Sports News: CWG 2026 માં ભારતને પ્રથમ ગોલ્ડ મેડલ મળ્યો છે. સ્ટાર વેટલિફ્ટર મીરાબાઈ ચાનુએ મહિલા 49 કિલો વર્ગમાં કુલ 190 કિલો વજન (85 કિલો સ્નેચ + 105 કિલો ક્લીન એન્ડ જર્ક) ઉઠાવી ગોલ્ડ મેડલ (Mirabai Chanu Gold Medal) પોતાના નામે કર્યો. મીરાબાઈના આ શાનદાર પ્રદર્શન સાથે ભારતે ગેમ્સમાં ગોલ્ડનું (India First Gold CWG 2026)ખાતું ખોલ્યું છે.
Mirabai Chanu Gold Medal: ભારતના હવે ત્રણ મેડલ, મેડલ ટેલીમાં સાતમું સ્થાન
મીરાબાઈના ગોલ્ડ બાદ ભારતના કુલ ત્રણ મેડલ થઈ ગયા છે, જેમાં એક ગોલ્ડ, એક સિલ્વર અને એક બ્રોન્ઝનો સમાવેશ થાય છે. આ પહેલા ઋષિકાંત સિંહે પુરુષોની 60 કિલો વજન વર્ગમાં સિલ્વર મેડલ જીત્યો હતો, જ્યારે ઝંડુ કુમારે પેરા પાવરલિફ્ટિંગમાં બ્રોન્ઝ મેડલ મેળવી ભારતનું ખાતું ખોલાવ્યું હતું. હાલ ભારત મેડલ ટેલીમાં સાતમા સ્થાને છે, જ્યારે 12 ગોલ્ડ સહિત કુલ 23 મેડલ સાથે ઓસ્ટ્રેલિયા ટોચ પર છે.
ઋષિકાંત સિંહની બીજી કોમનવેલ્થ ગેમ્સ
ઋષિકાંત સિંહ માટે આ બીજી કોમનવેલ્થ ગેમ્સ છે. બર્મિંગહામ 2022માં તેમણે 55 કિલો વજન વર્ગમાં ભારતનું પ્રતિનિધિત્વ કર્યું હતું, જ્યારે આ વખતે તેઓ પ્રથમ વખત 60 કિલો કેટેગરીમાં ઉતર્યા અને સિલ્વર મેડલ (Rishikant Singh Silver Medal) જીત્યો. તેઓ હાલના કોમનવેલ્થ વેઈટલિફ્ટિંગ ચેમ્પિયનશિપના ચેમ્પિયન પણ છે.
મણિપુરથી શરૂ થયેલી સફર, આજે સિલ્વર સુધી પહોંચ્યા
મણિપુર વેઈટલિફ્ટિંગ એસોસિએશનના સચિવ અને તેમના શરૂઆતના કોચ બ્રોજેન્દ્ર સિંહના જણાવ્યા અનુસાર, ઋષિકાંતે 2009માં મણિપુર સ્પોર્ટ્સ એકેડમીથી વેઈટલિફ્ટિંગની શરૂઆત કરી હતી. બાદમાં તેમની પસંદગી SAI સેન્ટરમાં થઈ અને ત્યારપછી ભારતીય નૌકાદળ તથા ભારતીય સેનાના સ્પોર્ટ્સ સેટઅપ સાથે જોડાઈને તેમણે પોતાની રમતને વધુ મજબૂત બનાવી. તેઓ મણિપુરના ઇમ્ફાલ વેસ્ટ જિલ્લાના રહેવાસી છે.
વેઈટલિફ્ટિંગમાં મેડલ કેવી રીતે નક્કી થાય છે?
વેઈટલિફ્ટિંગમાં બે ઇવેન્ટ હોય છે – સ્નેચ અને ક્લીન એન્ડ જર્ક. સ્નેચમાં ખેલાડી એક જ મૂવમેન્ટમાં બારબેલને જમીન પરથી સીધું માથા ઉપર લઈ જાય છે, જ્યારે ક્લીન એન્ડ જર્કમાં પહેલા બારબેલ ખભા સુધી લાવવામાં આવે છે અને ત્યારબાદ માથા ઉપર ઉઠાવવામાં આવે છે. બંને ઇવેન્ટમાં ખેલાડીને ત્રણ-ત્રણ પ્રયાસ મળે છે. બંનેમાં ઉઠાવેલા સૌથી વધુ સફળ વજનને જોડીને કુલ વજન (ટોટલ) નક્કી કરવામાં આવે છે અને સૌથી વધુ ટોટલ કરનાર ખેલાડી વિજેતા બને છે.
લૉન બૉલ્સમાં ભારતને નિરાશા
મહિલા પેયર્સ લૉન બૉલ્સમાં ભારતની રૂપા રાની તિર્કી અને પિંકી સિંહની જોડીને નામિબિયા સામે ટાઈબ્રેકમાં હારનો સામનો કરવો પડ્યો. હવે સેમિફાઇનલમાં પહોંચવા માટે ભારતીય જોડીએ ઇંગ્લેન્ડ સામે જીત મેળવવી જરૂરી બની છે. આ મુકાબલો ટીમ માટે ‘કરો યા મરો’ સમાન રહેશે.
આગળના મુકાબલાઓ પર નજર
ભારતીય ખેલાડીઓ માટે હવે જિમ્નાસ્ટિક્સ, સ્વિમિંગ અને બોક્સિંગમાં પણ મહત્વપૂર્ણ પડકારો છે. જિમ્નાસ્ટિક્સમાં યોગેશ્વર સિંહ અને તપન મોહંતી પુરુષ ઓલ-અરાઉન્ડ ફાઇનલમાં ભાગ લેશે, જ્યારે સ્વિમિંગમાં શ્રીહરિ નટરાજની ટીમ 4×200 મીટર ફ્રીસ્ટાઇલ રિલેમાં ઉતરશે. બોક્સિંગમાં પ્રીતિ પવાર, જદુમણિ સિંહ અને આદિત્ય પ્રતાપ યાદવ પોતાના-પોતાના રાઉન્ડ ઓફ-16ના મુકાબલામાં ભારત માટે મેડલની આશા જીવંત રાખવાનો પ્રયાસ કરશે.
આ પણ વાંચો: 18 વર્ષની અનાહત સિંહે રચ્યો ઈતિહાસ, ભારત માટે ગોલ્ડ જીતનારી પ્રથમ ખેલાડી બની
આ પણ વાંચો: CWG 2026 માં મોટો અકસ્માત: ઈંગ્લેન્ડના જિમ્નાસ્ટ ગૈબ્રિયલ લૈંગટનનું બેલેન્સ બિગડતા માથાભેર પટકાયા
આ પણ વાંચો: ગ્લાસગોમાં ભારતના મેડલનું ખાતું ખુલ્યું; પાવરલિફ્ટર ઝંડુ કુમારે બ્રોન્ઝ જીતીને રચ્યો ઈતિહાસ
