Kandla Port Godown Collapse: એશિયાના સૌથી મોટા અને વ્યસ્ત પોર્ટ પૈકીના એક એવા કચ્છના કંડલા (દીનદયાળ) પોર્ટ પરથી એક ચોંકાવનારા સમાચાર સામે આવ્યા છે. અહીં પોર્ટ વિસ્તારમાં આવેલું SRW કોર્પોરેશનનું આશરે 40 વર્ષ જૂનું એક વિશાળ ગોડાઉન અચાનક પત્તાના મહેલની જેમ ધરાશાયી થઈ ગયું છે. વિશાળકાય ગોડાઉન અચાનક તૂટી પડવાની આ ઘટનાને પગલે સમગ્ર પોર્ટ વિસ્તારમાં ભારે દોડધામ અને અફરાતફરીનો માહોલ સર્જાઈ ગયો હતો.
Kandla : કાટમાળ નીચે લોડર અને હિટાચી મશીનો દટાયા
પ્રાપ્ત પ્રાથમિક વિગતો અનુસાર, કંડલા પોર્ટની અંદર કાર્યરત SRW કોર્પોરેશનનું આ ગોડાઉન અચાનક જમીનદોસ્ત થઈ જતા તેની અંદર પડેલા ભારે વાહનો અને મશીનરી તેનો શિકાર બન્યા છે. ધરાશાયી થયેલા માળખા અને કાટમાળ નીચે લોડર તેમજ હિટાચી જેવા તોતિંગ મશીનો દટાઈ ગયા હોવાની વિગતો સામે આવી રહી છે. ગોડાઉન તૂટવાથી કંપનીને લાખો રૂપિયાનું મોટું આર્થિક નુકસાન પહોંચ્યું હોવાનો અંદાજ છે.
પોલીસ અને બચાવ ટીમ ઘટનાસ્થળે
ગોડાઉન ધરાશાયી થવાની ઘટનાની જાણ થતાં જ સ્થાનિક પોલીસ કાફલો અને બચાવ કામગીરીની ટીમો (Rescue Teams) તાત્કાલિક ઘટનાસ્થળે દોડી આવી હતી. રાહતના સમાચાર એ છે કે, આ ભયંકર દુર્ઘટનામાં સદનસીબે અત્યાર સુધી કોઈ જાનહાનિ (મૃત્યુ કે ગંભીર ઈજા) થઈ હોવાના અહેવાલ નથી. જોકે, કાટમાળ હટાવ્યા બાદ જ વાસ્તવિક સ્થિતિનો ચોક્કસ તાગ મેળવી શકાશે.
જર્જરિત ઈમારતોની સલામતી સામે ઉઠ્યા સવાલો
આ ઘટના બાદ કંડલા પોર્ટ વિસ્તારમાં કાર્યરત જૂની ઔદ્યોગિક ઈમારતો અને ગોડાઉનની સલામતીને લઈને ચર્ચાઓએ જોર પકડ્યું છે. લોકોમાં એવી ચર્ચા ચાલી રહી છે કે, 40 વર્ષ જૂનું આ ગોડાઉન પહેલેથી જ અત્યંત જર્જરિત હાલતમાં હતું, તો પછી કંપની દ્વારા તેની મરામત કેમ ન કરવામાં આવી? જો દુર્ઘટના સમયે કામદારો ગોડાઉનની અંદર કે આસપાસ હાજર હોત તો કેટલો મોટો જીવલેણ અકસ્માત સર્જાઈ શક્યો હોત?
