વલસાડ (Valsad) શહેરમાં એક મોટી દુર્ઘટના ટળી ગઈ હોવાની ઘટના સામે આવી છે. વલસાડના પાવર હાઉસ સામે આવેલ નર્મદા સાંસ્કૃતિક ભવન ખાતે લગ્ન પ્રસંગની ખુશીઓ વચ્ચે અચાનક આગની ઘટના સર્જાતા હાજર લોકોમાં ગભરાટ ફેલાયો હતો. થોડા જ પળોમાં આનંદમય માહોલ અફરાતફરીમાં ફેરવાઈ ગયો હતો.
સાંસ્કૃતિક ભવનના પાર્કિંગ વિસ્તારમાં આગ
માહિતી મુજબ, સાંસ્કૃતિક ભવનના પાર્કિંગ વિસ્તારમાં એર કન્ડિશનર (AC) માટે વપરાતી કોપર પાઇપની સ્લીવનો મોટો જથ્થો સંગ્રહિત રાખવામાં આવ્યો હતો. કોઈ અજાણ્યા કારણોસર આ જથ્થામાં અચાનક આગ લાગી હતી. સ્લીવ મટિરિયલ ઝડપથી સળગી ઉઠતું હોવાથી આગે થોડી જ વારમાં વિકરાળ સ્વરૂપ ધારણ કર્યું હતું. આગ સાથે ઉઠેલા ઘન કાળા ધુમાડાના ગોટેગોટા પાર્કિંગથી લઈને આસપાસના વિસ્તારમાં ફેલાઈ જતા દ્રશ્યો ચિંતાજનક બની ગયા હતા.
જાનૈયાઓ અને મહેમાનોમાં ગભરાટનો માહોલ
આગની ઘટના બનતા જ લગ્ન પ્રસંગમાં હાજર જાનૈયાઓ અને મહેમાનોમાં ગભરાટનો માહોલ સર્જાયો હતો. ઘણા લોકો સુરક્ષિત બહાર નીકળવા દોડ્યા હતા. પરિસ્થિતિ વધુ બગડે તે પહેલાં જ આયોજનકર્તાઓએ સતર્કતા દાખવી અને હોલ તાત્કાલિક ખાલી કરાવ્યો હતો. ખાસ કરીને મહિલાઓ, બાળકો અને વર-વધૂ પક્ષના સભ્યોને પ્રથમ સુરક્ષિત સ્થળે ખસેડવામાં આવ્યા હતા.
ફાયર બ્રિગેડની ટીમે આગ પર કાબૂ મેળવ્યો
ઘટનાની જાણ થતા જ વલસાડ ફાયર બ્રિગેડની ટીમ તરત જ સ્થળ પર પહોંચી હતી. ફાયરકર્મીઓએ આગને વધુ ફેલાતી અટકાવવા માટે ઝડપી કાર્યવાહી હાથ ધરી હતી. ભારે જહેમત બાદ આગ પર કાબૂ મેળવવામાં સફળતા મળી હતી. આગને કારણે પાર્કિંગ વિસ્તારમાં રાખવામાં આવેલી સામગ્રીનું નુકસાન થયું હોવાનું જાણવા મળ્યું છે, જોકે સદનસીબે કોઈ જાનહાનિ નોંધાઈ નથી.
આ ઘટનાએ લગ્ન પ્રસંગમાં હાજર લોકોને થોડા સમય માટે ભયભીત કરી દીધા હતા, પરંતુ સમયસર કરાયેલા પ્રયાસોથી મોટી દુર્ઘટના ટળી ગઈ હતી. હાલ આગ લાગવાના ચોક્કસ કારણોની તપાસ હાથ ધરવામાં આવી રહી છે.
વલસાડના (Valsad) નર્મદા સાંસ્કૃતિક ભવનમાં આગ
વલસાડ (Valsad) શહેરમાં લગ્ન પ્રસંગ દરમિયાન અચાનક આગ લાગવાની ઘટના સામે આવી છે. નર્મદા સાંસ્કૃતિક ભવનના પાર્કિંગ વિસ્તારમાં કોપર પાઇપ સ્લીવના જથ્થામાં આગ ભભૂકી ઉઠી હતી. આ ઘટનાને પગલે જાનૈયાઓ અને મહેમાનોમાં અફરાતફરીનો માહોલ સર્જાયો હતો. ફાયર બ્રિગેડની ટીમે સમયસર પહોંચી આગ પર કાબૂ મેળવી મોટી દુર્ઘટના ટાળી હતી.
આ પણ વાંચો:લગ્ન નોંધણી સુધારા બિલ પર હેમંત ખવાનું નિવેદન, દીકરીઓની સુરક્ષા માટે કાયદો જરૂરી
આ પણ વાંચો:ગુજરાતની સરકારી યુનિવર્સિટીઓમાં ભરતી નિયમોમાં ફેરફાર, ફિક્સ પગાર પરની સેવા હવે અનુભવ પર માન્ય ગણાશે
