Andhra Pradesh News: સિવિયર સાયક્લોનિક સ્ટોર્મ ‘મુરાસુ’એ મંગળવારે વહેલી સવારે આંધ્રપ્રદેશના પ્રકાશમ જિલ્લામાં ઓંગોલ નજીક લેન્ડફોલની પ્રક્રિયા શરૂ કરી, જેના કારણે દરિયાકાંઠાના વિસ્તારોમાં ભારે વરસાદ અને તેજ પવન ફૂંકાયા છે. ભારતીય હવામાન વિભાગ (IMD) મુજબ લેન્ડફોલની પ્રક્રિયા લગભગ રાત્રે 1 વાગ્યે શરૂ થઈ હતી, જ્યારે પવનની ઝડપ 110 કિમી/કલાક અને ઝાપટાં 120 કિમી/કલાક સુધી પહોંચ્યા હતા.
IMDએ શું કહ્યું?
IMDએ પોતાના સત્તાવાર બુલેટિનમાં જણાવ્યું કે 3 નવેમ્બરે ભારતીય સમય મુજબ સવારે 1 વાગ્યે લેન્ડફોલની પ્રક્રિયા શરૂ થઈ. વોલ ક્લાઉડનો આગળનો ભાગ કાંઠામાં પ્રવેશી રહ્યો છે, જ્યારે વોલ ક્લાઉડ વિસ્તાર કાંઠાની ખૂબ નજીક છે. ચક્રવાત નજીક આવતાં ઓંગોલ અને આસપાસના વિસ્તારોમાં ભારે વરસાદ અને તેજ પવનની નોંધ લેવાઈ છે.
Andhra Pradesh: ઓંગોલથી માત્ર 40 કિમી દૂર હતું વાવાઝોડું
વહેલી સવારે લગભગ 1:30 વાગ્યે ચક્રવાત પશ્ચિમ-મધ્ય બંગાળની ખાડી(Bay of Bengal)માં, દક્ષિણ આંધ્રપ્રદેશના કાંઠાની નજીક કેન્દ્રિત હતું. તે ઓંગોલથી આશરે 40 કિમી દક્ષિણ-પૂર્વ, કાવાલીથી 60 કિમી ઉત્તર-પૂર્વ અને બાપટલાથી 70 કિમી દક્ષિણમાં હતું. વાવાઝોડું પહોંચ્યું તે પહેલાં જ દરિયાકાંઠે ઊંચી ભરતી અને તોફાની દરિયાની સ્થિતિ જોવા મળી હતી. IMDના જણાવ્યા મુજબ બુધવારે સવાર સુધી કાંઠે અને દરિયામાં 110 કિમી/કલાકના પવન અને 120 કિમી/કલાક સુધીના ઝાપટાં ચાલુ રહેવાની શક્યતા છે.
દરિયાકાંઠાના જિલ્લાઓ માટે સ્ટોર્મ સર્જની ચેતવણી
હવામાન વિભાગે આગામી 12 કલાકમાં દક્ષિણ કોસ્ટલ આંધ્રપ્રદેશના અનેક સ્થળોએ ભારે વરસાદ(Heavy rain)ની આગાહી કરી છે. સાથે જ ખગોળીય ભરતી કરતાં 1 થી 1.5 મીટર ઊંચા સ્ટોર્મ સર્જની ચેતવણી આપી છે, જેનાથી નીચાણવાળા કાંઠાના વિસ્તારોમાં બુધવારે સવાર સુધી પાણી ભરાઈ શકે છે. બાપટલા, કૃષ્ણા અને પ્રકાશમ જિલ્લામાં સૌથી વધુ સ્ટોર્મ સર્જની શક્યતા છે.
પુડુચેરી અને ઉત્તર તમિલનાડુમાં પણ વરસાદ
ચક્રવાતની અસર પડોશી વિસ્તારોમાં પણ જોવા મળી છે. પુડુચેરીમાં મધ્યરાત્રિથી સતત વરસાદ ચાલુ છે, જેના કારણે સામાન્ય જનજીવન પ્રભાવિત થયું છે. ચક્રવાતના બહારના વરસાદી પટ્ટા ઉત્તર તમિલનાડુ(Tamil Nadu) અને પુડુચેરીને અસર કરી રહ્યા છે. IMDએ અગાઉ આગાહી કરી હતી કે મુરાસુ વેરી સિવિયર સાયક્લોનિક સ્ટોર્મ બની નેલ્લોર અને નરસાપુર વચ્ચે, ઓંગોલ નજીક આંધ્રપ્રદેશના કાંઠે ટકરાશે.
આ પણ વાંચો: અર્નબ ગયું, મુરાસુ આવ્યું: એક અઠવાડિયામાં બે ચક્રવાત, બંગાળની ખાડીમાં શું ચાલી રહ્યું છે?
આ પણ વાંચો: ચક્રવાતી વાવાઝોડું ‘અર્નબ’ આંધ્ર તરફ ધસ્યું, 16 જિલ્લામાં એલર્ટ; ઓડિશામાં શાળાઓ બંધ
આ પણ વાંચો: આંધ્ર-ઓડિશામાં અર્નબ ચક્રવાતની અસર
