Uttarpradesh News : ઉત્તર પ્રદેશના રાજકારણમાં 2027ની વિધાનસભા ચૂંટણી પહેલાં નવું સમીકરણ રચાયું છે. AIMIMના અસદુદ્દીન ઓવૈસી (Asaduddin Owaisi)અને આઝાદ સમાજ પાર્ટીના ચંદ્રશેખર આઝાદે (Owaisi Chandrashekhar Alliance)હાથ મિલાવ્યા છે. બંનેએ ‘સામાજિક પરિવર્તન મોરચા’ની જાહેરાત કરી છે. આ ગઠબંધનમાં ચંદ્રશેખરને મુખ્યમંત્રી પદના ઉમેદવાર જાહેર કરવામાં આવ્યા છે.
Owaisi Chandrashekhar Alliance : સામાજિક પરિવર્તન મોરચાની જાહેરાત, ચંદ્રશેખર CM ચહેરો
ઉત્તર પ્રદેશમાં આગામી 2027ની વિધાનસભા ચૂંટણીને ધ્યાનમાં રાખીને રાજકીય ગતિવિધિઓ તેજ બની છે. AIMIMના વડા અસદુદ્દીન ઓવૈસી (Asaduddin Owaisi) અને આઝાદ સમાજ પાર્ટી (કાંશીરામ)ના પ્રમુખ ચંદ્રશેખર આઝાદે (Chandrashekhar Azad) ગઠબંધન કરીને નવા રાજકીય મોરચાની જાહેરાત કરી છે. બંને નેતાઓએ સંયુક્ત પત્રકાર પરિષદ યોજીને આ ગઠબંધનને ‘સામાજિક પરિવર્તન મોરચા’ નામ આપ્યું છે.
આ જાહેરાત સાથે જ ઓવૈસીએ સ્પષ્ટ કર્યું કે ચંદ્રશેખર આઝાદ (Chandrashekhar Azad) આ મોરચા તરફથી ઉત્તર પ્રદેશમાં મુખ્યમંત્રી પદના ઉમેદવાર રહેશે. બંને પક્ષો સાથે મળીને ચૂંટણી લડશે અને રાજ્યમાં ભાજપને સત્તામાં આવતા રોકવા માટે મજબૂત વિકલ્પ ઊભો કરવાનો પ્રયાસ કરશે.
ઓવૈસીએ કહ્યું- ભાજપને રોકવા મજબૂત વિકલ્પ બનશે
ગઠબંધનની જાહેરાત કરતાં અસદુદ્દીન ઓવૈસીએ જણાવ્યું કે સામાજિક પરિવર્તન મોરચાને સફળ બનાવવા માટે બંને પક્ષો પ્રતિબદ્ધ છે. તેમણે ચંદ્રશેખર આઝાદને મુખ્યમંત્રી પદના ઉમેદવાર જાહેર કરતાં કહ્યું કે તેમના નેતૃત્વમાં રાજ્યમાં ઇચ્છિત સામાજિક પરિવર્તન લાવવાનો પ્રયાસ કરવામાં આવશે.
ઓવૈસીએ વિશ્વાસ વ્યક્ત કર્યો કે આ ગઠબંધન ઉત્તર પ્રદેશમાં ભાજપ સામે મજબૂત રાજકીય વિકલ્પ બની શકે છે. બંને પક્ષો સાથે મળીને ચૂંટણીની રણનીતિ તૈયાર કરશે અને જનતાની વચ્ચે જશે.
ચંદ્રશેખરે કહ્યું- વંચિત અને શોષિત વર્ગોનો અવાજ બનીશું
ચંદ્રશેખર આઝાદે (Chandrashekhar Azad) આ જોડાણને માત્ર ચૂંટણીલક્ષી ગઠબંધન ગણાવવાને બદલે સામાજિક પરિવર્તન માટેનું અભિયાન ગણાવ્યું હતું. તેમના જણાવ્યા અનુસાર, આ મોરચામાં દલિત, વંચિત, શોષિત અને પીડિત વર્ગોના લોકોને જોડવાનો પ્રયાસ કરવામાં આવશે.
તેમણે કહ્યું કે અગાઉ અનેક સરકારો બદલાઈ, પરંતુ સમાજના વંચિત વર્ગોની સ્થિતિમાં અપેક્ષિત સુધારો થયો નથી. આજે પણ અનેક લોકો મૂળભૂત સુવિધાઓથી વંચિત છે. જાતિ આધારિત હિંસા, અત્યાચાર અને ભેદભાવ જેવી સમસ્યાઓનો અંત લાવવાની જરૂર છે.
ચંદ્રશેખરે વધુમાં જણાવ્યું કે જેમ જેમ અન્ય વંચિત અને પીડિત સમુદાયો આ મોરચા સાથે જોડાશે તેમ તેમ તેની તાકાત વધશે.
150 બેઠકો પર ચૂંટણી લડવાની તૈયારી, અખિલેશની ચિંતા વધશે?
રાજકીય ચર્ચાઓ પ્રમાણે ઓવૈસી (Asaduddin Owaisi)અને ચંદ્રશેખરનો મોરચો ઉત્તર પ્રદેશની આશરે 150 બેઠકો પર ચૂંટણી લડી શકે છે. રાજ્યમાં મુસ્લિમ મતદારોની સંખ્યા લગભગ 20 ટકા અને દલિત મતદારોની સંખ્યા લગભગ 21 ટકા હોવાનું માનવામાં આવે છે.
મુસ્લિમ મતોની અસર આશરે 143 બેઠકો પર જોવા મળે છે, જ્યારે દલિત મતદારો આશરે 150 બેઠકો પર ચૂંટણી પરિણામોને પ્રભાવિત કરી શકે છે. આવી સ્થિતિમાં બંને પક્ષોનું જોડાણ સમાજવાદી પાર્ટી અને બહુજન સમાજ પાર્ટી માટે પણ પડકાર ઊભો કરી શકે છે.
ખાસ કરીને અખિલેશ યાદવના મુસ્લિમ અને દલિત મતદારો પરના રાજકીય પ્રભાવને આ મોરચો કેટલો પડકારશે તે જોવું મહત્ત્વનું રહેશે. જોકે, વાસ્તવિક અસર ચૂંટણી દરમિયાન મતદારોના વલણ અને ગઠબંધનની કામગીરી પર નિર્ભર રહેશે.
રાજભરે સપા-બસપા પર નિશાન સાધ્યું, કોંગ્રેસે પણ આપી પ્રતિક્રિયા
નવા ગઠબંધનની જાહેરાત બાદ ઉત્તર પ્રદેશના રાજકારણમાં નિવેદનબાજી શરૂ થઈ ગઈ છે. યોગી સરકારના મંત્રી ઓમપ્રકાશ રાજભરે આ જોડાણને સપા અને બસપા માટે મુશ્કેલી ઊભી કરનારું ગણાવ્યું હતું. તેમણે કહ્યું કે આ ગઠબંધન બંને પક્ષો માટે રાજકીય રીતે નુકસાનકારક સાબિત થઈ શકે છે.
બીજી તરફ, સમાજવાદી પાર્ટીના સાંસદ મોહિબુલ્લાહ નદવીએ કહ્યું કે ઉત્તર પ્રદેશના લોકો બહારના નેતાઓ પર સરળતાથી વિશ્વાસ કરતા નથી. તેમણે એવો પણ દાવો કર્યો કે ઓવૈસી અને ચંદ્રશેખરના જોડાણથી સપાના ગઠબંધન પર કોઈ ખાસ અસર નહીં પડે.
કોંગ્રેસના નેતા ઇમરાન મસૂદે આ જોડાણ અંગે કહ્યું કે લોકશાહીમાં દરેક પક્ષને પોતાનું ગઠબંધન બનાવવાનો અધિકાર છે. તેમણે બિહારની ચૂંટણીનો ઉલ્લેખ કરીને કહ્યું કે ઓવૈસીની ચૂંટણીમાં ભાગીદારીથી ભાજપને ફાયદો થયો હતો.
હવે 2027ની ઉત્તર પ્રદેશ વિધાનસભા ચૂંટણી (UP Assembly Election)માં સામાજિક પરિવર્તન મોરચો કેટલો પ્રભાવ પાડે છે અને દલિત-મુસ્લિમ મતદારોનું સમર્થન મેળવવામાં કેટલો સફળ રહે છે તેના પર રાજકીય પક્ષોની નજર રહેશે.
