Rajkot News: રાજકોટ નજીક આવેલી જાણીતી બાલાજી વેફર્સ (Balaji Wafers) ફેક્ટરીમાંથી નીકળતા કથિત પ્રદૂષિત પાણીના મુદ્દે આસપાસના ગ્રામ્ય વિસ્તારોમાં ભારે અસંતોષ જોવા મળી રહ્યો છે. સ્થાનિક ગ્રામજનો અને આગેવાનોના આક્ષેપ મુજબ ફેક્ટરીમાંથી છોડવામાં આવતું ગંદુ પાણી આસપાસના જળસ્ત્રોતો, ખેતીની જમીન અને પશુપાલન પર ગંભીર અસર પહોંચાડી રહ્યું છે.
Balaji Wafers: 7 ગામો પ્રદૂષણથી પરેશાન
ગ્રામજનોના જણાવ્યા અનુસાર વડવાજડી સહિતના અનેક ગામોમાં છેલ્લા કેટલાક સમયથી પાણી પ્રદૂષણની સમસ્યા વધી રહી છે. વડવાજડી, વીરડા વાજડી, વાજડી ગઢ, વેજગામ, રોણકી, ઈશ્વરીયા અને હરિપર જેવા ગામોના લોકોનો દાવો છે કે ફેક્ટરી (Balaji Wafers)માંથી છોડાતા પાણીના કારણે સ્થાનિક બોરવેલ અને સિંચાઈ માટેના પાણીની ગુણવત્તા પર અસર પડી રહી છે.
સ્થાનિક ખેડૂતોનું કહેવું છે કે પ્રદૂષિત પાણીના કારણે જમીનની ફળદ્રુપતા ઘટી રહી છે અને ખેતીના ઉત્પાદન પર પણ નકારાત્મક અસર જોવા મળી રહી છે. ઘણા ખેડૂતોને આર્થિક નુકસાનનો સામનો કરવો પડી રહ્યો હોવાનો પણ આક્ષેપ કરવામાં આવ્યો છે.
પશુપાલકો દ્વારા પણ ચિંતા વ્યક્ત કરવામાં આવી છે. ગ્રામજનોનું કહેવું છે કે પશુઓ માટે ઉપલબ્ધ પાણીના સ્ત્રોતો પ્રદૂષિત થતા પશુઓના સ્વાસ્થ્ય પર જોખમ ઊભું થયું છે. કેટલાક લોકોએ રોગચાળો ફેલાવાની ભીતિ પણ વ્યક્ત કરી છે.
આ સમગ્ર મુદ્દે સ્થાનિક આગેવાનો અને પૂર્વ સરપંચોએ સત્તાધીશો તેમજ સંબંધિત વિભાગો સામે નારાજગી વ્યક્ત કરી છે. ગ્રામજનોનું કહેવું છે કે સમસ્યાના નિરાકરણ માટે અનેક વખત રજૂઆતો કરવામાં આવી હોવા છતાં પૂરતી કાર્યવાહી જોવા મળી નથી.
ગુજરાત પ્રદૂષણ નિયંત્રણ બોર્ડ (GPCB) અને અન્ય જવાબદાર તંત્ર દ્વારા સમગ્ર મામલે તપાસ કરીને યોગ્ય પગલાં લેવામાં આવે તેવી માંગ ઉઠી છે. ગ્રામજનોનું માનવું છે કે જો સમયસર અસરકારક પગલાં નહીં લેવાય તો ભવિષ્યમાં પર્યાવરણ અને જાહેર સ્વાસ્થ્ય માટે વધુ ગંભીર સ્થિતિ સર્જાઈ શકે છે.
હાલ આ મુદ્દો સમગ્ર વિસ્તારમાં ચર્ચાનો વિષય બન્યો છે અને ગ્રામજનો દ્વારા પ્રદૂષણ રોકવા માટે તાત્કાલિક પગલાં લેવાની માંગ કરવામાં આવી રહી છે.
આ પણ વાંચો:બારડોલી પાસે બાલાજી વેફર્સના ગોડાઉનમાં આગ લાગતા 11 ટ્રક બળીને ખાખ,કોઇ જાનહાનિ નહીં
આ પણ વાંચો:શ્રીમંત પરિવારના બાળકો સામે ક્રિપ્ટો ફ્રોડને લઈને FIR, બાલાજી વેફર્સના પરિજનો પણ સામેલ
આ પણ વાંચો:સાબરકાંઠામાં બાલાજી વેફર્સની ફેક્ટરીમાં આગ…નવી બની રહી હતી ફેક્ટરી..મેજર કોલ જાહેર કરાયો
