Delhi News: દિલ્હી-એનસીઆરના લોકો છેલ્લા કેટલાક દિવસોથી ભીષણ ગરમી અને ઉકળાટનો સામનો કરી રહ્યા હતા, ત્યારે બુધવારે મોડી રાત્રે બદલાયેલા હવામાનને કારણે લોકોને મોટી રાહત મળી હતી. રાજધાની દિલ્હી અને આસપાસના વિસ્તારોમાં તેજ પવન સાથે વરસાદ શરૂ થતાં તાપમાનમાં ઘટાડો નોંધાયો હતો. વરસાદ દરમિયાન આકાશમાં વીજળીના ચમકારા પણ જોવા મળ્યા હતા.
મંગળવારે દિવસભર દિલ્હીમાં કાળઝાળ ગરમી અને ભારે ઉકળાટનો માહોલ રહ્યો હતો. સવારે જ તાપમાન સામાન્ય કરતાં વધુ નોંધાયું હતું, જ્યારે બપોર બાદ ગરમીનો પ્રકોપ વધુ વધ્યો હતો. દિવસ દરમિયાન મહત્તમ તાપમાન 43.5 ડિગ્રી સેલ્સિયસ સુધી પહોંચ્યું હતું, જ્યારે કેટલાક વિસ્તારોમાં તે 44 ડિગ્રીથી પણ વધુ નોંધાયું હતું.
સાંજ પડતા હવામાનમાં અચાનક ફેરફાર જોવા મળ્યો હતો. હવામાન વિભાગના જણાવ્યા અનુસાર મધ્ય પાકિસ્તાન ઉપર સર્જાયેલા સાયક્લોનિક સર્ક્યુલેશન અને અરબી સમુદ્ર તરફથી આવી રહેલી ભેજવાળી હવાઓના પ્રભાવને કારણે દિલ્હીમાં ધૂળભરી આંધી ફૂંકાઈ હતી. અનેક વિસ્તારોમાં પવનની ઝડપ 100 કિમી પ્રતિ કલાકથી પણ વધુ નોંધાઈ હતી, જ્યારે પાલમ વિસ્તારમાં પવનની ગતિ 120 કિમી પ્રતિ કલાક સુધી પહોંચી હતી.
આંધીએ થોડા સમય માટે જોરદાર અસર કરી હતી, જેના કારણે અનેક વિસ્તારોમાં ધૂળના ગોટેગોટા ઉડ્યા હતા. જોકે શરૂઆતમાં તાપમાનમાં ખાસ ઘટાડો નોંધાયો ન હતો, પરંતુ મોડી રાત્રે શરૂ થયેલા હળવા વરસાદથી વાતાવરણમાં ઠંડક પ્રસરી હતી અને લોકોને ગરમીમાંથી રાહત મળી હતી.
હવામાન વિભાગે આગામી દિવસોમાં પણ દિલ્હી-એનસીઆરમાં વાદળછાયું વાતાવરણ રહેવાની શક્યતા વ્યક્ત કરી છે. ગુરુવારે તેજ પવન અને વરસાદની આગાહી સાથે ઓરેન્જ એલર્ટ જાહેર કરવામાં આવ્યું છે, જ્યારે શુક્રવાર માટે યેલો એલર્ટ જાહેર કરાયું છે. આગામી બે દિવસ દરમિયાન તાપમાનમાં ઘટાડો થવાની શક્યતા વ્યક્ત કરવામાં આવી છે.
