Valsad News : વલસાડ વિધાનસભા મતવિસ્તારના દરિયાકાંઠા અને નદીકાંઠાના ગામોમાં દરિયાઈ ભરતી, ભારે વરસાદ અને પાણીના ધોવાણથી થતું નુકસાન અટકાવવા માટે પ્રોટેક્શન વોલ (Protection Wall) બનાવવાની માંગ ઉઠી છે. ધારાસભ્ય ભરત પટેલે (Bharat Patel)વિધાનસભા સત્ર દરમિયાન સરકાર સમક્ષ આ મુદ્દો રજૂ કરીને તાત્કાલિક સર્વે અને જરૂરી કામગીરી હાથ ધરવા માંગ કરી છે.
પ્રોટેક્શન વોલ (Protection Wall) માટે તાત્કાલિક સર્વેની માંગ
વલસાડના દાંડી, દાંતી, કકવાડી, ભાગલ, કોસંબા, સુરવાડા અને મગોદ-ડુંગરી સહિતના કાંઠા વિસ્તાર (Valsad Coastal Area)ના ગામોમાં ચોમાસા દરમિયાન ધોવાણની સમસ્યા ગંભીર બને છે. દરિયાઈ ભરતી અને પાણીના તીવ્ર પ્રવાહને કારણે ખેતીની જમીન તેમજ રહેણાંક વિસ્તારોને નુકસાન થવાની ભીતિ રહે છે. આ સ્થિતિને ધ્યાનમાં રાખીને ધારાસભ્યે સંવેદનશીલ વિસ્તારોમાં તાત્કાલિક ટેકનિકલ સર્વે કરવાની માંગ કરી છે.
દરિયાઈ ભરતીથી ખેતીની જમીનને જોખમ
ચોમાસા દરમિયાન દરિયાની ભરતી અને વરસાદી પાણીના પ્રવાહને કારણે કાંઠા વિસ્તારોમાં જમીનનું ધોવાણ થતું હોવાની સમસ્યા સામે આવી રહી છે. ખેડૂતો માટે ખેતીની જમીન બચાવવી મહત્વપૂર્ણ હોવાથી જરૂરી સ્થળોએ સુરક્ષાત્મક માળખું ઊભું કરવાની જરૂરિયાત વ્યક્ત કરવામાં આવી છે.
ટેકનિકલ તપાસ બાદ યોગ્ય આયોજનની માંગ
ધારાસભ્ય ભરત પટેલે (Bharat Patel)સરકારનું ધ્યાન દોરતાં જણાવ્યું કે, જ્યાં ધોવાણનું જોખમ વધુ હોય તેવા વિસ્તારોની ટેકનિકલ તપાસ કરાવી યોગ્ય આયોજન કરવું જોઈએ. સર્વે બાદ જરૂરી સ્થળોએ પ્રોટેક્શન વોલનું કામ ઝડપથી શરૂ કરવામાં આવે તો આગામી ચોમાસામાં નુકસાનનું જોખમ ઘટાડી શકાય.
ગ્રામજનો અને ખેડૂતોને રાહતની આશા
પ્રોટેક્શન વોલ (Protection Wall)ના નિર્માણથી કાંઠા વિસ્તારના ગ્રામજનોની મિલકતો અને ખેડૂતોની જમીનને ધોવાણથી રક્ષણ મળી શકે છે. લાંબા સમયથી ચાલી રહેલી સમસ્યાના કાયમી ઉકેલ માટે સરકાર દ્વારા ઝડપી નિર્ણય લેવામાં આવે તેવી સ્થાનિકોની અપેક્ષા છે.
હવે સરકાર દ્વારા કયા વિસ્તારોમાં સર્વે કરવામાં આવે છે અને પ્રોટેક્શન વોલ (Protection Wall)ના કામને લઈને શું આયોજન થાય છે તેના પર કાંઠા વિસ્તારના ગ્રામજનો અને ખેડૂતોની નજર છે.
