Gujarat News: ગુજરાતમાં પ્રવાસનને વધુ સુરક્ષિત અને સુગમ બનાવવા માટે રાજ્ય સરકારે એક મહત્વપૂર્ણ અને આધુનિક પહેલ હાથ ધરી છે. હવે પ્રવાસીઓની સુરક્ષા માત્ર કાયદો-વ્યવસ્થા જાળવવા પૂરતી સીમિત નહીં રહે, પરંતુ તેમને માર્ગદર્શન, સહાય અને મિત્રસભર વાતાવરણ પણ ઉપલબ્ધ કરાવવામાં આવશે. રાજ્યના પોલીસ વડા ડૉ. કે.એલ.એન. રાવની અધ્યક્ષતામાં યોજાયેલી ઉચ્ચ સ્તરીય બેઠકમાં રાજ્યના મુખ્ય પર્યટન સ્થળોએ અત્યાધુનિક ટુરિસ્ટ પોલીસ સ્ટેશન (Tourist Police Station) સ્થાપવાની યોજના પર મોહર લાગી છે. આ પગલું ગુજરાતને આંતરરાષ્ટ્રીય સ્તરે વધુ આકર્ષક બનાવવામાં મદદરૂપ બનશે.
પ્રથમ તબક્કે ત્રણ મુખ્ય જિલ્લાઓનો સમાવેશ
આ પહેલના પ્રથમ તબક્કામાં રાજ્યના ત્રણ મહત્વપૂર્ણ પર્યટન જિલ્લાઓ પસંદ કરવામાં આવ્યા છે:
ગીર સોમનાથ
દેવભૂમિ દ્વારકા
ડાંગ
આ વિસ્તારોમાં દર વર્ષે મોટી સંખ્યામાં દેશ-વિદેશના પ્રવાસીઓ આવે છે, જેને ધ્યાનમાં રાખીને અહીં સુરક્ષા અને સુવિધા વધારવાનો નિર્ણય લેવાયો છે.
ટુરિસ્ટ પોલીસ (Tourist Police Station)ની ખાસિયતો શું હશે?
નવી ટુરિસ્ટ પોલીસ (Tourist Police Station) વ્યવસ્થા પરંપરાગત પોલીસિંગથી અલગ અને વધુ ટેક્નોલોજી આધારિત હશે.
વિશેષ ઓળખ:
ટુરિસ્ટ પોલીસ (Tourist Police Station) માટે ખાસ ડિઝાઇન કરાયેલ યુનિફોર્મ અને વાહનો પર અલગ લોગો રહેશે, જેથી પ્રવાસીઓ તેમને સરળતાથી ઓળખી શકે.
ડિજિટલ સુવિધાઓ:
એક સેન્ટ્રલ ઇન્ટરેક્ટિવ મોબાઇલ એપ્લિકેશન લોન્ચ કરવામાં આવશે, જેમાં પ્રવાસીઓને એક જ ક્લિક પર માહિતી, માર્ગદર્શન અને ઇમરજન્સી મદદ મળી શકશે.
હેલ્પ ડેસ્ક અને કિયોસ્ક:
પ્રવાસન સ્થળોએ આધુનિક કન્ટેનર આધારિત હેલ્પ ડેસ્ક અને કિયોસ્ક સ્થાપવામાં આવશે, જ્યાંથી તાત્કાલિક સહાય મળી રહેશે.
પહેલ પાછળનો મુખ્ય હેતુ
રાજ્ય પોલીસ વડા ડૉ. રાવના જણાવ્યા મુજબ, આ પહેલનો મુખ્ય હેતુ ગુજરાતમાં આવતા દરેક પ્રવાસીને સુરક્ષિત, સુખદ અને યાદગાર અનુભવ આપવાનો છે. આ માટે હાલની પોલીસ ચોકીઓને અપગ્રેડ કરાશે, સાથે જ પૂરતા સ્ટાફ અને આધુનિક વાહનોની વ્યવસ્થા પણ કરવામાં આવશે.
આ પણ વાંચો:પૃથ્વી પરનું સ્વર્ગ! જાણો શ્રેષ્ઠ પ્રવાસનના સ્થળો, મુલાકાતનો યોગ્ય સમય
આ પણ વાંચો:હર્ષ સંઘવીએ ગુજરાતના પ્રવાસન સ્થળો માટે રૂ. ૨૮.૬૮ કરોડ મંજૂર કર્યા, જાણો કયા યાત્રાધામોનો થશે વિકાસ
