Uttar Pradesh News:ઉત્તર પ્રદેશના પ્રયાગરાજમાં મહાકુંભ યોજાવા જઈ રહ્યો છે. મહાકુંભ 2025 શરૂ થવામાં હવે ગણતરીના દિવસો જ બાકી છે. 13મી જાન્યુઆરીથી કુંભ યોજાવા જઈ રહ્યો છે. પરંતુ આ પહેલા એક મોટા સારા સમાચાર આવ્યા છે. યોગી સરકાર દ્વારા મહાકુંભ નગરને જિલ્લો બનાવવામાં આવ્યો હતો અને અહીં એક અસ્થાયી હોસ્પિટલ બનાવવામાં આવી છે. આ જ હોસ્પિટલમાં રવિવારે એક મહિલાની સફળ ડિલિવરી થઈ હતી અને મહિલાએ તેના બાળકોનું નામ પણ કુંભ રાખ્યું છે.
ડોક્ટરોએ સફળ પ્રસૂતિ કરાવી
આ અસ્થાયી હોસ્પિટલમાં જન્મેલ આ પ્રથમ બાળક છે. મહાકુંભ નગરની સેન્ટ્રલ હોસ્પિટલના તબીબોએ સફળતાપૂર્વક પ્રસૂતિ કરી છે. મંઝાનપુરની રહેવાસી સોનલ તેના પતિ સાથે પ્રયાગરાજ આવી હતી. તેમના પતિ મહાકુંભમાં સફાઈ કામદાર તરીકે કામ કરે છે.
રવિવારે સોનલને પ્રસૂતિની પીડા ઉપડી અને ત્યારપછી તેનો પતિ મહાકુંભ નગરમાં બનેલી હંગામી હોસ્પિટલમાં પહોંચ્યો. અહીં ડોક્ટરોએ સફળ ઓપરેશન કર્યું અને સોનલે બાળકને જન્મ આપ્યો. ડૉ. નુપુર અને ડૉ. વર્તિકાએ સફળ પ્રસૂતિ કરાવી છે. બાળકનું વજન 2.4 કિલો હોવાનું કહેવાય છે.
માતા અને બાળક બંને સંપૂર્ણપણે સ્વસ્થ છે. બાદમાં, બંનેને સ્વરૂપ રાની હોસ્પિટલમાં રીફર કરવામાં આવ્યા હતા, જ્યાં તેઓ થોડા દિવસો સુધી દાખલ રહેશે. મહાકુંભ નગરમાં બનેલી સેન્ટ્રલ હોસ્પિટલમાં આ પ્રથમ પ્રસૂતિ છે. મીડિયા સાથે વાત કરતા સોનલના પતિ રાજાએ કહ્યું કે તેઓએ બાળકનું નામ કુંભ રાખ્યું છે. જિલ્લા વહીવટીતંત્ર દ્વારા મહાકુંભ નગરમાં 100 બેડની અસ્થાયી કેન્દ્રીય હોસ્પિટલ બનાવવામાં આવી છે. આ હોસ્પિટલ સમગ્ર કુંભ દરમિયાન કાર્યરત રહેશે.
રેલ્વેની મોટી જાહેરાત
રેલ્વે મંત્રી અશ્વિની વૈષ્ણવે કુંભ માટે 13000 ટ્રેનો દોડાવવાની જાહેરાત કરી હતી. અશ્વિની વૈષ્ણવના જણાવ્યા અનુસાર, ભારતીય રેલવે લગભગ 3000 મહાકુંભ વિશેષ ટ્રેનો દોડાવશે. 13 જાન્યુઆરીથી 26 ફેબ્રુઆરી સુધી કુંભ મેળાનું આયોજન કરવામાં આવ્યું છે. તમને જણાવી દઈએ કે કુંભ દરમિયાન લગભગ 1.5 કરોડથી 2 કરોડ ભક્તો ટ્રેન દ્વારા પ્રયાગરાજ જવાની આશા છે.
મહાકુંભ દરમિયાન મુસાફરોની સુવિધાને ધ્યાનમાં રાખીને રેલવે પ્રશાસન રોડવેઝની બસોની જેમ ટ્રેનોમાં ચેકિંગ સ્ટાફ દ્વારા મુસાફરોને અનરિઝર્વ્ડ ટિકિટ ઉપલબ્ધ કરાવશે. આ સુવિધા હેઠળ, મુસાફરોને હવે સ્ટેશનના અનરિઝર્વ્ડ ટિકિટ કાઉન્ટર પર લાંબી કતારોમાં ઉભા રહેવાની જરૂર રહેશે નહીં.
