Surat News: સુરતના પાંડેસરા વિસ્તારમાં ‘મુખ્યમંત્રી માતૃશક્તિ યોજના’ (Mukhyamantri Matrushakti Yojana) હેઠળ સગર્ભા અને ધાત્રી માતાઓને વિતરણ માટે મોકલાયેલા કઠોળના જથ્થાને લઈને ગંભીર વિવાદ સામે આવ્યો છે. આંગણવાડી કેન્દ્રોમાં પહોંચેલા ચણા અને દાળના પેકેટોની તપાસ દરમિયાન તેની એક્સપાયરી મુદત પૂર્ણ થઈ ગઈ હોવાનું સામે આવતાં વહીવટી તંત્રની કામગીરી સામે અનેક સવાલો ઊભા થયા છે. પોષણ માટે આપવામાં આવતો આ જથ્થો આરોગ્ય માટે જોખમકારક બની શકે તેવી ચિંતા પણ વ્યક્ત કરવામાં આવી રહી છે.
Mukhyamantri Matrushakti Yojana: 25થી વધુ આંગણવાડીઓમાં પહોંચ્યો એક્સપાયર્ડ જથ્થો
માહિતી અનુસાર, પાંડેસરા વિસ્તારની 25થી વધુ આંગણવાડીમાં સગર્ભા અને ધાત્રી માતાઓ માટે તુવેર દાળ અને ચણાનો જથ્થો સપ્લાય કરવામાં આવ્યો હતો. આંગણવાડી કાર્યકરોએ પેકેટોની ચકાસણી કરતાં તેના પર દર્શાવેલી એક્સપાયરી તારીખ પૂર્ણ થઈ ચૂકી હોવાનું સામે આવ્યું. પોષણ માટેનો આ ખાદ્યસામાન સમયમર્યાદા પૂરી થયા બાદ વિતરણ માટે મોકલાતા ચિંતા વધી છે.
વેપારીનો આક્ષેપ: સરકારી ગોડાઉનમાંથી જ વાસી માલ મોકલાય છે
પાંડેસરાના દુકાન નંબર U-48ના સંચાલક સંજયકુમાર નટવરલાલ શાહે આક્ષેપ કર્યો છે કે એક્સપાયર્ડ જથ્થો સરકારી ગોડાઉનમાંથી જ સપ્લાય કરવામાં આવે છે. તેમનું કહેવું છે કે વેપારીઓને મળતો જથ્થો ફરજિયાત સ્વીકારવો પડે છે અને જો માલ પરત કરવાનો પ્રયાસ કરવામાં આવે તો સંબંધિત અધિકારીઓ દ્વારા તે સ્વીકારવામાં આવતો નથી.તેમણે વધુમાં જણાવ્યું કે વેપારીઓ પાસે એક્સપાયર્ડ માલ રાખવા સિવાય કોઈ વિકલ્પ રહેતો નથી, જેના કારણે સ્ટોરેજ અને અન્ય પુરવઠાની સમસ્યાઓ ઉભી થાય છે.
હજારો કિલો જથ્થો અટવાયો
વેપારીના જણાવ્યા મુજબ તેમની પાસે હાલમાં અંદાજે 2311 કિલો ચણા અને 1980 કિલો દાળનો જથ્થો પડ્યો છે. આ માલ જૂન મહિનાના અંતમાં પહોંચ્યો હતો અને તપાસ દરમિયાન સમયમર્યાદા પૂર્ણ થઈ હોવાનું જાણવા મળ્યું હતું.ચોમાસાની ઋતુમાં આટલો મોટો જથ્થો લાંબા સમય સુધી રાખવાથી તે વધુ ખરાબ થવાની શક્યતા છે. ઉપરાંત દુકાનમાં અન્ય આવશ્યક રાશન રાખવા માટે પણ પૂરતી જગ્યા ઉપલબ્ધ નથી.
અધિકારીઓને રજૂઆત છતાં કાર્યવાહી નહીં?
વેપારીનો દાવો છે કે ગોડાઉન મેનેજર અને સંબંધિત ઝોનલ અધિકારીઓને લેખિત તેમજ મૌખિક રજૂઆતો કરવામાં આવી હતી. શરૂઆતમાં માલ પરત લેવાની ખાતરી આપવામાં આવી હતી, પરંતુ અનેક રજૂઆતો છતાં હજુ સુધી કોઈ કાર્યવાહી કરવામાં આવી નથી.આંગણવાડી કાર્યકરો પણ આ જથ્થો સ્વીકારવા તૈયાર નથી, જેના કારણે સમગ્ર મામલો અટવાઈ ગયો હોવાનું જણાવવામાં આવે છે.
વિતરણ પ્રક્રિયા અંગે પણ ઊભી થઈ ચિંતા
વેપારીઓએ વધુ એક ગંભીર મુદ્દો ઉઠાવ્યો છે. નવા મહિનાના પોષણ વિતરણ દરમિયાન લાભાર્થીઓના બાયોમેટ્રિક અંગૂઠાના આધારે જો સિસ્ટમમાં જૂના જથ્થાનું પણ વિતરણ દર્શાવવામાં આવશે તો વાસ્તવમાં એક્સપાયર્ડ માલનું હિસાબ પૂર્ણ થઈ જશે. આવી સ્થિતિમાં વાસી જથ્થાના ગેરવહીવટ અથવા તેના વિતરણ અંગે ગંભીર પ્રશ્નો ઊભા થઈ શકે છે.
તપાસ અને કાર્યવાહી કરવાની માંગ
સમગ્ર ઘટનાને ધ્યાનમાં રાખીને જવાબદાર અધિકારીઓ અને સપ્લાયરો સામે નિષ્પક્ષ તપાસ કરવામાં આવે તેમજ જો બેદરકારી સાબિત થાય તો કડક કાર્યવાહી કરવામાં આવે તેવી માંગ ઉઠી રહી છે. સાથે જ સગર્ભા અને ધાત્રી માતાઓને ગુણવત્તાયુક્ત અને સલામત પોષણ મળી રહે તે માટે વિતરણ વ્યવસ્થામાં વધુ પારદર્શિતા લાવવાની જરૂરિયાત પણ વ્યક્ત કરવામાં આવી છે.
આ પણ વાંચો:મુખ્યમંત્રી Mukhyamantri Matrushakti Yojana બનાવાશે અમલી : પ્રસૂતિ પછીના 1000 અપાશે લાભ
આ પણ વાંચો:9 ઓક્ટોબર પોષણ દિવસ: PM ના જનસેવાના 24 વર્ષ…ગુજરાતમાં પોષણનું સ્તર સુધારવા અનેક યોજનાઓનું અમલીકરણ
આ પણ વાંચો:રાજ્ય સરકાર માતૃશક્તિના સમગ્રતયા ગૌરવ-સન્માન માટે સંકલ્પબદ્ધ: CM ભૂપેન્દ્ર પટેલ
