Gujarat News: ગુજરાતમાં ગેરકાયદે હથિયારોના વેપાર સામે પોલીસે મોટી કાર્યવાહી હાથ ધરી છે. મુખ્ય આરોપી સકીલ મન્સૂરીની પૂછપરછ દરમિયાન હથિયારોની સપ્લાય ચેઇન અંગે ચોંકાવનારા ખુલાસા થયા છે. તપાસમાં સામે આવ્યું છે કે મધ્યપ્રદેશના બે શખ્સો પાસેથી સસ્તા ભાવે હથિયારો ખરીદી ગુજરાતમાં ઊંચા ભાવે વેચવામાં આવતા હતા. આ ખુલાસા બાદ પોલીસે સમગ્ર નેટવર્ક સુધી પહોંચવા તપાસનો વ્યાપ વધાર્યો છે.
Illegal Armsવેંચાણ કરતા વધુ 3 ની ધરપકડ
પોલીસ દ્વારા ઝડપાયેલા મુખ્ય આરોપી સકીલ મન્સૂરીની સઘન પૂછપરછ દરમિયાન ગેરકાયદે હથિયારોના વેપાર (Illegal arms trade)અંગે મહત્વની માહિતી સામે આવી છે. આરોપીએ કબૂલાત કરી છે કે તે મધ્યપ્રદેશના પવન અને રાહુલ નામના બે વ્યક્તિઓ પાસેથી ગેરકાયદે દેશી હથિયારો ખરીદતો હતો. પોલીસ (Gujarat Police)ના જણાવ્યા મુજબ, સકીલ મન્સૂરી આ હથિયારો માત્ર પાંચથી સાત હજાર રૂપિયામાં ખરીદતો હતો. ત્યારબાદ તે જ હથિયારો ગુજરાતમાં 25 હજારથી 50 હજાર રૂપિયા સુધીની કિંમતમાં વેચીને મોટો નફો કમાતો હતો. આ મોડસ ઓપરેન્ડી પરથી સ્પષ્ટ થાય છે કે ગેરકાયદે હથિયારોના વેપાર પાછળ એક સુનિયોજિત નેટવર્ક કાર્યરત હતું. તપાસમાં પોલીસને એવી પણ માહિતી મળી રહી છે કે આ હથિયારોનો ઉપયોગ માત્ર વ્યક્તિગત સુરક્ષા માટે નહીં પરંતુ ગંભીર ગુનાઓમાં પણ થઈ શકે તેવી શક્યતા છે.
પવન અને રાહુલની શોધખોળ માટે ટીમો કાર્યરત
સકીલ મન્સૂરી (Sakil Mansuri)ના નિવેદન બાદ પોલીસ હવે મધ્યપ્રદેશ (Madhya Pradesh)ના પવન અને રાહુલ સુધી પહોંચવાના પ્રયાસોમાં લાગી ગઈ છે. બંને આરોપીઓની ધરપકડ માટે અલગ-અલગ પોલીસ ટીમો બનાવવામાં આવી છે અને મધ્યપ્રદેશ પોલીસ સાથે પણ સંકલન શરૂ કરવામાં આવ્યું છે. પોલીસ તપાસમાં હવે એ જાણવાનો પ્રયાસ કરી રહી છે કે પવન અને રાહુલ માત્ર સપ્લાયર તરીકે કામ કરતા હતા કે પછી તેમની પાછળ ગેરકાયદે હથિયાર ઉત્પાદન અને સપ્લાય કરતું મોટુ સંગઠન કાર્યરત છે. તપાસ અધિકારીઓનું માનવું છે કે બંને આરોપીઓની ધરપકડ બાદ ગેરકાયદે હથિયાર સપ્લાય ચેઇન અંગે વધુ મહત્વપૂર્ણ માહિતી મળી શકે છે.
ગુજરાતમાં કોને વેચાતા હતા હથિયારો?
પોલીસ હવે માત્ર હથિયારો ક્યાંથી આવતા હતા તેની જ નહીં પરંતુ ગુજરાતમાં કોને વેચવામાં આવતા હતા તેની પણ તપાસ કરી રહી છે. અત્યાર સુધી આરોપીએ કેટલા લોકોને હથિયારો વેચ્યા, તેમાં કોઈ ગુનાહિત તત્વો સામેલ છે કે નહીં અને આ હથિયારોનો ઉપયોગ કયા પ્રકારના ગુનાઓમાં થયો છે તે અંગે માહિતી એકત્ર કરવામાં આવી રહી છે. સાથે જ આરોપીના મોબાઇલ ફોન, બેંક ટ્રાન્ઝેક્શન, કોલ ડિટેઇલ્સ અને અન્ય ડિજિટલ પુરાવાઓની પણ તપાસ કરવામાં આવી રહી છે, જેથી સમગ્ર નેટવર્ક સુધી પહોંચી શકાય.
ગેરકાયદે હથિયાર રેકેટના મૂળ સુધી પહોંચવાનો પોલીસનો પ્રયાસ
આ કેસ સામે આવ્યા બાદ પોલીસ ગેરકાયદે હથિયારોના વેપાર સામે વધુ સક્રિય બની છે. અધિકારીઓના જણાવ્યા મુજબ, માત્ર એક આરોપીની ધરપકડથી તપાસ પૂર્ણ થવાની નથી. સમગ્ર નેટવર્કનો પર્દાફાશ થાય અને તેમાં સંડોવાયેલા દરેક આરોપી કાયદાની ઝપેટમાં આવે ત્યાં સુધી કાર્યવાહી ચાલુ રહેશે. પોલીસ લોકો પાસે પણ અપીલ કરી રહી છે કે ગેરકાયદે હથિયારો અંગે કોઈ માહિતી હોય તો તાત્કાલિક પોલીસને જાણ કરે. આવી માહિતી આપનારની ઓળખ સંપૂર્ણપણે ગુપ્ત રાખવામાં આવશે. અધિકારીઓનું માનવું છે કે ગેરકાયદે હથિયારોનું નેટવર્ક તોડવું રાજ્યની કાયદો અને વ્યવસ્થાની દૃષ્ટિએ અત્યંત જરૂરી છે. આ માટે ટેક્નિકલ સર્વેલન્સ, ગુપ્ત બાતમીદારો અને આંતરરાજ્ય સંકલન દ્વારા તપાસને વધુ મજબૂત બનાવવામાં આવી રહી છે.
આ પણ વાંચો:પૂણે પોલીસે ગેરકાયદેસર હથિયાર કેસમાં IAS ઓફિસર પૂજાની માતા મનોરમા ખેડકરની કરી અટકાયત
