Gujarat Rain News: રાજ્યમાં ભારે વરસાદનો કહેર હજુ પણ યથાવત (Gujarat Flood) જોવા મળી રહ્યો છે. ઉત્તર ગુજરાત, મધ્ય ગુજરાત અને પૂર્વ ગુજરાતના અનેક વિસ્તારોમાં વરસાદ બાદ જનજીવન હજુ સંપૂર્ણપણે પૂર્વવત થઈ શક્યું નથી. શહેરોમાં પાણી ભરાવા, હાઈવે પર ટ્રાફિક, કેનાલમાં ભંગાણ, ખેતરોમાં પાણી ભરાવા અને તાજેતરમાં બનેલા રસ્તાઓ તૂટી જવાની ઘટનાઓ સામે આવતા સ્થાનિકોમાં ભારે રોષ જોવા મળી રહ્યો છે. અનેક જગ્યાએ તંત્ર સામે બેદરકારીના(Gujarat Flood) આક્ષેપો પણ થઈ રહ્યા છે.
Gujarat Flood: ઉત્તર ગુજરાતમાં વરસાદથી જનજીવન પ્રભાવિત
બનાસકાંઠાના ભાભર શહેરમાં ભારે વરસાદ (Banaskantha Rain) બાદ લાટી બજાર, લાલ ચોક સહિત અનેક નીચાણવાળા વિસ્તારો પાણીમાં ગરકાવ થઈ ગયા છે. દુકાનો અને રહેણાંક વિસ્તારોમાં પાણી ઘૂસી જતાં વેપારીઓ અને સ્થાનિકોને નુકસાન વેઠવાનો વારો આવ્યો છે. પરિસ્થિતિની ગંભીરતાને ધ્યાનમાં રાખીને પ્રાદેશિક કમિશનર સહિતના અધિકારીઓએ અસરગ્રસ્ત વિસ્તારોની મુલાકાત લઈને પાણીના નિકાલ અંગે સમીક્ષા કરી હતી. સ્થાનિકોએ શહેર માટે નવી સ્ટોર્મ વોટર ડ્રેનેજ લાઇન મંજૂર કરવાની માંગ ઉઠાવી છે.
પાલનપુરમાં માત્ર દોઢ કલાકમાં દોઢ ઇંચ વરસાદ પડતાં પાલનપુર-અંબાજી અને પાલનપુર-આબુ હાઈવે પર ઘૂંટણસમા પાણી ભરાઈ ગયા હતા. જેના કારણે વાહનચાલકો, શાળાએ જતા બાળકો અને રાહદારીઓ લાંબા સમય સુધી અટવાઈ ગયા હતા. સ્થાનિકોએ પ્રિ-મોન્સૂન કામગીરી પાછળ કરોડો રૂપિયાનો ખર્ચ છતાં પાણીના નિકાલની યોગ્ય વ્યવસ્થા ન હોવાના આક્ષેપ કર્યા છે. બીજી તરફ પાલનપુર-આબુ નેશનલ હાઈવે પર બિહારી બાગ નજીક વરસાદ દરમિયાન જ ખાડા પૂરવાની કામગીરી હાથ ધરાતા ટ્રાફિકજામ સર્જાયો હતો, જેને લઈને નેશનલ હાઈવે ઓથોરિટીની કામગીરી સામે પણ સવાલો ઉઠ્યા છે.
ગઢ, મડાણા અને વાસણી સહિતના ગ્રામ્ય વિસ્તારોમાં પણ ધોધમાર વરસાદ બાદ ખેતરોમાં પાણી ભરાઈ જતાં પાકને નુકસાન થવાની ભીતિ સેવાઈ રહી છે. જ્યારે વાવ-થરાદ પંથકમાં ભડોદરથી ભોરોલ જતી કેનાલમાં ભંગાણ પડતાં અંદાજે 50 એકરથી વધુ ખેતીની જમીન પાણીમાં ગરકાવ થઈ ગઈ છે. મગફળી, બાજરી સહિતના પાકને ભારે નુકસાન પહોંચતાં ખેડૂતો દ્વારા કોન્ટ્રાક્ટર અને એજન્સીઓની બેદરકારીના આક્ષેપો સાથે વળતરની માંગ કરવામાં આવી રહી છે.
મધ્ય ગુજરાતમાં વિરમગામ હજુ પણ પાણીમાં
અમદાવાદ જિલ્લાના વિરમગામમાં ભારે વરસાદના પાંચ દિવસ બાદ પણ અનેક વિસ્તારોમાંથી પાણી (Viramgam Flood) ઓસર્યાં નથી. માંડલ રોડ, કુંવરબા પાર્ક, અલબદર સોસાયટી, નુરી સોસાયટી અને ઉજીની ચાલી સહિતના વિસ્તારો હજુ પણ જળબંબાકારની સ્થિતિમાં છે. વિરમગામ-બેચરાજી હાઈવે પર અનેક વાહનો ફસાયેલા છે, જ્યારે સરકારી હોસ્પિટલ સુધી પહોંચવામાં દર્દીઓને ભારે મુશ્કેલી પડી રહી છે. પાણીના નિકાલમાં વિલંબ થતાં સ્થાનિકોમાં ભારે આક્રોશ જોવા મળી રહ્યો છે.
પૂર્વ ગુજરાતમાં રસ્તાની ગુણવત્તા સામે સવાલ
દાહોદ જિલ્લાના લીમખેડા-લીમડી હાઈવે પર માત્ર બે મહિના અગાઉ બનાવવામાં આવેલો નવો રસ્તો ઝરમર વરસાદમાં જ તૂટી ગયો છે. માર્ગ પર મસમોટા ખાડા પડી જતાં (Dahod Road Collapse) તેમાં પાણી ભરાઈ રહ્યું છે અને વાહનચાલકો જીવના જોખમે પસાર થઈ રહ્યા છે. સ્થાનિકોએ માર્ગ નિર્માણમાં હલકી ગુણવત્તાના મટીરિયલનો ઉપયોગ કરાયો હોવાનો આક્ષેપ કરી ઉચ્ચસ્તરીય તપાસની માંગ ઉઠાવી છે. સાથે જ તાત્કાલિક રિપેરિંગ નહીં થાય તો જનઆંદોલનની ચીમકી પણ ઉચ્ચારી છે.
વરસાદ પછી પણ મુશ્કેલીઓ યથાવત
રાજ્યના અનેક વિસ્તારોમાં વરસાદનું જોર ઘટ્યું હોવા છતાં તેની અસર હજુ પણ સ્પષ્ટ જોવા મળી રહી છે. ક્યાંક શહેરોમાં પાણી ભરાવાની સમસ્યા યથાવત છે તો ક્યાંક ખેતરોમાં પાણી ભરાતા ખેડૂતો ચિંતિત બન્યા છે. હાઈવે પર પાણી, તૂટી ગયેલા રસ્તાઓ, કેનાલના ભંગાણ અને નબળી ડ્રેનેજ વ્યવસ્થાને કારણે સામાન્ય જનજીવન પર ભારે અસર પડી રહી છે. સ્થાનિકો હવે તાત્કાલિક રાહત કામગીરીની સાથે કાયમી ઉકેલની માંગ કરી રહ્યા છે.
આ પણ વાંચો: ભારે વરસાદથી પુસ્તકો ખરાબ થયા? ગુજરાત સરકાર આપશે નવા પાઠ્યપુસ્તકો મફતમાં
આ પણ વાંચો: વલસાડના પંડોરમાં દુર્ઘટનાગ્રસ્ત પરિવારોને સહાય,₹4-4 લાખની આર્થિક મદદ
