Ahmedabad News: ભગવાન જગન્નાથજીની 149મી રથયાત્રા (Ahmedabad Rath Yatra) દરમિયાન અમલમાં મુકાયેલા વિશેષ ટ્રાફિક રૂટ ડાયવર્ઝનને કારણે ઈ-મેમો મળેલા વાહનચાલકોને અમદાવાદ ટ્રાફિક પોલીસે મોટી રાહત આપી છે. પોલીસ દ્વારા રૂટ ડાયવર્ઝનના કારણે ઈસ્યુ થયેલા 1,855 ઈ-મેમો કેસ ટુ કેસ સમીક્ષા બાદ રદ (માફ) કરવાનો નિર્ણય લેવામાં આવ્યો છે.
Ahmedabad Rath Yatra રૂટ ડાયવર્ઝનને કારણે સર્જાઈ હતી સ્થિતિ
16 જુલાઈએ યોજાયેલી રથયાત્રા (Ahmedabad Rath Yatra)ને ધ્યાનમાં રાખીને શહેરના અનેક વિસ્તારોમાં ટ્રાફિક રૂટમાં ફેરફાર કરવામાં આવ્યો હતો. જેના કારણે કેટલાક વાહનચાલકોને ફરજિયાત રીતે વન-વે માર્ગમાં પ્રવેશ કરવો પડ્યો હતો અથવા વૈકલ્પિક માર્ગ અપનાવવો પડ્યો હતો. પરિણામે ઓટોમેટિક સર્વેલન્સ સિસ્ટમ દ્વારા અનેક વાહનોના ઈ-મેમો જનરેટ થયા હતા.
CCTV ફૂટેજની ચકાસણી બાદ નિર્ણય
અમદાવાદ ટ્રાફિક પોલીસે (Ahmedabad Traffic Police) શહેરના 131 ટ્રાફિક જંકશન પર લાગેલા CCTV કેમેરાના ફૂટેજની વિગતવાર તપાસ કરી હતી. દરેક કેસની અલગથી સમીક્ષા કર્યા બાદ જ્યાં સ્પષ્ટ થયું કે વાહનચાલકે ટ્રાફિક નિયમોનું ઉલ્લંઘન સ્વૈચ્છિક રીતે નહીં પરંતુ રૂટ ડાયવર્ઝનના કારણે કર્યું હતું, ત્યાં ઈ-મેમો રદ કરવામાં આવ્યા.
નો-પાર્કિંગ કેસોની પણ સમીક્ષા
પોલીસે માત્ર વન-વેના કેસો જ નહીં, પરંતુ જ્યાં વાહનચાલકોને ટ્રાફિક વ્યવસ્થાને કારણે નો-પાર્કિંગ વિસ્તારમાં વાહન ઉભું રાખવાની ફરજ પડી હતી, તેવા કેસોની પણ સમીક્ષા કરી હતી. વાસ્તવમાં વાહનચાલકની કોઈ ભૂલ ન હોવાનું જણાતા આવા કેસોમાં પણ રાહત આપવામાં આવી છે.
ટ્રાફિક પોલીસનો સંવેદનશીલ અભિગમ
ટ્રાફિક વિભાગે સ્પષ્ટ કર્યું છે કે જાહેર કાર્યક્રમો દરમિયાન ટ્રાફિક વ્યવસ્થા જાળવવી જરૂરી હોય છે, પરંતુ જ્યાં વાહનચાલકોની કોઈ વાસ્તવિક ભૂલ ન હોય ત્યાં ન્યાયસંગત નિર્ણય લેવો પણ એટલો જ જરૂરી છે. આ નિર્ણયથી 1,855 વાહનચાલકોને સીધી રાહત મળી છે.
આ પણ વાંચો:અમદાવાદ રથયાત્રા પહેલાં સુરક્ષા કડક, 200થી વધુ શંકાસ્પદોની પૂછપરછ
આ પણ વાંચો:અમદાવાદમાં રથયાત્રા પૂર્વે મુસ્લિમ સમાજે અર્પણ કર્યો એકતા રથ, ભાઈચારાનો આપ્યો સંદેશ
