Botad News: બોટાદ જિલ્લામાં મહત્વપૂર્ણ ગણાતી રાણપુર અને બરવાળા APMC માટે ચેરમેન અને ડેપ્યુટી ચેરમેનની વરણીની પ્રક્રિયા પૂર્ણ થઈ છે. બંને માર્કેટ યાર્ડમાં ચેરમેન અને ડેપ્યુટી ચેરમેનના હોદ્દા માટે બિનહરીફ વરણી થતાં સ્થાનિક સહકારી ક્ષેત્રમાં ઉત્સાહનો માહોલ જોવા મળ્યો હતો. તાજેતરમાં રાણપુર અને બરવાળા એપીએમસીની ચૂંટણી યોજાયા બાદ હવે બંને માર્કેટ યાર્ડના સંચાલન માટે મહત્વના હોદ્દેદારોની પસંદગી કરવામાં આવી છે.
બરવાળા APMCમાં સુરેશભાઈ ગઢીયા ચેરમેન
બરવાળા APMCમાં સુરેશભાઈ ગઢીયાની ચેરમેન તરીકે બિનહરીફ વરણી કરવામાં આવી છે. જ્યારે દિલાવરસિંહ ઝાલાને ડેપ્યુટી ચેરમેનની જવાબદારી સોંપવામાં આવી છે. બંને હોદ્દા માટે બિનહરીફ વરણી થતાં ચૂંટણી પ્રક્રિયા શાંતિપૂર્ણ રીતે પૂર્ણ થઈ હતી. ચૂંટણી અધિકારી દ્વારા વરણીની સત્તાવાર જાહેરાત કરવામાં આવી હતી.
રાણપુર APMCમાં કિશોરભાઈ ધાધલ ચેરમેન
બીજી તરફ, રાણપુર એપીએમસીમાં કિશોરભાઈ ધાધલને ચેરમેન તરીકે બિનહરીફ પસંદ કરવામાં આવ્યા છે. જ્યારે લખમણભાઈ મેટાલીયાની ડેપ્યુટી ચેરમેન તરીકે વરણી થઈ છે. આ સાથે રાણપુર APMCના નવા હોદ્દેદારોની પણ સત્તાવાર જાહેરાત કરવામાં આવી હતી.
Botad APMC Electionછ માર્કેટ યાર્ડમાં શુભેચ્છાનો માહોલ
ચેરમેન અને ડેપ્યુટી ચેરમેનની વરણીની જાહેરાત થતાં જ બંને માર્કેટ યાર્ડ પરિસરમાં સ્થાનિક આગેવાનો, ખેડૂત પ્રતિનિધિઓ અને શુભેચ્છકો એકત્ર થયા હતા. નવનિયુક્ત હોદ્દેદારોનું ફુલહાર પહેરાવી સ્વાગત કરવામાં આવ્યું હતું અને મોં મીઠું કરાવી શુભેચ્છાઓ પાઠવવામાં આવી હતી.
ખેડૂતોના હિત અને માર્કેટ યાર્ડના વિકાસ પર ભાર
નવી જવાબદારી સંભાળનારા હોદ્દેદારોએ ખેડૂતોના હિતને પ્રાથમિકતા આપવાની અને માર્કેટ યાર્ડના વિકાસ માટે કામગીરી કરવાની ખાતરી આપી હોવાનું જણાવાયું છે. એપીએમસી ખેડૂતો માટે કૃષિ પેદાશોના વેચાણ અને બજાર વ્યવસ્થામાં મહત્વની ભૂમિકા ભજવે છે. ત્યારે રાણપુર અને બરવાળા એપીએમસીમાં નવા હોદ્દેદારોની બિનહરીફ વરણી બાદ આગામી સમયમાં માર્કેટ યાર્ડના વિકાસ અને ખેડૂતોને મળતી સુવિધાઓમાં કેવા પગલાં લેવામાં આવે છે તેના પર નજર રહેશે.
આ પણ વાંચો: ગુજરાતમાં વસ્તી ગણતરી માટે અધિકારીઓની નિમણૂક કરાઈ, 9 એપીએમસીમાં ચૂંટણી જાહેરાત
આ પણ વાંચો: નસવાડી એપીએમસી ચૂંટણી પરિણામ: ભાજપ પ્રેરિત સહકાર પેનલનો વિજય, ખેડૂત વિભાગની 10 બેઠકો કબજે
આ પણ વાંચો: એપીએમસી ચૂંટણીમાં ભાજપને ફટકો, શું બદલાઈ રહ્યાં છે રાજ્યમાં રાજકીય સમીકરણો?
