Ahmedabad Motera Kidnapping Case: અમદાવાદ શહેરના મોટેરા વિસ્તારમાં ધોળા દિવસે કાયદો અને વ્યવસ્થાના લીરેલીરા ઉડાવતી એક અત્યંત આઘાતજનક અને સનસનાટીભરી ઘટના સામે આવી છે. મોટેરામાં એક પરિણીત યુવતીનું તેના જ ઘરમાં ઘૂસીને કેટલાક અજાણ્યા શખસો દ્વારા ફિલ્મી ઢબે અપહરણ (Kidnapping) કરવામાં આવ્યું છે. અપહરણકારો યુવતીને બળજબરીપૂર્વક કારમાં ઢસડીને લઈ જતા હોવાના સીસીટીવી (CCTV) ફૂટેજ સોશિયલ મીડિયા પર વાયરલ થતાં સમગ્ર શહેરમાં ભારે ચકચાર મચી ગઈ છે.

Ahmedabad : સાસુને ધક્કો મારી ધમકી આપી

મળતી સત્તાવાર વિગતો મુજબ, ૨૭મી મેના રોજ બપોરના સમયે મોટેરાના ભીલવાસ વિસ્તારમાં રહેતી કોમલ નામની પરિણીત યુવતી પોતાના ઘરે હાજર હતી. આ દરમિયાન એક યુવતી અને ત્રણ યુવકો સહિત કુલ ચાર શખસો અચાનક તેમના ઘરમાં ઘૂસી આવ્યા હતા. આ શખસોએ કોમલને પકડી લીધી હતી અને બળજબરીપૂર્વક ઘરની બહાર ખેંચી જવાનું શરૂ કર્યું હતું. પીડિતા પોતાને બચાવવા માટે સતત બૂમાબૂમ અને ચીસાચીસ કરતી રહી, પરંતુ અપહરણકારો તેને ઘસડીને બહાર ઉભેલી ક્રેટા કાર તરફ લઈ ગયા હતા.

આ ભયાનક દ્રશ્ય જોઈને ઘરમાં હાજર કોમલના સાસુ શારદાબહેન પોતાની વહુને બચાવવા માટે વચ્ચે પડ્યા હતા. પરંતુ ક્રૂર અપહરણકારોએ સાસુને જોરદાર ધક્કો મારી નીચે પછાડી દીધા હતા અને ‘વચ્ચે પડશો તો જાનથી મારી નાખીશું’ તેવી ખુલ્લી ધમકી આપી યુવતીને જબરદસ્તીથી કારમાં બેસાડી પૂરઝડપે ફરાર થઈ ગયા હતા. ઉલ્લેખનીય છે કે ઘટના સમયે કોમલના પતિ કમલેશ નાઈ નોકરી પર ગયેલા હતા.

પૂર્વ પ્રેમીના પાગલપન પર આશંકા

પોલીસની પ્રાથમિક તપાસ અને કૌટુંબિક વિગતો અનુસાર, ભોગ બનનાર કોમલના આ બીજા લગ્ન છે. અગાઉ તેના લગ્ન બંટી નામના યુવક સાથે થયા હતા, પરંતુ મનમેળ ન રહેતા બંનેના કાયદેસર છૂટાછેડા થઈ ગયા હતા. જોકે, આ સનસનાટીભર્યા અપહરણ પાછળ કોમલનો ગેવર ગુર્જન નામના અન્ય એક યુવક સાથેનો ભૂતકાળનો પ્રેમસંબંધ જવાબદાર હોવાની પ્રબળ આશંકા સેવાઈ રહી છે.

પરિવારજનોએ પોલીસ સમક્ષ ગંભીર આરોપ લગાવ્યો છે કે, કોમલના બીજા લગ્ન થઈ ગયા હોવા છતાં તેનો પૂર્વ પ્રેમી ગેવર ગુર્જન તેને સતત હેરાન પરેશાન કરતો હતો. તે વારંવાર કોમલનો સંપર્ક કરવાનો પ્રયાસ કરીને માનસિક ત્રાસ આપતો હતો. આ એકતરફી પાગલપન અને પ્રેમની અદાવતમાં જ ગેવરે પોતાના ભાડૂતી સાગરીતો સાથે મળીને ધોળા દિવસે આ અપહરણનું આખું કાવતરું ઘડ્યું હોવાનો આક્ષેપ છે.

કાર નંબરના આધારે તપાસ તેજ કરી

આ ચકચારી વારદાત બાદ ભોગ બનનાર યુવતીના સાસુ શારદાબહેને તાત્કાલિક સાબરમતી પોલીસ મથકે (Sabarmati Police Station) પહોંચીને ચાર આરોપીઓ વિરુદ્ધ નામજોગ અપહરણ અને ધમકીની ફરિયાદ નોંધાવી છે. સાબરમતી પોલીસે ગુનો દાખલ કરીને ઘટનાસ્થળ તેમજ આસપાસના મુખ્ય માર્ગોના સીસીટીવી ફૂટેજ મેળવી લીધા છે. પોલીસે અપહરણમાં વપરાયેલી શંકાસ્પદ ક્રેટા કારના નંબર પ્લેટના આધારે અલગ-અલગ ટીમો બનાવીને યુવતીને હેમખેમ છોડાવવા અને આરોપીઓને ઝડપી પાડવા માટે ચક્રો ગતિમાન કર્યા છે.

આ પણ વાંચો: અમદાવાદના વસ્ત્રાલમાં અસામાજિક તત્વોનો આતંક: ભજન કરતી મહિલાઓ પર હુમલો…

આ પણ વાંચો: અમદાવાદમાં અસામાજિક તત્વો બેફામ, જાહેર રસ્તા પર મહિલાને માર માર્યો

આ પણ વાંચો: અમદાવાદમાં મંદિર પરિસરમાં અસામાજિક તત્વોનો અડ્ડો?દારૂ ગાંજાની મહેફિલ