Gujarat News: IDBI બેંકમાં સરકાર અને LICનો હિસ્સો વેચવાના નિર્ણય સામે કોંગ્રેસે મોરચો ખોલ્યો છે. કોંગ્રેસના નેતા શક્તિસિંહ ગોહિલે(Shaktisinh Gohil) પત્રકારોને સંબોધતા આ સમગ્ર પ્રક્રિયામાં વેલ્યુએશન, બિડિંગ અને પારદર્શિતા અંગે ગંભીર સવાલો ઉઠાવ્યા છે. તેમણે સંયુક્ત સંસદીય સમિતિ (JPC) દ્વારા તપાસ કરવાની માંગ કરી છે. સરકારે અગાઉ જણાવ્યું છે કે સમગ્ર પ્રક્રિયામાં નિયમોનું પાલન થયું છે.
શું છે સમગ્ર મામલો?
કેન્દ્રીય મંત્રીમંડળની આર્થિક બાબતોની સમિતિ (CCEA) એ IDBI બેંકમાં 60.72 ટકા હિસ્સો કેનેડાની ફેરફેક્સ ફાઇનાન્શિયલ હોલ્ડિંગ્સને આશરે 52,878 કરોડ રૂપિયામાં વેચવાની મંજૂરી આપી છે. આ વેચાણ બાદ સરકાર પાસે 15 ટકા અને LIC પાસે 19 ટકા હિસ્સો રહેશે. આ સોદા માટે રિઝર્વ બેંક ઓફ ઇન્ડિયા સહિતની નિયમનકારી મંજૂરીઓ હજુ બાકી છે.
શક્તિસિંહ ગોહિલ(Shaktisinh Gohil)નો આક્ષેપ: “બેંકના પૈસાથી જ બેંકની ખરીદી”
શક્તિસિંહ ગોહિલે દાવો કર્યો કે એક એનાલિસ્ટ રેમન જેમ્સે ફેરફેક્સના ચેરમેન અને સ્થાપક પ્રેમ વત્સા તથા કંપનીના પ્રેસિડેન્ટ પીટર સાથે કરેલી વાતચીતમાંથી જાણવા મળે છે કે IDBI બેંકના જ પૈસાથી બેંક ખરીદવામાં આવી રહી છે. આ અંગે કરોડો રૂપિયાના ગોટાળાની શક્યતા હોવાનો તેમણે આક્ષેપ કર્યો.
વેલ્યુએશન બદલવા અંગે સવાલ
ગોહિલે જણાવ્યું કે અગાઉ એસેટ્સના આધારે શેરદીઠ ભાવ 94.42 રૂપિયા ગણાયો હતો. તેમના આક્ષેપ મુજબ માત્ર બે બિડર પાસેથી બિડ મંગાવાઈ, બીજા બિડરની વિગતો સરકાર જાહેર કરતી નથી, અને બિડ ખુલ્યા પછી જૂનું વેલ્યુએશન નકારી નવું વેલ્યુએશન કરાવાયું, જે નિયમ વિરુદ્ધ છે. નવા વેલ્યુએશનમાં ભાવ ઘટાડીને 75 રૂપિયા કરાયો અને બેંક 81 રૂપિયાના ભાવે વેચાઈ. ગોહિલે બંને વેલ્યુએશન રિપોર્ટ જાહેર કરવાની માંગ કરી છે.
2003માં સંસદમાં અપાયેલા વચનનો ઉલ્લેખ
શક્તિસિંહ ગોહિલે જણાવ્યું કે 2003માં NDA સરકારના નાણામંત્રી જસવંત સિંહે લોકસભામાં 8 ઓગસ્ટ અને રાજ્યસભામાં 15 ઓગસ્ટના રોજ ખાતરી આપી હતી કે IDBI બેંકમાં સરકારનો હિસ્સો 51 ટકાથી ઓછો નહીં થાય. પત્રકારોને તે સમયના ભાષણનો વીડિયો પણ બતાવવામાં આવ્યો. તેમણે સવાલ કર્યો કે સંસદમાં અપાયેલા વચનથી વિરુદ્ધ સરકાર બેંક કેમ વેચી રહી છે.
બેંકના ઇતિહાસ અને નફાનો મુદ્દો
ગોહિલે જણાવ્યું કે IDBIની સ્થાપના 1 જુલાઈ 1964ના રોજ નાના ઉદ્યોગોને મદદ કરવા અને રોજગાર વધારવા થઈ હતી. તેમના દાવા મુજબ 2021થી 2026 દરમિયાન બેંકે 30,105 કરોડ રૂપિયાનો નફો કર્યો છે. આવી નફો કરતી બેંકને વિદેશી હાથમાં સોંપવામાં આવી રહી હોવાનો તેમણે વિરોધ કર્યો.
મિલકતો અને નોકરીઓ અંગે ચિંતા
કોંગ્રેસ(Congress) નેતાએ દાવો કર્યો કે બેંક પાસે મોટા શહેરોમાં 29 કિંમતી સાઇટ્સ છે, જેમાં હૈદરાબાદના સાઇબર સિટીમાં 50 એકર જમીન અને મુંબઈના કફ પરેડ તથા દાદર જેવા પ્રાઇમ વિસ્તારોની મિલકતોનો સમાવેશ થાય છે. તેમણે એમ પણ કહ્યું કે PSU દરજ્જો જતાં SC, ST, OBC, દિવ્યાંગો અને મહિલાઓ માટેની નોકરીઓ પર અસર પડશે.
RBI નિયમ અને RSS-સ્વદેશી જાગરણ મંચને સવાલ
ગોહિલે સવાલ કર્યો કે એક બેંકમાં હિસ્સો ધરાવનાર બીજી બેંકમાં નિયંત્રણ ન લઈ શકે તેવો RBIનો નિયમ હોવા છતાં ફેરફેક્સને બીજી બેંકમાં નિયંત્રણ ઘટાડવા માટે બે વર્ષનો સમય કેમ અપાયો, અને આવી જ સુવિધા ભારતીય બિડરોને કેમ ન અપાઈ. તેમણે RSS અને સ્વદેશી જાગરણ મંચ આ મુદ્દે મૌન કેમ છે તેવો પણ પ્રશ્ન ઉઠાવ્યો.
કોંગ્રેસની 7 માંગણીઓ
- IDBI બેંકને વિદેશી કંપનીને વેચવાની પ્રક્રિયા તાત્કાલિક અટકાવવી.
- સમગ્ર પ્રક્રિયાની JPC દ્વારા તપાસ કરાવવી.
- બંને વેલ્યુએશન રિપોર્ટ જાહેર કરવા.
- ઓફર બિડ ખુલ્યા પછી વેલ્યુએશન કેમ કરાયું તેનો ખુલાસો કરવો.
- બેંકના ઇન્કમ ટેક્સ વિવાદોમાં રાહત આપવાની યોજના અને તે બિડ પછી કેમ બની તે જણાવવું.
- બીજા બિડરની સંપૂર્ણ વિગતો જાહેર કરવી.
- વિદેશી કંપની બેંકને કયા સ્ત્રોતમાંથી અને કેવી રીતે નાણાં ચૂકવશે તેની માહિતી જાહેર કરવી.
સરકારનો પક્ષ
નાણામંત્રી નિર્મલા સીતારમણે આ વેચાણનો બચાવ કરતાં કહ્યું છે કે સરકારે યોગ્ય પ્રક્રિયાનું પાલન કર્યું છે. તેમણે જણાવ્યું કે સુધારેલા વહીવટ અને 25,000 કરોડ રૂપિયાથી વધુના રિકેપિટલાઇઝેશન દ્વારા બેંકમાં સુધારો આવ્યો છે. સીતારમણે એવો પણ આક્ષેપ કર્યો કે કોંગ્રેસ સરકારો દરમિયાન મોટા જૂથોને અપાયેલી લોનને કારણે બેંક નબળી સ્થિતિમાં NDA સરકારને મળી હતી.
આ પણ વાંચો:રાજ્યસભામાં શક્તિસિંહ ગોહિલે ઉઠાવ્યો ભાવનગરની કનેક્ટિવિટિનો મુદ્દો
આ પણ વાંચો:કોંગ્રેસના આગેવાન શક્તિસિંહ ગોહિલની રાજ્ય-કેન્દ્રને રજૂઆત, ગુજરાતીઓને બચાવો
આ પણ વાંચો:કોંગ્રેસ નેતા શક્તિસિંહ ગોહિલના ભત્રીજાએ પત્નીનું મર્ડર કરી કર્યું સુસાઈડ, માત્ર 2 મહિના પહેલા થયા હતા લગ્ન
