Morbi News: મોરબી શહેરમાં સબસીડીયુક્ત યુરિયા ખાતરની કથિત ગેરકાયદે (Morbi Urea Fertilizer Scam) હેરાફેરી અને સંગ્રહ સામે SOG પોલીસે મોટી કાર્યવાહી કરી છે. રાજપર રોડ પર આવેલા એક ગોડાઉનમાં દરોડો પાડીને પોલીસે યુરિયા ખાતરની આશરે 1272 બેગનો જથ્થો ઝડપી પાડ્યો છે. કાર્યવાહી બાદ કૃષિ વિભાગે ગોડાઉનને સીલ કરી વધુ તપાસ હાથ ધરી છે.

Morbi Urea Fertilizer Scam: રાજપર રોડના ગોડાઉનમાં SOGનો દરોડો

મોરબી SOGની ટીમને મળેલી ચોક્કસ બાતમીના આધારે રાજપર રોડ વિસ્તારમાં આવેલા ગોડાઉનમાં ( Morbi SOG Raid) તપાસ હાથ ધરવામાં આવી હતી. તપાસ દરમિયાન ગોડાઉનમાંથી મોટા પ્રમાણમાં યુરિયા ખાતરની બેગ મળી આવતા પોલીસ અધિકારીઓ પણ ચોંકી ઊઠ્યા હતા.પ્રાથમિક ગણતરીમાં આશરે 1272 બેગ યુરિયા ખાતરનો જથ્થો મળી આવ્યો હોવાનું સામે આવ્યું છે. આટલા મોટા પ્રમાણમાં ખાતરનો જથ્થો એક જ સ્થળેથી મળી આવતાં સમગ્ર મામલો ચર્ચામાં આવ્યો છે.

‘જય એગ્રો’નું ગોડાઉન સીલ

પોલીસની કાર્યવાહી દરમિયાન સામે આવેલી માહિતીના આધારે આ ગોડાઉન ‘જય એગ્રો’ નામની (Jay Agro) પેઢી સાથે સંકળાયેલું હોવાનું જાણવા મળ્યું છે. મામલાની ગંભીરતાને ધ્યાનમાં રાખીને કૃષિ વિભાગના અધિકારીઓને પણ જાણ કરવામાં આવી હતી.કૃષિ વિભાગની ટીમ સ્થળ પર પહોંચ્યા બાદ મળેલા ખાતરના જથ્થાની ચકાસણી હાથ ધરવામાં આવી હતી. ત્યારબાદ તમામ 1272 બેગને કબજામાં લઈ ગોડાઉન સીલ કરવાની કાર્યવાહી કરવામાં આવી છે.

સબસીડીયુક્ત ખાતરનો બિનખેતી હેતુ માટે ઉપયોગ?

આ મામલે સૌથી મોટો સવાલ એ છે કે ખેડૂતોને રાહત દરે ઉપલબ્ધ કરાવવામાં આવતું સબસીડીયુક્ત યુરિયા ખાતર આટલા મોટા પ્રમાણમાં ગોડાઉનમાં કેવી રીતે પહોંચ્યું? પ્રાથમિક તબક્કે આ ખાતરનો ખેતી સિવાયના એટલે કે ઔદ્યોગિક અથવા કોમર્શિયલ ઉપયોગ માટે ડાયવર્ઝન કરવામાં આવ્યું હોવાની આશંકા વ્યક્ત કરવામાં આવી રહી છે. જોકે, ખાતરનો જથ્થો કઈ રીતે મેળવવામાં આવ્યો અને તેનો વાસ્તવિક ઉપયોગ ક્યાં થવાનો હતો તે તપાસ પૂર્ણ થયા બાદ જ સ્પષ્ટ થશે.

બોગસ ખરીદી થઈ હતી કે કેમ?

તપાસ દરમિયાન પોલીસ અને કૃષિ વિભાગ દ્વારા એ દિશામાં પણ તપાસ કરવામાં આવી રહી છે કે ખેડૂતોના નામે નિયમિત ખરીદી દર્શાવીને યુરિયાનો જથ્થો ગોડાઉનમાં એકત્રિત કરવામાં આવ્યો હતો કે કેમ.આ માટે ખાતરની ખરીદી-વેચાણના રેકોર્ડ, બિલો, સ્ટોક રજિસ્ટર તથા સંબંધિત દસ્તાવેજોની ચકાસણી કરવામાં આવી રહી છે.

સપ્લાય ચેઇન સુધી તપાસ લંબાવાશે

મોરબી SOG અને કૃષિ વિભાગે સમગ્ર મામલાની ઊંડાણપૂર્વક તપાસ શરૂ કરી છે. ખાતરનો જથ્થો ક્યાંથી આવ્યો, કોને સપ્લાય કરવામાં આવ્યો અને આગળ ક્યાં પહોંચાડવાનો હતો તે અંગે તપાસ ચાલી રહી છે.આ ઉપરાંત ‘જય એગ્રો’ના સંચાલકો ઉપરાંત અન્ય વેપારીઓ, સપ્લાયરો અથવા ઔદ્યોગિક એકમોની સંડોવણી છે કે કેમ, તે દિશામાં પણ તપાસ કરવામાં આવી રહી છે.

ખેડૂતોને મળતા સબસીડીયુક્ત ખાતરનો ગેરવપરાશ રોકવો જરૂરી

ખેડૂતોને સબસીડીના લાભ સાથે મળતું યુરિયા ખાતર જો ગેરકાયદેસર (Morbi Urea Fertilizer Scam) રીતે અન્ય હેતુ માટે વાળવામાં આવતું હોય તો તે ખેડૂતોના હિતને સીધી અસર કરી શકે છે. તેથી આ કેસમાં માત્ર ગોડાઉન સુધીની તપાસ નહીં પરંતુ સમગ્ર સપ્લાય ચેઇન સુધી પહોંચીને જવાબદારો સામે કાર્યવાહી કરવામાં આવે છે કે નહીં તેના પર હવે નજર રહેશે.હાલમાં ગોડાઉન સીલ કરી દેવામાં આવ્યું છે અને જપ્ત કરાયેલા ખાતરના જથ્થા તથા સંબંધિત દસ્તાવેજોની તપાસ બાદ સમગ્ર પ્રકરણમાં વધુ વિગતો બહાર આવવાની શક્યતા છે.

આ પણ વાંચો: નકલી ખાતર-બિયારણ વેચનારાઓ હવે સીધા જેલમાં જશે, કૃષિ મંત્રીની ચેતવણી

આ પણ વાંચો: આણંદમાં નકલી ખાતર બનાવવાના કૌભાંડનો પર્દાફાશ, એકની ધરપકડ

આ પણ વાંચો: અંબાજીમાં ખાતરના નામે ઉઘાડી લૂંટનો પર્દાફાશ, રાતના અંધારામાં બાઈક-રિક્ષા મારફતે ચાલતો કાળો કારોબાર પકડાયો