Gujarat News: ગુજરાતમાં અવિરત વરસાદ વચ્ચે વિકાસકાર્યોની ગુણવત્તા (Development Work) ફરી સવાલોના ઘેરામાં આવી છે. એક તરફ ખંભાતમાં કરોડો રૂપિયાના ખર્ચે બનાવાયેલી નહેરની સંરક્ષણ દિવાલ એક મહિનામાં જ ધરાશાયી થઈ ગઈ છે, તો બીજી તરફ છોટાઉદેપુર જિલ્લાના સંખેડામાં રૂ.1.21 કરોડના ખર્ચે બનેલા રોડની બાજુની માટી પ્રથમ વરસાદમાં જ ધોવાઈ ગઈ છે. બંને બનાવોમાં ગ્રામજનો અને ખેડૂતો દ્વારા હલકી ગુણવત્તાનું કામ, ભ્રષ્ટાચાર અને જવાબદારો સામે કડક કાર્યવાહી કરવાની માંગ ઉઠી છે.
Development Work: ખંભાતમાં નહેરની દિવાલ એક મહિનામાં જ તૂટી પડી
આણંદ જિલ્લાના ખંભાત તાલુકામાં (Khambhat) ત્રણ ગામોને જોડતી નહેરની સંરક્ષણ દિવાલનું (Canal Wall Collapse) કામ પૂર્ણ થાય તે પહેલાં જ આશરે એકથી દોઢ કિલોમીટરનો ભાગ ધરાશાયી થઈ ગયો છે. ખેડૂતોનો આક્ષેપ છે કે કામ દરમિયાન હલકી ગુણવત્તાની સામગ્રીનો ઉપયોગ કરવામાં આવ્યો હતો અને દિવાલમાં જરૂરી સ્ટીલના સળિયા પણ નાખવામાં આવ્યા નહોતા. વરસાદ શરૂ થતાં જ સમગ્ર દિવાલ તૂટી પડતાં કામની ગુણવત્તા સામે ગંભીર પ્રશ્નો ઊભા થયા છે. ગ્રામજનોએ સમગ્ર મામલે ઉચ્ચસ્તરીય તપાસ કરીને જવાબદારો સામે કડક કાર્યવાહી કરવાની માંગ કરી છે.
ખંભાતમાં 11 ઇંચ વરસાદથી જળબંબાકાર, 100 લોકોનું સ્થળાંતર
ખંભાતમાં માત્ર એક જ દિવસમાં 11 ઇંચ વરસાદ વરસતાં શહેરના અનેક નીચાણવાળા વિસ્તારો પાણીમાં ગરકાવ થઈ ગયા હતા. આંબાખાડ વિસ્તારમાં પાણી ઘૂસી જતાં આશરે 100 લોકોને સુરક્ષિત સ્થળે ખસેડીને આશ્રમમાં રાખવામાં આવ્યા છે. પૂર્વ કેન્દ્રીય મંત્રી ભરતસિંહ સોલંકીએ પણ અસરગ્રસ્ત વિસ્તારોની મુલાકાત લઈને લોકોની સ્થિતિની જાણકારી મેળવી હતી. આગામી દિવસોમાં વધુ ભારે વરસાદની આગાહીને કારણે સ્થાનિકોમાં ચિંતા વધી છે.
સંખેડામાં રૂ.1.21 કરોડના રોડનું પ્રથમ વરસાદમાં જ ધોવાણ
છોટાઉદેપુર જિલ્લાના સંખેડા વિસ્તારમાં રૂ.121 લાખના ખર્ચે તૈયાર કરાયેલા રોડની (Road Damage) હાલત પણ પ્રથમ ભારે વરસાદમાં જ બગડી ગઈ છે. રોડની બંને બાજુની માટી ધોવાઈ જતાં અનેક સ્થળોએ સ્લેબની આસપાસનો ભાગ બેસી ગયો છે. બે નાળાઓ વચ્ચેનો રોડ પણ જોખમી બન્યો છે અને વધુ વરસાદ પડતાં વાહનવ્યવહાર સંપૂર્ણપણે બંધ થઈ જવાની ભીતિ વ્યક્ત કરવામાં આવી રહી છે. ગ્રામજનોએ આ કામમાં પણ ગેરરીતિ અને ભ્રષ્ટાચારની આશંકા વ્યક્ત કરીને તકેદારીપૂર્વક તપાસ કરવાની માંગ કરી છે.
વાંકાનેરમાં જર્જરિત પ્લે હાઉસની દિવાલ તૂટી, મોટી દુર્ઘટના ટળી
મોરબી જિલ્લાના વાંકાનેરમાં સતત વરસાદ વચ્ચે વર્ષોથી બંધ પડેલા પ્લે હાઉસની વિશાળ દિવાલ અચાનક ધરાશાયી થઈ ગઈ હતી. દિવાલ પડતાં નજીકની કેબિનને ભારે નુકસાન પહોંચ્યું હતું, જ્યારે ત્યાં પાર્ક કરેલી કાર પર પણ મોટા પથ્થરો પડતાં નુકસાન થયું હતું. સદનસીબે ઘટનાના સમયે આસપાસ કોઈ વ્યક્તિ હાજર ન હોવાથી મોટી જાનહાનિ ટળી હતી. સ્થાનિકોએ વર્ષોથી જર્જરિત હાલતમાં પડેલી આ ઇમારતનો જોખમી ભાગ તાત્કાલિક દૂર કરવાની માંગ કરી છે.
વિકાસના નામે ભ્રષ્ટાચારના આક્ષેપો, તપાસની ઉઠી માંગ
વરસાદે માત્ર જનજીવન જ નહીં પરંતુ વિકાસકાર્યોની ગુણવત્તાની પણ કસોટી કરી છે. ખંભાતની નહેરની દિવાલ અને સંખેડાના રોડના બનાવો બાદ સરકારી કામોમાં ગુણવત્તા અને પારદર્શિતા અંગે ગંભીર (Corruption Allegation) સવાલો ઊભા થયા છે. સ્થાનિકોનું કહેવું છે કે જો સમયસર નિષ્પક્ષ તપાસ નહીં થાય તો આવા બાંધકામો લોકોના જીવ માટે જોખમ બની શકે છે. તેથી બંને કેસમાં જવાબદારો સામે કડક કાર્યવાહી અને સમગ્ર કામગીરીની ઉચ્ચસ્તરીય તપાસ કરવાની માંગ જોર પકડી રહી છે.
આ પણ વાંચો: ગાંધીનગરમાં પ્રથમ વરસાદે ખોલી તંત્રની પોલ: મહાત્મા મંદિર પાસે રસ્તા પર મોટો ભૂવો પડતા તંત્ર દોડતું થયું
આ પણ વાંચો: અમદાવાદમાં પ્રથમ જ વરસાદે તંત્રની પોલ ખોલી, રોડ ધસતાં ટ્રેલર ફસાયું
