Vadodra News: શહેરને સ્માર્ટ સિટી બનાવવાના દાવાઓ વચ્ચે વોર્ડ નંબર-8માંથી (Ward 8 Vadodara) સામે આવેલા દ્રશ્યોએ તંત્રની કામગીરી પર ગંભીર સવાલો ઉભા કર્યા છે. જયઅંબે સોસાયટી અને પાયલ સોસાયટીમાં ગંદા(Vadodara Waterlogging) પાણીનો ભરાવો થતાં સ્થાનિક લોકો છેલ્લા ઘણા દિવસોથી ભારે મુશ્કેલીનો સામનો કરી રહ્યા છે. વરસાદ બાદ પાણીના યોગ્ય નિકાલની વ્યવસ્થા ન હોવાથી સમગ્ર વિસ્તાર કાદવ અને ગંદા પાણીમાં ફેરવાઈ ગયો છે.
108 એમ્બ્યુલન્સ પણ સોસાયટીમાં પ્રવેશી શકી નહીં
સ્થિતિ એટલી ગંભીર બની ગઈ હતી કે એક દર્દીને સારવાર માટે લઈ જવા આવેલી 108 એમ્બ્યુલન્સ (108 Ambulance) પણ સોસાયટીની અંદર પ્રવેશી શકી નહોતી. પરિવારજનો અને સ્થાનિકોએ દર્દીને ગંદા પાણીમાંથી પસાર કરીને મુખ્ય રસ્તા સુધી પહોંચાડ્યો, ત્યારબાદ જ એમ્બ્યુલન્સમાં ખસેડી શકાયો હતો. આ ઘટનાએ સ્થાનિકોમાં ભારે રોષ ફેલાવ્યો છે.
ગંદા પાણીથી રોજિંદું જીવન પ્રભાવિત
રહીશોનું કહેવું છે કે સોસાયટીના રસ્તાઓ પર સતત ગંદુ પાણી ભરાયેલું રહે છે, જેના કારણે બાળકો, વૃદ્ધો અને મહિલાઓને ઘર બહાર નીકળવામાં ભારે મુશ્કેલી પડી રહી છે. વાહનોની અવરજવર પણ અસરગ્રસ્ત બની છે અને અનેક સ્થળોએ દુર્ગંધ ફેલાઈ રહી છે.
રોગચાળો ફાટી નીકળવાની ભીતિ
ચોમાસાના સમયમાં ગંદા પાણીનો લાંબા સમય સુધી ભરાવો રહેતા મચ્છરોનો ઉપદ્રવ વધ્યો છે. સ્થાનિકોમાં ડેન્ગ્યુ, મેલેરિયા, ચિકનગુનિયા તેમજ અન્ય પાણીજન્ય રોગો ફેલાવાની ભીતિ વ્યક્ત કરવામાં આવી રહી છે. રહીશોએ તાત્કાલિક સફાઈ, દવા છંટકાવ અને ડ્રેનેજ વ્યવસ્થા સુધારવાની માંગ કરી છે.
રહીશોમાં ભારે રોષ, તંત્ર પાસે તાત્કાલિક કાર્યવાહી કરવાની માંગ
સ્થાનિક લોકોનું કહેવું છે કે અનેક વખત રજૂઆતો કરવા છતાં સમસ્યાનો (Drainage Issue) કાયમી ઉકેલ આવ્યો નથી. સ્માર્ટ સિટીના નામે કરોડો રૂપિયાના વિકાસના દાવા કરવામાં આવે છે, પરંતુ પ્રાથમિક સુવિધાઓ પણ ઉપલબ્ધ ન હોવાના કારણે લોકોમાં ભારે અસંતોષ જોવા મળી રહ્યો છે. રહીશોએ વડોદરા મહાનગરપાલિકાને તાત્કાલિક અસરથી પાણીના નિકાલની વ્યવસ્થા, ડ્રેનેજ લાઈનની સફાઈ અને આરોગ્ય સુરક્ષા માટે જરૂરી પગલાં લેવા અપીલ કરી છે. લોકોનું કહેવું છે કે જો સમયસર કાર્યવાહી નહીં થાય તો આગામી દિવસોમાં પરિસ્થિતિ વધુ ગંભીર બની શકે છે.
આ પણ વાંચો: દારૂની લત બની મોતનું કારણ! બે સગા દીકરાએ પિતાની હત્યા કરી, ધરમપુરની ઘટનાથી ચકચાર
આ પણ વાંચો: રાજપીપલા પોસ્ટ ઓફિસ અને પાસપોર્ટ ઓફિસને બોમ્બની ઈ-મેલ ધમકી, ડોગ સ્ક્વોડ-BDDSની તપાસ બાદ રાહત
