રાષ્ટ્રવાદી કોંગ્રેસ પાર્ટી (NCP)ના વડા શરદ પવારે અદાણી જૂથના કેસમાં JPC તપાસની માંગને સમર્થન આપ્યું નથી. શુક્રવારે (7 એપ્રિલ) એક ઈન્ટરવ્યુમાં સુપ્રીમ કોર્ટ દ્વારા રચવામાં આવેલી સમિતિનું સ્વાગત કરતા તેમણે કહ્યું કે તેની તપાસ થઈ રહી છે, તેથી સત્ય બહાર આવવાની વધુ આશા છે. કોર્ટના નિર્ણય બાદ જેપીસી તપાસનું કોઈ મહત્વ રહેશે નહીં. પવારના આ નિવેદન બાદ કોંગ્રેસે નિવેદન જાહેર કર્યું છે. કોંગ્રેસના નેતા જયરામ રમેશે કહ્યું કે આ તેમના (શરદ પવાર)ના પોતાના વિચારો હોઈ શકે છે. જયરામ રમેશે કહ્યું કે, 19 વિપક્ષી પાર્ટીઓ આ મામલે એકજૂથ છે. અમે બધા આ સમગ્ર મામલાને ખૂબ જ ગંભીર ગણીએ છીએ.” તેમણે એવો પણ દાવો કર્યો કે એનસીપી સહિત 20 વિપક્ષી પાર્ટીઓ ભાજપ વિરુદ્ધ એક સાથે છે.
NCPના વડા શરદ પવારે એક ઈન્ટરવ્યુમાં અદાણી જૂથના મુદ્દાને લઈને કહ્યું હતું કે હિંડનબર્ગ રિપોર્ટને આટલું મહત્વ કેમ આપવામાં આવી રહ્યું છે? અમે તેમના વિશે ક્યારેય સાંભળ્યું નથી, તેમની પૃષ્ઠભૂમિ શું છે. જ્યારે આપણે એવા મુદ્દા ઉઠાવીએ છીએ જે આખા દેશમાં હંગામો મચાવે છે, ત્યારે દેશની અર્થવ્યવસ્થાને તેની કિંમત ચૂકવવી પડે છે, આપણે આ બાબતોને અવગણી શકીએ નહીં. ટાર્ગેટ કરવામાં આવી હોય તેવું લાગે છે
શરદ પવારે કહ્યું કે જેપીસીની રચના ઘણા મુદ્દાઓ પર કરવામાં આવી હતી. મને યાદ છે કે એકવાર કોકા-કોલા મુદ્દે જેપીસીની રચના કરવામાં આવી હતી, જેનો હું અધ્યક્ષ હતો. એવું નથી કે જેપીસીની રચના અગાઉ થઈ ન હતી. જેપીસીની માંગ ખોટી નથી, પરંતુ માંગ કેમ કરવામાં આવી? જેપીસીની માંગણી કરવામાં આવી હતી કે ઔદ્યોગિક ગૃહની તપાસ થવી જોઈએ. તેમણે વધુમાં કહ્યું કે, જો અદાણી જૂથના મામલામાં જેપીસીની રચના થશે તો સરકાર દ્વારા મોનિટરિંગ કરવામાં આવશે, તો આવી સ્થિતિમાં સત્ય કેવી રીતે બહાર આવશે. તમને જણાવી દઈએ કે અદાણી ગ્રુપના મુદ્દાને લઈને સંસદમાં વિપક્ષી દળોએ સાથે મળીને કેન્દ્ર સરકાર પર નિશાન સાધ્યું હતું.
