Arvind Vekaria Passes Away: ગુજરાતી રંગભૂમિ અને કળા જગત માટે એક અત્યંત દુઃખદ સમાચાર સામે આવ્યા છે. જાણીતી ટીવી સિરિયલ ‘તારક મહેતા કા ઉલ્ટા ચશ્મા’ માં ‘બાઘા’ નું લોકપ્રિય પાત્ર ભજવનારા કલાકાર તન્મય વેકરિયાના પિતા અને ગુજરાતી થિયેટરના પીઢ અભિનેતા અરવિંદ વેકરિયાનું નિધન થયું છે. દાયકાઓ સુધી પોતાની આગવી અભિનય શૈલીથી દર્શકોને મનોરંજન પૂરું પાડનાર અરવિંદભાઈના અવસાનથી કલા જગતમાં ઊંડા શોકની લહેર ફરી વળી છે. તેમણે ‘તારક મહેતા…’ સિરિયલમાં પણ એક ઝવેરી તરીકે યાદગાર કેમિયો રોલ કર્યો હતો.
ગુજરાતી નાટકોમાં Arvind Vekaria એ આપ્યું અમૂલ્ય યોગદાન
અરવિંદ વેકરિયા(Arvind Vekaria) છેલ્લા ઘણા દાયકાઓથી ગુજરાતી રંગભૂમિ, ટીવી સિરિયલો અને મનોરંજન ક્ષેત્રે સક્રિય હતા. તેઓ ખાસ કરીને પોતાના હાસ્ય અને કૌટુંબિક નાટકો માટે બહોળો ચાહકવર્ગ ધરાવતા હતા. તેમના સુપરહિટ નાટકોમાં ‘બાપા કમાલ દીકરા ધમાલ’, ‘ઘર ઘરની વાત’ (અભિનેતા અને દિગ્દર્શક તરીકે), નિરેન ભટ્ટ લિખિત ‘રિટર્ન ટિકિટ’, સિદ્ધાર્થ રાંદેરિયા સાથેનું ‘અજબ કરામત’ તેમજ ‘ચિનગારી’, ‘જીવન ચોપાટ’, ‘શિકાર’ અને ‘ગુજ્જુભાઈની ગોલમાલ’ જેવા અદભુત નાટકો સામેલ છે. તેમણે પોતાના પુત્ર તન્મય વેકરિયાને અભિનયનો એવો સમૃદ્ધ વારસો આપ્યો કે આજે ‘બાઘા’ ના પાત્રથી તન્મયે દરેક ઘરના દિલમાં ખાસ સ્થાન મેળવ્યું છે.
લોકસાહિત્યકાર સાઈરામ દવેના પિતાનું પણ નિધન
કલા જગત માટે વધુ એક માઠા સમાચાર એ છે કે ગુજરાતના સુપ્રસિદ્ધ લોકસાહિત્યકાર અને હાસ્ય કલાકાર સાઈરામ દવેના પિતા વિષ્ણુપ્રસાદ દવેનું પણ 23 જૂન 2026 ના રોજ અવસાન થયું છે. આજે તેમના અંતિમ સંસ્કાર કરવામાં આવશે. ગુજરાતના બે મોટા કલાકારોના પરિવારો પર એકસાથે આવી પડેલા આ દુઃખના પહાડને કારણે સમગ્ર સોશિયલ મીડિયા પર ચાહકો અને કલાકારો શ્રદ્ધાંજલિ અર્પી રહ્યા છે.
આ પણ વાંચો:25 વર્ષ પહેલા શાહરૂખ ખાને જે કહ્યું, તે ભવિષ્યમાં જેઠાલાલ માટે સાચું સાબિત થયું, વીડિયો વાયરલ
આ પણ વાંચો:દિલીપ જોશીએ અસિત મોદીનો કોલર પકડ્યો, શો છોડવાની આપી ધમકી!
આ પણ વાંચો:‘તારક મહેતા..’ ફેમ જેનિફર બંસીવાલ જાતીય સતામણીનો કેસ જીતી, અસિત કુમાર મોદી દોષિત
