National News : તૃણમૂલ કોંગ્રેસ (TMC)ના સાંસદ કીર્તિ આઝાદે (Kirti Azad)દિવાળીના દિવસે રામ મંદિરને લઈને આપેલા નિવેદનથી રાજકીય ચર્ચા જગાવી છે. તેમણે સ્પષ્ટ શબ્દોમાં કહ્યું કે તેઓ અયોધ્યાના રામ મંદિરમાં (Ram Mandir)ક્યારેય દર્શન કરવા નહીં જાય. આઝાદે માતા સીતાની અગ્નિપરીક્ષા (Sita Agnipariksha)અને ત્યાર બાદ તેમના ત્યાગના પ્રસંગનો ઉલ્લેખ કરીને ભાજપ પર નિશાન સાધ્યું હતું. સાથે જ તેમણે સવાલ કર્યો હતો કે કામાખ્યા દેવીની પૂજા કરનાર વ્યક્તિને શું હિંદુ ન ગણવો જોઈએ?
કીર્તિ આઝાદે (Kirti Azad)ભાજપ પર ધાર્મિક મુદ્દાઓનો રાજકીય ઉપયોગ કરવાનો આરોપ લગાવ્યો હતો. તેમનું આ નિવેદન એવા સમયે આવ્યું છે, જ્યારે સમાજવાદી પાર્ટી (SP)ના પ્રમુખ અખિલેશ યાદવ 12 ડિસેમ્બરે અયોધ્યામાં રામ મંદિર અને હનુમાનગઢીની મુલાકાત લેવાની યોજના ધરાવે છે. ભાજપે અખિલેશની પ્રસ્તાવિત મુલાકાતને રાજકીય ગણાવી છે.
કામાખ્યા દેવીની પૂજા કરું છું, તો શું હિંદુ નથી?: કીર્તિ આઝાદ
કીર્તિ આઝાદે ભાજપ દ્વારા વારંવાર રામ મંદિરનો મુદ્દો ઉઠાવવા સામે સવાલો કર્યા હતા. તેમણે ભાજપ પર વસૂલી અને દાનની ચોરી જેવા ગંભીર આરોપો પણ લગાવ્યા હતા.
તેમણે કહ્યું કે તેઓ અયોધ્યાના રામ મંદિરે (Ram Mandir)ગયા નથી, પરંતુ આસામના પ્રસિદ્ધ કામાખ્યા દેવી મંદિરે દર્શન કરવા જાય છે. આઝાદે સવાલ કર્યો કે શું કામાખ્યા દેવીની પૂજા કરનાર વ્યક્તિ હિંદુ ન ગણાય? તેમણે કહ્યું કે ધાર્મિક આસ્થા કોઈ એક મંદિરની મુલાકાતથી નક્કી થતી નથી.
માતા સીતાની અગ્નિપરીક્ષા અને ત્યાગનો ઉલ્લેખ કર્યો
આઝાદે પોતાના નિવેદનમાં માતા સીતાના જીવન સાથે જોડાયેલા પ્રસંગનો પણ ઉલ્લેખ કર્યો હતો. તેમણે પોતાને માતા સીતાની જન્મભૂમિ સાથે જોડાયેલા ગણાવતાં કહ્યું કે માતા સીતાએ અગ્નિપરીક્ષા આપ્યા બાદ પણ તેમને ત્યજી દેવામાં આવ્યાં હતાં.
તેમણે સવાલ કર્યો કે કોઈ વ્યક્તિ પોતાની પત્ની સાથે આવું વર્તન કેવી રીતે કરી શકે? આઝાદના મતે, અગ્નિપરીક્ષામાં સફળ થયા પછી પણ પત્નીનો ત્યાગ કરવો યોગ્ય નથી. આ નિવેદન દ્વારા તેમણે રામ મંદિરના મુદ્દે ભાજપની રાજનીતિ પર સવાલ ઉઠાવ્યા હતા.
‘રામ મંદિરે નહીં જાઉં, મથુરા જઈશ’
રામ મંદિરની મુલાકાત અંગે પોતાનું વલણ સ્પષ્ટ કરતાં કીર્તિ આઝાદે (Kirti Azad)કહ્યું કે તેઓ અત્યાર સુધી અયોધ્યાના રામ મંદિરે ગયા નથી અને ભવિષ્યમાં પણ ત્યાં જવાનો તેમનો કોઈ ઇરાદો નથી. તેમણે મથુરા જવાની વાત પણ કરી હતી.
આઝાદે વધુમાં જણાવ્યું કે તેઓ કામાખ્યા દેવી મંદિર અને ત્રિપુરા સુંદરી મંદિરે દર્શન કરવા જાય છે. તેમણે ભાજપ પર ધાર્મિક લાગણીઓનો રાજકીય ફાયદા માટે ઉપયોગ કરવાનો આરોપ લગાવ્યો હતો.
ભાજપ પર રાવણરાજ્ય લાવવાનો આરોપ
કીર્તિ આઝાદે ભાજપ પર પ્રહાર કરતાં કહ્યું કે દેશમાં રામરાજ્ય સ્થાપિત કરવાના બદલે રાવણરાજ્ય જેવી સ્થિતિ ઊભી કરવામાં આવી છે. તેમણે આરોપ લગાવ્યો કે ભાજપ પાસે રામ મંદિરના મુદ્દા સિવાય અન્ય કોઈ મુદ્દો રહ્યો નથી.
આ નિવેદન બાદ રામ મંદિર (Ram Mandir), ધાર્મિક આસ્થા અને રાજકીય નિવેદનબાજીને લઈને ચર્ચા વધુ તેજ બની છે. ખાસ કરીને અખિલેશ યાદવની પ્રસ્તાવિત અયોધ્યા મુલાકાતની પૃષ્ઠભૂમિમાં આઝાદના નિવેદનને રાજકીય રીતે પણ મહત્ત્વપૂર્ણ માનવામાં આવી રહ્યું છે.
