Ahmedabad News: ગુજરાતમાં નવા ભાડા વિધેયકને લઈને વકીલો અને સરકાર વચ્ચેનો વિવાદ વકર્યો છે. વિધેયકના વિરોધમાં રાજ્યભરના વકીલોએ અચોક્કસ મુદતની હડતાળનું એલાન (Gujarat Lawyers Strike) આપ્યું છે. અમદાવાદ, વડોદરા અને સુરત સહિત વિવિધ શહેરોમાં વકીલોએ કોર્ટ પરિસરમાં વિરોધ પ્રદર્શન કરી ‘રેન્ટ એક્ટ પાછો ખેંચો’ના (Gujarat Rent Bill) નારા લગાવ્યા હતા. રાજ્યના 182 વકીલ મંડળોના સમર્થનથી શરૂ થયેલી આ હડતાળની અસર કોર્ટની કામગીરી પર પણ જોવા મળી રહી છે.
Gujarat Lawyers Strike: હાઇકોર્ટમાં વકીલોની ગેરહાજરી, કેસોની મુદત લંબાવાઈ
ગુજરાત હાઇકોર્ટ સહિત વિવિધ અદાલતોમાં વકીલોની હડતાળને કારણે ન્યાયિક કામગીરી પ્રભાવિત થઈ છે. ગુજરાત હાઇકોર્ટ એડવોકેટ એસોસિએશને વકીલોને કોર્ટની કામગીરીથી દૂર રહેવાની અપીલ કરી હતી. તેના પગલે હાઇકોર્ટ પરિસરમાં સામાન્ય દિવસોની સરખામણીએ ઓછી ચહલપહલ જોવા મળી હતી. વકીલોની ગેરહાજરીને કારણે અનેક કેસોની સુનાવણી પર અસર પડી છે અને આજની મુદતો લંબાવવામાં આવી છે.
યતીન ઓઝાનો વિરોધ, વિધેયક સામે ગંભીર સવાલો
ગુજરાત હાઇકોર્ટ (Gujarat High Court) એડવોકેટ એસોસિએશનના પ્રમુખ યતીન ઓઝાએ (Yatin Oza) નવા ભાડા વિધેયક સામે નારાજગી વ્યક્ત કરી હતી. તેમના મતે, આ કાયદો બિલ્ડરો અને ઉચ્ચ અધિકારીઓના હિતોને ધ્યાનમાં રાખીને લાવવામાં આવ્યો છે. તેમણે વિધેયકની જોગવાઈઓ સામે આકરા શબ્દોમાં વિરોધ નોંધાવ્યો હતો.
ઓઝાએ જણાવ્યું હતું કે એસોસિએશન દ્વારા બે દિવસ સુધી કામકાજથી દૂર રહેવાનો નિર્ણય લેવામાં આવ્યો છે. જોકે, રાજ્યભરના વકીલો દ્વારા જાહેર કરવામાં આવેલી અચોક્કસ મુદતની હડતાળને પગલે વિરોધ કેટલો સમય ચાલુ રહેશે તે અંગે સ્થિતિ સ્પષ્ટ થવાની બાકી છે.
નવા ભાડા વિધેયક સામે વકીલોનો વિરોધ શા માટે?
વકીલોના વિરોધનું મુખ્ય કારણ ભાડા સંબંધિત વિવાદોના નિકાલ (Gujarat Lawyers Strike) માટે સૂચવવામાં આવેલી નવી વ્યવસ્થા છે. વિધેયકની જોગવાઈઓ અનુસાર, ભાડા કરાર અને તેમાંથી ઊભા થતા વિવાદોના ઉકેલ માટે સિવિલ કોર્ટ અથવા સ્મોલ કોઝ કોર્ટના બદલે વહીવટી તંત્રના નિયુક્ત અધિકારીઓને જવાબદારી સોંપવાની જોગવાઈ છે.
આ વ્યવસ્થામાં નાયબ મામલતદાર, ડેપ્યુટી કલેક્ટર અથવા આસિસ્ટન્ટ મ્યુનિસિપલ કમિશનર જેવા અધિકારીઓની ભૂમિકા મહત્ત્વપૂર્ણ બની શકે છે. વકીલોને આશંકા છે કે આ ફેરફારથી પરંપરાગત ન્યાયિક પ્રક્રિયા અને તેમની વ્યાવસાયિક કામગીરી પર અસર પડી શકે છે.
જૂના કાયદાને યથાવત રાખવાની માગ
વકીલ મંડળોની માગ છે કે નવા ભાડા વિધેયકને પાછું ખેંચીને અગાઉની કાયદાકીય વ્યવસ્થા જાળવી રાખવામાં આવે. વકીલોનું કહેવું છે કે ભાડા સંબંધિત વિવાદોનો નિકાલ ન્યાયિક પ્રક્રિયા હેઠળ જ થવો જોઈએ. સતત ત્રણ દિવસ સુધી વિરોધ પ્રદર્શન કર્યા બાદ પણ કોઈ ઉકેલ ન આવતાં હડતાળનો નિર્ણય લેવામાં આવ્યો હોવાનું જણાવાયું છે.
હડતાળની અસર હવે સામાન્ય નાગરિકો પર
વકીલોની અચોક્કસ મુદતની હડતાળને કારણે કોર્ટમાં ચાલી રહેલા કેસોના પક્ષકારોને મુશ્કેલીનો સામનો કરવો પડી શકે છે. સુનાવણીની તારીખો લંબાતાં ન્યાય મેળવવાની પ્રક્રિયા વધુ સમય લઈ શકે છે. બીજી તરફ, વકીલો નવા ભાડા વિધેયક સામે પોતાનો વિરોધ યથાવત રાખવા મક્કમ છે.
હવે સમગ્ર મામલે સરકાર અને વકીલ મંડળો વચ્ચે કોઈ સમાધાન (Rent Act Protest) થાય છે કે નહીં તેના પર સૌની નજર છે. વિધેયક અંગે સરકારનું આગામી પગલું અને હડતાળ અંગે વકીલ મંડળોનો નિર્ણય રાજ્યની અદાલતોની કામગીરી માટે મહત્ત્વપૂર્ણ બની રહેશે.
આ પણ વાંચો: ગુજરાત ભાડા વિધેયક સામે વકીલોનો વિરોધ, 4 દિવસ કામથી અળગા રહેવાનો નિર્ણય
આ પણ વાંચો: લવ જેહાદ વિરુદ્ધ કાયદો તો બન્યો પણ કાયદોનો ડર ક્યાં ?
આ પણ વાંચો: ગુજરાતમાં 24 કલાક દુકાનો,મોલ અને હોટેલો ખુલ્લી રાખી શકાશે
