New Delhi: દિલ્હીના જંતર-મંતર પર છેલ્લા 21 દિવસથી ભૂખ હડતાળ પર બેઠેલા સામાજિક કાર્યકર સોનમ વાંગચુકને શનિવારે સવારે પોલીસે સારવાર માટે સફદરજંગ હોસ્પિટલમાં ખસેડ્યા. વાંગચુકની તબિયત સતત નબળી પડતી હોવાના અહેવાલો વચ્ચે પોલીસે તેમને હોસ્પિટલ લઈ જતાં પ્રદર્શનકારીઓએ વિરોધ નોંધાવ્યો અને સ્થળ પર થોડો સમય હોબાળો સર્જાયો. પોલીસે પરિસ્થિતિને નિયંત્રણમાં રાખીને અન્ય પ્રદર્શનકારીઓને પણ ત્યાંથી હટાવ્યા હતા.

વાંગચુક અને તેમના સાથીઓ પેપર લીક કેસની નિષ્પક્ષ તપાસ તેમજ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ સાથે લાંબા સમયથી અનિશ્ચિત ભૂખ હડતાળ પર બેઠા છે. દરમિયાન અભિજીત દીપકે પણ નવી ભૂખ હડતાળ શરૂ કરવાની જાહેરાત કરીને આંદોલન વધુ તેજ બનવાના સંકેતો આપ્યા છે.

સોનમ વાંગચુક (Sonam Wangchuk)ની તબિયત બગડતા હોસ્પિટલમાં દાખલ

સોનમ વાંગચુક છેલ્લા ત્રણ અઠવાડિયાથી સતત ભૂખ હડતાળ (Hunger Strike) પર હોવાથી તેમની તબિયત ગંભીર રીતે પ્રભાવિત થઈ છે. ડોક્ટરોના જણાવ્યા મુજબ અત્યાર સુધીમાં તેમનું વજન લગભગ 9.5 કિલોગ્રામ જેટલું ઘટી ગયું છે. શુક્રવારે માત્ર 24 કલાકમાં જ તેમનું વજન વધુ 350 ગ્રામ ઘટીને 56.55 કિલોગ્રામ નોંધાયું હતું. આરોગ્યની સ્થિતિને ધ્યાનમાં રાખીને પોલીસે તેમને સફદરજંગ હોસ્પિટલ (Safdarjung Hospital)માં દાખલ કર્યા, જ્યાં તેમની તબીબી તપાસ અને સારવાર ચાલી રહી છે. હોસ્પિટલમાં દાખલ કરાયા બાદ પણ તેમના સમર્થકો આંદોલન ચાલુ રાખવાની વાત કરી રહ્યા છે.

દિલ્હી હાઈકોર્ટના નિર્દેશ બાદ તંત્ર એલર્ટ

વાંગચુકની સતત બગડતી તબિયતને ધ્યાનમાં રાખીને દિલ્હી હાઈકોર્ટે તાજેતરમાં કેન્દ્ર સરકાર અને દિલ્હી સરકારને મહત્વપૂર્ણ નિર્દેશ આપ્યો હતો. કોર્ટે સ્પષ્ટ જણાવ્યું હતું કે વાંગચુકનું દરરોજ મેડિકલ ચેકઅપ કરવામાં આવે અને જો જરૂરી જણાય તો તાત્કાલિક સારવાર ઉપલબ્ધ કરાવવામાં આવે. આ નિર્દેશ બાદ તેમની તબિયત પર સતત નજર રાખવામાં આવી રહી હતી. આરોગ્યમાં સુધારો ન દેખાતા અંતે તેમને હોસ્પિટલમાં દાખલ કરવાનો નિર્ણય લેવામાં આવ્યો હોવાનું માનવામાં આવે છે.

પ્રદર્શનકારીઓએ નોંધાવ્યો વિરોધ

શનિવારે સવારે જ્યારે પોલીસે વાંગચુકને જંતર-મંતર (Jantar Mantar) પરથી હોસ્પિટલ લઈ જવાની કાર્યવાહી શરૂ કરી ત્યારે સ્થળ પર હાજર પ્રદર્શનકારીઓએ તેનો વિરોધ કર્યો હતો. કેટલાક કાર્યકરોએ પોલીસ પર બળજબરી કરવાનો આરોપ લગાવ્યો અને સ્થળ પર સૂત્રોચ્ચાર કર્યા હતા. હોબાળો વધતા પોલીસે સુરક્ષાની દૃષ્ટિએ અન્ય પ્રદર્શનકારીઓને પણ ત્યાંથી હટાવ્યા હતા. આ સમગ્ર ઘટનાક્રમ બાદ જંતર-મંતર પર ચાલી રહેલા આંદોલનને લઈને ફરી રાજકીય અને સામાજિક ચર્ચા તેજ બની છે.

અભિજીત દીપકેની ભૂખ હડતાળ માટે જાહેરાત

સોનમ વાંગચુકને હોસ્પિટલમાં ખસેડાયા બાદ અભિજીત દીપકે (Abhijeet Deepake)જણાવ્યું કે તેઓ આજે જ પોતાની ભૂખ હડતાળ શરૂ કરશે. તેમણે કહ્યું કે સત્તાધીશો માને છે કે વાંગચુકને ત્યાંથી હટાવી દેવાથી આંદોલન સમાપ્ત થઈ જશે, પરંતુ એવું બનવાનું નથી. દીપકે વધુમાં જણાવ્યું કે 20 જુલાઈએ સંસદ તરફ યોજાનારી કૂચ યથાવત રહેશે અને તેની સાથે તેમની ભૂખ હડતાળ પણ ચાલુ રહેશે. તેમણે આંદોલનને વધુ વ્યાપક બનાવવાની વાત પણ કરી.

અન્ય ઉપવાસી કાર્યકરોની તબિયત પણ ચિંતાજનક

વાંગચુકની સાથે આઈસા સાથે જોડાયેલા નેહા, આમીન અને મનીષ પણ છેલ્લા 21 દિવસથી ભૂખ હડતાળ પર છે. તબીબી માહિતી મુજબ નેહાને ગંભીર હાઈપોગ્લાયકેમિયાની સમસ્યા સર્જાતા તેમને હોસ્પિટલમાં દાખલ કરવાની સલાહ આપવામાં આવી છે. બીજી તરફ આમીન અને મનીષની તબિયત પણ સતત નબળી પડી રહી હોવાનું ડોક્ટરોનું કહેવું છે. લાંબા સમયથી ચાલતી ભૂખ હડતાળને કારણે તમામ ઉપવાસી કાર્યકરોના આરોગ્ય અંગે ચિંતા વ્યક્ત કરવામાં આવી રહી છે.

આંદોલન હવે કઈ દિશામાં જશે?

સોનમ વાંગચુકને હોસ્પિટલમાં દાખલ કરવામાં આવ્યા હોવા છતાં તેમના સમર્થકો આંદોલન પાછું ખેંચવાના મૂડમાં નથી. અભિજીત દીપકની નવી ભૂખ હડતાળ અને 20 જુલાઈની સંસદ કૂચની જાહેરાતને કારણે આગામી દિવસોમાં આ સમગ્ર મુદ્દો વધુ ચર્ચામાં રહેવાની શક્યતા છે. હાલ સૌની નજર વાંગચુકના આરોગ્ય પર કેન્દ્રિત છે. સાથે જ સરકાર, પોલીસ અને પ્રદર્શનકારીઓ વચ્ચે આગળ શું સમાધાન થાય છે તે પણ મહત્વપૂર્ણ રહેશે.

આ પણ વાંચો: સોનમ વાંગચુકની ભૂખ હડતાળથી કેન્દ્ર સરકાર એક્ટીવ, દિલ્હીની 3 હોસ્પિટલોને એલર્ટ પર

આ પણ વાંચો: સોનમ વાંગચુકના આમરણ અનશન પર દિલ્હી હાઈકોર્ટ સખ્ત, કેન્દ્ર અને દિલ્હી સરકારને નોટિસ

આ પણ વાંચો: શું ‘3 ઇડિયટ્સ’ ના ફૂંગસુક વાંગડુ ખરેખર સોનમ વાંગચુક છે? આમિર ખાને કર્યો મોટો ખુલાસો