International News : ફ્લાયદુબઈ (Flydubai)ની FZ1073 ફ્લાઈટમાં થયેલી કોકપિટની ગંભીર ઘટના બાદ ઇઝરાયેલના વડાપ્રધાન બેન્જામિન નેતન્યાહૂએ કડક વલણ (Netanyahu action order)અપનાવ્યું છે. નેતન્યાહૂએ કહ્યું કે આ ઘટનાની પાછળ જે કોઈ હશે, તેને તેની ભારે કિંમત ચૂકવવી પડશે. જોકે, ઘટનાના ચોક્કસ કારણ અને કોઈ મોટા ષડયંત્ર સાથેના સંબંધ અંગે તપાસ હજુ ચાલી રહી છે.
નેતન્યાહૂનો મોટો એક્શન ઓર્ડર
નેતન્યાહૂએ જણાવ્યું કે જેમ જેમ તપાસ આગળ વધી રહી છે તેમ ઘટનાનું ચિત્ર વધુ સ્પષ્ટ થઈ રહ્યું છે. તેમના જણાવ્યા અનુસાર, ભારતીય પાયલટ કેપ્ટન સ્મિત મચ્છર (Smit Machchhar)અને મુસાફરોએ સંભવિત મોટી દુર્ઘટના અટકાવવામાં મહત્વની ભૂમિકા ભજવી હતી.
ઇઝરાયેલી વડાપ્રધાને એવો પણ દાવો કર્યો કે તપાસમાં કોપાયલટના કથિત કટ્ટરપંથીકરણ અંગે માહિતી સામે આવી છે. સાથે જ એ તપાસવાનો મુદ્દો પણ ઉઠાવવામાં આવ્યો છે કે હુમલાખોરે આ કૃત્ય પોતાની રીતે કર્યું હતું કે તેને કોઈએ મોકલ્યો હતો.
11 સપ્ટેમ્બર જેવી તબાહી ટળી
30 સપ્ટેમ્બરે દુબઈથી તેલ અવીવ જઈ રહેલી ફ્લાઇટમાં કોકપિટની અંદર કોપાયલટે ભારતીય કેપ્ટન સ્મિત મચ્છર (Smit Machchhar)પર હુમલો કર્યો હતો. હુમલા દરમિયાન વિમાનની ઊંચાઈમાં અચાનક મોટો ઘટાડો નોંધાયો હતો. ફ્લાઇટે હાઇજેકિંગ દર્શાવતો 7500 કોડ પણ ટ્રાન્સમિટ કર્યો હતો.
ઇજાગ્રસ્ત હોવા છતાં કેપ્ટન સ્મિત મચ્છરે (Smit Machchhar)કોકપિટનો દરવાજો ખોલવામાં સફળતા મેળવી. ત્યારબાદ કેટલાક મુસાફરો અને ક્રૂ સભ્યોએ કોકપિટમાં પ્રવેશીને હુમલાખોરને કાબૂમાં લીધો. બાદમાં વિમાનનું સાઉદી અરેબિયાના તબુકમાં ઇમરજન્સી લેન્ડિંગ કરાવવામાં આવ્યું.
કટ્ટરપંથ અને ઈરાન એંગલની તપાસ
ઇઝરાયેલી અધિકારીઓએ આ ઘટનામાં સંભવિત જિહાદી અથવા આતંકવાદી એંગલની તપાસ શરૂ કરી છે. યુએઈએ પણ આ ઘટનામાં આતંકવાદી હેતુ અથવા ઇરાદો હતો કે નહીં તેની તપાસ કરવાનો નિર્ણય લીધો છે.
ઈરાનના સંભવિત જોડાણ (Iran connection)અંગે પણ સવાલો ઉઠ્યા છે. જોકે નેતન્યાહૂએ સ્પષ્ટ કર્યું છે કે આ તબક્કે કોઈ ચોક્કસ તારણ પર પહોંચવું વહેલું ગણાશે. ઉપલબ્ધ અહેવાલો અનુસાર અત્યાર સુધી ઈરાન સાથે સીધો સંબંધ સાબિત થયો નથી.
કોકપિટમાં હુમલો, પાયલોટે બચાવ્યું વિમાન
આ ઘટનામાં કેપ્ટન સ્મિત મચ્છરની ભૂમિકા મહત્વપૂર્ણ રહી હતી. હુમલા બાદ પણ તેમણે કોકપિટનો દરવાજો ખોલ્યો, જેના કારણે મુસાફરો અને અન્ય ક્રૂ સભ્યો હુમલાખોર સુધી પહોંચી શક્યા. ત્યારબાદ રિઝર્વ ક્રૂએ વિમાનને સુરક્ષિત રીતે તબુક પહોંચાડ્યું.
ઘટનાની તપાસમાં હવે હુમલાખોરની પૃષ્ઠભૂમિ, તેનો હેતુ, સુરક્ષા પ્રક્રિયા અને કોઈ બહારના સંગઠન સાથે તેના સંબંધ સહિતના અનેક પાસાઓ તપાસવામાં આવી રહ્યા છે. ફ્લાયદુબઈ (Flydubai)એ પણ તપાસ પૂર્ણ ન થાય ત્યાં સુધી આ ઘટનાના કારણો અંગે અટકળો ન કરવા અપીલ કરી છે.
