની કુલ સંખ્યા વધીને 45 પર પહોંચી ગઈ છે.

જ્ઞાન પ્રાપ્તિ બાદ ભગવાન બુદ્ધે (Lord Buddha)પોતાનો પ્રથમ ધર્મ ઉપદેશ (ધમ્મચક્કપવત્તન) આ જ પવિત્ર ભૂમિ પર આપ્યો હતો. ધામેખ સ્તૂપ અને ચૌખંડી સ્તૂપ (Stupa and Chaukhandi Stupa)જેવા અદ્ભુત સ્થાપત્ય ધરાવતું સારનાથ દર વર્ષે વિશ્વભરમાંથી લાખો બૌદ્ધ શ્રદ્ધાળુઓ અને પ્રવાસીઓને આકર્ષિત કરે છે.

 ભારતની 10 પ્રાચીન અને અદ્ભુત યુનેસ્કો હેરિટેજ સાઇટ્સ

જો તમે ભારતનો ભવ્ય ઈતિહાસ, સમૃદ્ધ કળા અને કુદરતી સૌંદર્ય નજીકથી અનુભવવા માંગતા હોવ, તો યુનેસ્કોની આ 10 વિશિષ્ટ સાઇટ્સની મુલાકાત ચોક્કસ લેવી જોઈએ:

સારનાથ (ઉત્તર પ્રદેશ)

વારાણસીથી માત્ર 10 કિમીના અંતરે સ્થિત આ ધામ બૌદ્ધ ધર્મના સૌથી પવિત્ર તીર્થસ્થળોમાંનું એક ગણાય છે.

તાજમહેલ (આગ્રા, ઉત્તર પ્રદેશ)

સફેદ આરસપહાણની અજોડ કોતરણી ધરાવતો તાજમહેલ વિશ્વની સાત અજાયબીઓમાં સ્થાન ધરાવે છે અને પ્રેમનું અમર પ્રતીક છે.

કોણાર્ક સૂર્ય મંદિર (ઓડિશા)

પથ્થરોમાં કંડારેલા ભવ્ય રથ આકારનું આ મંદિર પોતાની વિશિષ્ટ સ્થાપત્યકળા માટે દુનિયાભરમાં જાણીતું છે.

સુંદરબન નેશનલ પાર્ક (પશ્ચિમ બંગાળ)

દુનિયાનું સૌથી મોટું મેન્ગ્રોવ જંગલ, જે પ્રખ્યાત રોયલ બંગાળ ટાઈગરનું કુદરતી ઘર માનવામાં આવે છે.

નંદા દેવી અને વેલી ઓફ ફ્લાવર્સ (ઉત્તરાખંડ)

ગઢવાલ હિમાલયની પર્વતમાળાઓ વચ્ચે આવેલી આ જગ્યા દુર્લભ વનસ્પતિ, રંગબેરંગી ફૂલો અને નયનરમ્ય વાતાવરણ માટે મશહૂર છે.

પશ્ચિમ ઘાટ (Western Ghats)

જૈવવિવિધતાના હોટસ્પોટ ગણાતી આ પર્વતમાળા સઘન હરિયાળી, ઝરણાં અને અનોખી પ્રાણીસૃષ્ટિનું કેન્દ્ર છે.

કાઝીરંગા નેશનલ પાર્ક (અસમ)

ઉત્તર-પૂર્વ ભારતનું આ પ્રખ્યાત રાષ્ટ્રીય ઉદ્યાન વિશ્વમાં સૌથી વધુ એક શીંગડાવાળા ભારતીય ગેંડા માટે જાણીતું છે.

રાજસ્થાનના ઐતિહાસિક પહાડી કિલ્લાઓ

ચિત્તોડગઢ, આમેર અને કુંભલગઢ જેવા ગગનચુંબી કિલ્લાઓ રજપૂત યુગની વીરતા, શૌર્ય અને સ્થાપત્યની સાક્ષી પૂરે છે.

ખજુરાહોના મંદિરો (મધ્ય પ્રદેશ)

નાગર શૈલીમાં નિર્મિત આ મંદિર સમૂહ તેની ઝીણવટભરી પથ્થરની કલાત્મક કોતરણી માટે વિશ્વવિખ્યાત છે.

અજંતા અને એલોરાની ગુફાઓ (મહારાષ્ટ્ર)

અખંડ ખડકોને કોતરીને બનાવવામાં આવેલી આ ગુફાઓ પ્રાચીન ભારતીય ચિત્રકળા અને શિલ્પકળાનો શ્રેષ્ઠ નમૂનો છે.

આ  પણ વાંચો :શું તમે માનસિક રીતે મજબૂત છો? તમારા વર્તનમાં દેખાતા આ 4 ખાસ બદલાવ આપે છે સંકેત!

આ  પણ વાંચો :ચોમાસામાં પેટની સમસ્યાઓથી છો પરેશાન? ફણસના બીજનો આ દેશી ઉકાળો આપશે રાહત

આ  પણ વાંચો :અધૂરી ઊંઘ બાદ પણ દિવસભર રહેશો ફ્રેશ: બ્રેન ફોગ અને આળસ દૂર કરવાની આસાન રીતો