Mahesana News: મહેસાણા જિલ્લાના કડી શહેરમાં એક જ રાતમાં 9 ઇંચ જેટલો ધોધમાર વરસાદ વરસતા સમગ્ર શહેર જળબંબાકાર બની ગયું છે. સતત વરસેલા વરસાદના કારણે મુખ્ય માર્ગો, રહેણાંક વિસ્તારો અને નીચાણવાળા વિસ્તારોમાં પાણી ભરાઈ જતાં સામાન્ય જનજીવન પર વ્યાપક અસર જોવા મળી રહી છે. વરસાદ બંધ થયાના કલાકો વીતી ગયા હોવા છતાં અનેક વિસ્તારોમાં પાણી ઓસર્યા નથી.
કડીમાં 9 ઈંચ વરસાદ (Rain), માર્ગો પર ભરાયા પાણી
કડી શહેરના તમામ ત્રણ અંડરપાસ વરસાદી પાણીમાં ગરકાવ થઈ જતાં વાહનવ્યવહારને ભારે અસર પહોંચી છે. અંડરપાસ બંધ થતાં વાહનચાલકોને લાંબા ચક્કર લગાવવા પડી રહ્યા છે. કરણનગર રોડ, સુજાતપુરા રોડ અને થોળ રોડ સહિતના મુખ્ય માર્ગો પર પણ પાણી ભરાઈ જતાં લોકો અને વાહનચાલકોને ભારે હાલાકીનો સામનો કરવો પડી રહ્યો છે.
શહેરની અનેક સોસાયટીઓ અને મકાનોમાં વરસાદી પાણી ઘૂસી જતાં રહેવાસીઓને ભારે મુશ્કેલીનો સામનો કરવો પડી રહ્યો છે. ઘરોમાં પાણી ભરાવાના કારણે ઘરવખરીને નુકસાન થવાની ભીતિ ઉભી થઈ છે, જ્યારે કેટલાક વિસ્તારોમાં લોકો ઘરની બહાર નીકળવામાં પણ મુશ્કેલી અનુભવી રહ્યા છે.
પાણી ભરાવાની સ્થિતિને પહોંચી વળવા માટે સ્થાનિક લોકો અને પાલિકા દ્વારા પાણીના નિકાલ માટે યુદ્ધના ધોરણે કામગીરી હાથ ધરવામાં આવી છે. પમ્પિંગ મશીનો અને અન્ય સાધનોની મદદથી પાણી બહાર કાઢવાના પ્રયાસો ચાલી રહ્યા છે. પાલિકાની ટીમો સતત અસરગ્રસ્ત વિસ્તારોમાં નજર રાખી રહી છે અને જ્યાં જરૂરી છે ત્યાં તાત્કાલિક કાર્યવાહી કરવામાં આવી રહી છે.
હવામાન વિભાગે આગામી દિવસોમાં પણ વરસાદની આગાહી વ્યક્ત કરી હોવાથી સ્થાનિક તંત્ર એલર્ટ મોડમાં છે. લોકોને બિનજરૂરી બહાર ન નીકળવા, પાણી ભરાયેલા રસ્તાઓ અને અંડરપાસથી દૂર રહેવા તેમજ તંત્રની સૂચનાઓનું પાલન કરવાની અપીલ કરવામાં આવી છે.
આ પણ વાંચો:મહેસાણાના કડી તાલુકાના વડાવી ગામે જમીન કૌભાંડ
આ પણ વાંચો:મહેસાણામાં મોઢેરા ચોકડી પર STએ એક્ટિવાને ટક્કર મારતા બાપનું મોત, પુત્ર ઇજાગ્રસ્ત
આ પણ વાંચો:કડીમાં ચોંકાવનારી ઘટના, મહિલાએ કિશોરને પ્રેમજાળમાં ફસાવી દુષ્કર્મ આચર્યાનો આરોપ
