Valsad Voter List Error: ગુજરાતમાં સ્થાનિક સ્વરાજ્યની ચૂંટણીઓનો માહોલ ગરમાયો છે અને તંત્ર દ્વારા લોખંડી બંદોબસ્તના દાવાઓ કરવામાં આવી રહ્યા છે. પરંતુ, આ જ તંત્રની એક અત્યંત ગંભીર બેદરકારી વલસાડ જિલ્લાના ઉમરગામમાંથી સામે આવી છે. અહીં ચૂંટણી સમયે જ દેહરી બેઠકની મતદાર યાદીમાંથી એકસાથે 1400 થી વધુ મતદારોના નામ ગાયબ થઈ જતા સ્થાનિક રાજકારણમાં અને મતદારોમાં ભારે હોબાળો મચી ગયો છે.
Valsad : એકસાથે આખા વોર્ડના નામો ઉડી ગયા!
મતદાન એ લોકશાહીનો સૌથી મોટો અધિકાર છે, પરંતુ તંત્રના છબરડાના કારણે દેહરી ગ્રામ પંચાયત હેઠળ આવતા ભંડારવાડ, પતરાગઢ અને રામવાડી વિસ્તારના નાગરિકોના નામો મતદાર યાદીમાંથી સંપૂર્ણપણે ગાયબ થઈ ગયા છે. નવાઈની વાત એ છે કે કોઈ એક-બે નહીં, પરંતુ અંદાજે 1400 થી વધુ મતદારોના આખા વોર્ડના નામો જ યાદીમાંથી ગાયબ છે.
ક્યાં ગયા આ 1400 મતદારોના નામ?
જ્યારે આ મામલે તપાસ કરવામાં આવી ત્યારે એક ચોંકાવનારો ખુલાસો થયો હતો. દેહરી બેઠકના આ 1400 જેટલા મતદારોના નામ ભૂલથી અન્ય વિસ્તારની યાદીમાં ઘૂસી ગયા છે. આ તમામ નામો દહાડ-3 તાલુકા પંચાયતની મતદાર યાદીના ભાગ નંબર 4 અને 5 માં જોવા મળ્યા છે. આટલી મોટી સંખ્યામાં નામોનું સ્થળાંતર થવું એ ચૂંટણી શાખાની કામગીરી પર મોટા સવાલો ઊભા કરે છે.
ભૂલ સુધારવા ચૂંટણી તંત્રમાં મચી દોડધામ
મતદાર યાદીમાં થયેલા આ મોટા ગોટાળા બાબતે દેહરી ગ્રામ પંચાયત દ્વારા તાત્કાલિક સંબંધિત તંત્રને રજૂઆત કરવામાં આવી છે. લોકોના મતાધિકાર છીનવાઈ જવાની આ ગંભીર ફરિયાદ મળતા જ વહીવટી તંત્ર અને ચૂંટણી શાખામાં ભારે દોડધામ મચી ગઈ છે.
આ પણ વાંચો:વલસાડના નર્મદા સાંસ્કૃતિક ભવનમાં લગ્ન પ્રસંગ દરમિયાન પાર્કિંગમાં આગ, મહેમાનોમાં અફરાતફરી
આ પણ વાંચો:વલસાડમાં દારૂ ભરેલી કારમાં લાગી આગ, રાષ્ટ્રીય ધોરીમાર્ગ પર અકસ્માત
આ પણ વાંચો:વલસાડની GIDCમાં લાગી ભયંક આગ, કામદારોનો આબાદ બચાવ
