Gujarat Rain Forecast: ગુજરાતમાં આગામી દિવસોમાં વરસાદનું જોર ફરી વધવાની શક્યતા છે. હવામાન વિભાગ મુજબ રાજ્યમાં હાલમાં એક સાથે અનેક હવામાન સિસ્ટમ સક્રિય બની છે, જેના કારણે વિવિધ વિસ્તારોમાં વરસાદી માહોલ જોવા મળી શકે છે.હવામાન વિભાગના જણાવ્યા અનુસાર, રાજ્યમાં અપર એર સર્ક્યુલેશન, બે મોન્સૂન ટ્રફ, સાયક્લોનિક સર્ક્યુલેશન અને ડીપ ડિપ્રેશન સહિત કુલ 5 સિસ્ટમ સક્રિય છે. આ સિસ્ટમની અસર હેઠળ આગામી દિવસોમાં રાજ્યના અનેક જિલ્લાઓમાં છૂટાછવાયા સ્થળોએ ભારે વરસાદની શક્યતા વ્યક્ત કરવામાં આવી છે.
અનેક જિલ્લામાં યલો એલર્ટ જાહેર
આજે રાજ્યના કેટલાક વિસ્તારો માટે હવામાન વિભાગે યલો એલર્ટ જાહેર કર્યું છે. જેમાં વાવ-થરાદ, બનાસકાંઠા, પાટણ અને મહેસાણાનો સમાવેશ થાય છે.આ ઉપરાંત સાબરકાંઠા, ગાંધીનગર, અરવલ્લી, મહીસાગર અને ખેડા જિલ્લામાં પણ વરસાદને લઈને એલર્ટ આપવામાં આવ્યું છે. તેમજ પંચમહાલ, આણંદ, વડોદરા, ભરૂચ અને સુરત સહિતના વિસ્તારોમાં પણ વરસાદી સ્થિતિને ધ્યાનમાં રાખીને આગાહી (Gujarat Rain Forecast) કરવામાં આવી છે.
Gujarat Rain Forecast: ડીપ ડિપ્રેશનની અસરથી વરસાદ વધવાની શક્યતા
હવામાન વિભાગના જણાવ્યા પ્રમાણે, બંગાળની ખાડીમાં સર્જાયેલું ડિપ્રેશન હવે ડીપ ડિપ્રેશનમાં ફેરવાયું છે. આ સિસ્ટમની અસરથી ખાસ કરીને દક્ષિણ ગુજરાત અને આસપાસના વિસ્તારોમાં વરસાદનું પ્રમાણ વધી શકે છે.આવતીકાલથી આગામી બે દિવસ દરમિયાન સુરત, વાપી અને ડાંગ સહિતના વિસ્તારોમાં વરસાદની આગાહી (Gujarat Rain Forecast) કરવામાં આવી છે.
30 જુલાઈથી ફરી વરસાદનું જોર વધશે
હવામાન વિભાગે જણાવ્યું છે કે 30 જુલાઈથી સતત ત્રણ દિવસ સુધી રાજ્યમાં ફરી વરસાદનું જોર વધવાની શક્યતા છે. 30 જુલાઈના રોજ નર્મદા, તાપી અને ડાંગ જિલ્લામાં ઓરેન્જ એલર્ટ જાહેર કરવામાં આવી શકે છે.ભારે વરસાદની શક્યતાને પગલે વહીવટી તંત્રને પણ સાવચેતી રાખવા સૂચના આપવામાં આવી છે.
માછીમારોને દરિયો ન ખેડવાની સૂચના
વરસાદ અને દરિયાઈ સ્થિતિને ધ્યાનમાં રાખીને હવામાન વિભાગ દ્વારા 30 અને 31 જુલાઈએ માછીમારોને દરિયો ન ખેડવા સૂચના આપવામાં આવી છે. દરિયામાં પવનની ગતિ અને મોજાની સ્થિતિને ધ્યાનમાં રાખીને સાવચેતી રાખવા જણાવાયું છે.રાજ્યમાં ચોમાસાની સક્રિય સ્થિતિ વચ્ચે આગામી દિવસોમાં વરસાદી ગતિવિધિઓ વધુ તેજ થવાની શક્યતા છે.
આ પણ વાંચો: ભારે વરસાદથી પુસ્તકો ખરાબ થયા? ગુજરાત સરકાર આપશે નવા પાઠ્યપુસ્તકો મફતમાં
આ પણ વાંચો: વલસાડના પંડોરમાં દુર્ઘટનાગ્રસ્ત પરિવારોને સહાય,₹4-4 લાખની આર્થિક મદદ
